Ինգա Զարաֆյան, «ԷկոԼուր»
ՙՍևանա լիճը վտանգի տակ է՚ Հայաստանից SOS ահազանգին արդեն արձագանքել են ավելի քան 20 կազմակերպություններ ԱՄՆ-ից, Մեծ Բրիտանիայից, Մեկսիկայից, Վենեսուելայից, Ղրղզստանից, Բուլղարիայից, Ուգանդայից:
Կոչը տարածվել էր հոկտեմբերի 1-ին WECF կանանց միջազգային ցանցի միջոցով հայկական «ԷկոԼուր» եվ «Կանայք հանուն առողջության եվ առողջ շրջակա միջավայրի» (AWHHE) հասարակական կազմակերպությունների կողմից: WECF-ի ցանցին, որն իր մեջ ներառում է 30 երկրների ավելի քան 100 կազմակերպություններ, միացել է նաև IPEN Կայուն օրգանական աղտոտիչների լիկվիդացման միջազգային ցանցը, որի մեջ մտնում են ամբողջ աշխարհի մոտ 400 կազմակերպություններ:
Ահազանգը պայմանավորված է Հայաստանում Արարատ քաղաքից դեպի Սևանի ավազանի տարածք՝ Սոդք, ոսկու արդյունահանման գործարանի տեղափոխումն սկսելու գործընթացով: Եթե նախագիծն իրականացվի, ապա չի բացառվում այն իրական վտանգը, որ ամբողջ Կովկասի տարածաշրջանի համար քաղցրահամ ջրի ռազմավարական պաշար եվ Հայաստանի անվտանգության գլխավոր ռազմավարական երաշխիք հանդիսացող Սևանը կարող է վերածվել 34 միլիարդ խորհանարդ մետր տարողությամբ թունավոր նյութերով ռեզերվուարի: Ռիսկերի ցուցակը կարող են համալրել միջազգային ահաբեկչությունը, Սևանի ավազանի տարածքի բարձր սեյսմիկությունը եվ այլն:
GeoProMining միջազգային ընկերությունը՝ ի դեմս իր GPM Gold դուստր ձեռնարկության, տվյալ նախագծի վերաբերյալ բարձր մակարդակով բանակցություններ է վարում, ինչպես նաև փորձում է դրական հասարակական կարծիք ստեղծել, օգտագործելով այսպես կոչված «գրպանային» հասարակական կազմակերպությունները, հրաժարվում է մամուլի եվ լայն հասարակայնության հետ կոնտակտներից:
«SOS Սևան» տեղեկատվական կամպանիան երկրի ղեկավարությանն առաջարկում է, որպեսզի ոսկու արդյունահանման ֆաբրիկայի վերակառուցման գործընթացը բաց լինի հասարակաության համար, երաշխավորվի լայն հասարակայնության մասնակցությունը նախագծին, անցկացվի անկախ փորձագիտական գնահատական:
Հոկտեմբեր 02, 2008