ԷկոԼուր
Երևանի Աջափնյակ վարչական շրջանի բնակիչներն ու բնապահպանները դեմ արտահայտվեցին վարչական շրջանի սահմաններում գտնվող նոր հանքավայրի շահագործման ծրագրին: Ս. թ. հունվարի 22-ին Աջափնյակի թաղապետարանում տեղի ունեցան «Սենթրալ Իսթեյթ» ՍՊԸ-ի կողմից ներկայացված Սպանդարյանի տուֆի և բազալտի հանքավայրի շահագործման՝ Շրջակա միջավայրի վրա ազդեցության գնահատման հայտի վերաբերյալ հանրային առաջին քննարկումները:
Հանքավայրը բնակելի շենքերից գտնվում է 350 մ հեռավորության վրա՝ 3-րդ և 4-րդ գյուղերի միջնամասում: «Հանքավայրը 320 հա մակերես է զբաղեցնում, պաշարները կազմում են 11 միլիոն խմ: Մեր ընկերությունը հայցում է 8,8 հա-ի վրա գտնվող օգտակար հանածոյի պաշարները, որոնք մոտավորապես 2 միլիոն խմ-ի կարգի են: Հիմնականում տուֆեր են՝ 1,3 միլիոն խմ, իսկ բազալտը՝ 700 հազար խմ է: Հանքավայրը շահագործվելու է բաց եղանակով: …Պայթեցման աշխատանքներ չեն կատարվելու, որովհետև այդ ժամանակ ապարի վրա ճաքեր են առաջանալու, և կդառնան անպիտան: Որպեսզի քարերը սալիկ դառնան, անգարների մեջ սղոցներ են աշխատելու, իսկ մանրախիճի համար օգտագործվող թափոնների համար՝ ջարդիչ սարքեր»,- ասաց ընկերության ներկայացուցիչ, երկրաբան Շահեն Խաչատրյանը:
Քննարկման մասնակիցները հայտնեցին, որ Երևանում նոր հանքավայրի շահագործման փաստը մտահոգիչ է, քանի որ քաղաքում հանքավայրերի գործունեության հետևանքով առաջացած փոշու ծավալները շատ մեծ են:
Ի պատասխան ընկերության երկրաբանը նշեց. «Ես չեմ հերքում, որ փոշի կամ գազերի արտանետումներ չի լինելու: Բնականաբար, տեխնիկաների աշխատանքի ընթացքում այդ ամենը լինելու է: Բայց քաղաքակիրթ ճանապարհով այդ խնդիրները հնարավոր են լուծել: Քարերը ջրով են սղոցվելու ծածկված անգարի մեջ, այնտեղ փոշի չի լինելու, փոշի լինելու է միայն ջարդիչ սարքերի աշխատանքի ընթացքում: Իսկ թե ինչպիսի միջոցառումներ պետք է իրականացնել փոշին չեզոքացնելու համար, արդեն նախագծային փուլում 3 տարբերակներ կան, նախնական գնահատման հայտում այդ տարբերակները գնահատվելու են: Նախագծային փուլում կընտրվի դրանցից ամենից օպտիմալ տարբերակը»:
Ջրով փոշու չեզոքացման տարբերակն, ըստ ներկաների, լավագույն տարբերակ չի կարող լինել՝ հաշվի առնելով այսօր արդեն կլիմայի փոփոխությամբ պայմանավորված ջրի սակավությունը: Մի բնակիչ էլ նկատեց, որ հնարավոր է, որ բացի ջրի տնտեսումից նաև ֆինանսական ծախսեր կատարելուց խուսափելու նպատակով ջրով չեզոքացումը պատշաճ կերպով չիրականացվի:
Աջափնյակ վարչական շրջանի ղեկավար Գևորգ Բաբայանն ասաց, որ հանքավայրի հարևանությամբ ջրի աղբյուրներ չկան, և անհրաժեշտություն կլինի ջրագիծ կառուցել: ««Վեոլիա Ջուրը» դժվար թե համաձայնվի ձեզ խմելու ջուր տալ՝ տարածքը ջրելու համար: Ոռոգման ջրի մոտակա կետը ուղիղ գծով մոտ 10 կմ հեռավորության վրա է, մեկ այլ կետ կա, որը 15 կմ հեռավորություն վրա է»,- ասաց նա:
Ներկաները հետաքրքրվեցին նաև աղմուկի չեզոքացման մեխանիզմներից: «Աղմուկի համար տեխնիկաների վրա տեղադրվող համապատասխան խլացուցիչներ կան, որոնք հաջողությամբ կիրառում են և դուք այն չեք լսում»,- պատասխանեց Շահեն Խաչատրյանը:
Քննարկմանը ներկա Երևանի ավագանու «Իմ քայլը» խմբակցության անդամ Գայանե Մելքոմյանն ընկերության ներկայացուցչին առաջարկեց ավելի կայուն բիզնես-ծրագրեր դիտարկել ու իրականացնել: «Այսօր Երևանն ունի օդի աղտոտվածության բարձր մակարդակ, այդ թվում՝ տրանսպորտային միջոցներից: Բայց պարզ է, թե փոշին հիմնական ինչ աղբյուրներից է գալիս: Որպես բնակիչ և որպես Երևանի ավագանու անդամ, փոխանցելով իմ որոշ գործընկերների կարծիքը, կարծում եմ, որ չպիտի համաձայնություն տալ ևս մեկ հանքի բացմանը: Ես պատրաստակամ եմ մեր ավագանու գոծընկերների հետ լրացուցիչ քննարկում իրականացնել, որից հետո ներկայացնել մեր կարծիքը այս հանրային լսումների և հանքի առաջարկի վերաբերյալ»,- ասաց նա:
Լսումների ընթացքում ներկայացված դիտարկումների, դիրքորոշումների քննարկման արդյունքում Երևանի քաղաքապետարանն աշխատանքային 5 օրվա ընթացքում ընկերությանը կներկայացնի նոր հանքավայրի շահագործման վերաբերյալ իր որոշումը:
Հունվար 22, 2020 at 19:18