ԷկոԼուր
Բացառվում է Ամուլսարի ոսկեբեր քվարցիտների հանքավայրի շահագործում, եթե դրա հետևանքով հնարավոր չի լինի պահպանել Ջերմուկի օդը, ջուրն ու բնությունը: Այս մասին մարտի 12-ին Վայոց ձորի մարզի Ջերմուկ քաղաքում սահմանադրական փոփոխությունների հանրաքվեի «Այո»-ի քարոզարշավի ժամանակ հայտարարեց ՀՀ վարչապետ Նիկոլ Փաշինյանը:
«Օդի մասին խոսք գնաց: Իմ ասածը հետևյալն է. օդին որևէ իրական սպառնալիք պետք է չլինի: Ջերմուկի օդը պետք է մնա մաքուր: Այստեղ երկու կարծիք չկա: Ոչ ոք չի ասում՝ եկեք Ջերմուկի ջուրն ու օդն աղտոտենք: Չի կարող այդպիսի բան լինել: Ես այդպիսի բան թույլ չեմ տա: Խոսքը նրա մասին է, թե արդյո՞ք հնարավոր է հանքը շահագործել այնպես, որ ոչ միայն Ջերմուկը, այլ Դարբ և Արփա գետերը չաղտոտվեն: Եթե հնարավոր է՝ այս ճշմարտության հետևից պետք է գնանք: Եթե հնարավոր չէ՝ ուրեմն հնարավոր չէ: Այդտեղ թեմա չկա: Նույնիսկ քննարկման բան չկա: Եթե հնարավոր չէ, որ Ջերմուկի այս օդն ու ջուրը, բնությունը պահպանվի, ուրեմն այդ հանքը բացառված է, որ շահագործվի: Սա է ամբողջ ճշմարտությունը»,- ասաց նա:
ՀՀ վարչապետը նշեց, թե ինչ քայլեր են ձեռնարկվել մինչ օրս: «Այս ընթացքում արձանագրել ենք հետևյալը: Հարց ենք ձևակերպել՝ իսկ արդյո՞ք Ամուլսարի Շրջակա միջավայրի վրա ազդեցության գնահատականը գնահատվել է իր ճշմարտացիության աստիճանի հանգամանքով: Նկատի ունեմ «Լիդիանը» ներկայացրել է ՇՄԱԳ, այնտեղ դրված են փաստեր, որ սա այսպես է, սա այնպես է: Մեր հարցը հետևյալն է: Նախկին Բնապահպանության նախարարության ներկայացուցիչները, որ այդ արձանագրումներն արել են, կարդացել են, արդյո՞ք իրենք ստուգել են դրանց ճշմարտացիությունը: Եվ երկրորդ, եթե հանկարծ պարզվի, որ չեն ստուգել, կամ իրենց պարտականության մեջ մտնո՞ւմ էր դրա ճշմարտացիության ստուգումը: Սա քննության մի ուղղությունն է: Երկրորդ ուղղությունը կամ հարցադրումը հետևյալն է՝ նաև նախկինում, խորհդրային տարիներին այնտեղ արված հետազոտությունների արդյունքները հաշվի՞ են առնվել հանքի հետ կապված գործընթացներում: Սա երկրորդ ուղղությունն է, որի պատասխանը մենք պետք է ստանանք: Երրորդ ուղղությունը հետևյալն է՝ Քննչական կոմիտեն կազմել է «ELARD»-ի և «Լիդիանի» բանավեճի արդյունքում 154 հարցանոց հարցաշար, որն առաջիկայում կուղարկվի նաև շահագրգիռ հասարակական կազմակերպություններին, նաև Գիտությունների ազգային ակադեմիային, որպեսզի այդ հարցաշարը ճշտվի և որի շուրջ արդեն տեղի կունենա «ELARD»-ի և «Լիդիանի» ներկայացուցիչների ամփոփիչ հարցաքննություն, որոնց արդյունքում այդ բոլոր բանավեճերը կլուծվեն»,- ասաց նա:
Նա նշեց, որ հեղափոխություն չլինելու դեպքում Ամուլսարի հանքը վաղուց շահագործվելիս կլիներ:
«Ես ուզում եմ մի այսպիսի ընդգծում անենք մեր այն հայրենակցիների համար, ովքեր մտածում են, որ հեղափոխությունից հետո Կառավարությունը բավարար միջոցներ չի ձեռնարկում Ամուլսարի հարցը մեկընդմիշտ լուծելու համար: Ես ուզում եմ բոլորի ուշադրությունը հրավիրել այն փաստի վրա, որ եթե հեղափոխություն չլիներ, Ամուլսարի հանքը վաղուց շահագործվելիս կլիներ: Առնվազն այդ փաստի բերումով կոչ եմ անում բոլորին չկորցնել հարգալից վերաբերմունքը հեղափոխության և Կառավարության նկատմամբ: Այն մարդիկ, ովքեր ուզում են կորցնել հարգալից վերաբերմունքը, թող հիշեն իրենց հեղափոխությունից առաջ և իրավիճակը հեղափոխությունից առաջ»,- նշեց նա:
Նիկոլ Փաշինյանը շեշտեց, որ Ամուլսարի հարցում մեկ դիրքորոշում ունեն՝ մինչև վերջ գնալ ճշմարտության հետևից. «Ես ունեմ մեկ մեծ անհամաձայնություն Ամուլսարի հարցում: Մեր մի շարք հայրենակիցներ ասում են, որ հանքը պետք է չաշխատի: Մեր ուրիշ հայրենակիցներն ասում են, որ հանքը պետք է աշխատի: Ես երկուսի հետ էլ անհամաձայնություն ունեմ: Եվ ինչով է տարբերվում իմ անձնական անհամաձայնությունն այս երկու դիրքորոշումների հետ: Ես ասում եմ՝ մենք պիտի մինչև վերջ գնանք ճշմարտության հետևից՝ մինչև վերջ, անմնացորդ: Ընդ որում դա հեշտ ճանապարհ չէ: Մեր վերջին ամիսների պատմությունը ցույց է տալիս, որ դա հեշտ ճանապարհ չէ: Շատերն ասում են, ո՞րն է ձեր ռազմավարությունը և մարտավարությունը Ամուլսարի հարցում: Իմ պատասխանը չի փոխվում՝ մինչև վերջ գնալ ճշմարտության հետևից:... Ես Ձեզ խոստանում եմ՝ Ամուլսարի հարցով բացառված է, որ մենք ճշմարտությունից 1 մմ շեղվենք... Ես կարող եմ վստահ ասել, որ Ամուլսարի հարցում ես այն քիչ մարդկանցից եմ, որ չունեմ ոչ մի շահագրգռություն բացի ՀՀ շահի»:
Մարտ 13, 2020 at 11:21