ԷկոԼուր
Հունիսի 4-5 ը Վայոց ձորի մարզի Գոմք և Մարտիրոս համայնքներում տեղի ունեցավ էկոտուրիզմի փառատոն: Փառատոնի ընթացքում կազմակերպվեցին ճանաչողական արշավներ, մարզային հեծանվային առաջնություն, թռչնադիտարկում, վրանային գիշերակաց, ինչպես նաև այց Մարտիրոսի Նզավ լեռ ու տեղի ժայռափոր եկեղեցի: Տեղի բնակիչները հնարավորություն ունեցան բացթյա տաղավերներում կազմակերպել իրենց կողմից պատրաստված սննդամթերքի, գինու և այլ իրերի ցուցահանդես-վաճառք:
Վայոց ձորի փոխմարզպետ Մելս Հարությունյանը Վայոց ձորի մարզպետ Հարություն Սարգսյանի անունից ողջունեց միջոցառման մասնակիցներին և ընդգծեց, որ Վայոց ձորի բնությունը և մշակութային հուշարձանները շատ լավ հենք են, որ տուրիզմը լավ զարգացում ունենա մարզում, ինչի շնորհիվ կլուծվեն մի շարք հարցեր:
Գոմքի համայնքապետ Մխիթար Հովհաննիսյանը նշեց, որ միջոցառումը անասնաբուծությամբ, մեղվաբուծությամբ զբաղվող համայնքին կօգնի զարգացնել գյուղատնտեսությունը և ունենալ շուկաներ, որը գյուղատնտեսության մեջ կարևոր հարցերից մեկն է:
Միջոցառման կազմակերպիչ «Ջերմուկի զարգացման կենտրոն» հասարակական կազմակերպության նախագահ Վազգեն Գալստյանի համաձայն՝ փառատոնի 1-ին արդյունքն այն է, որ Գոմք գյուղն ունեցավ փոքր ի շատե բարվոք ճանապարհ, որը որոշակիորեն բարեկարգվել է փառատոնին նախորդող օրերին:
Փառատոնի 2 օրերի և դրան նախորդող 3 օրերի ընթացքում Գոմքի սննդամթերքով սնվել է շուրջ 370 մարդ, որի համար ծախսվել է շուրջ 480 000 ՀՀ դրամ: Ցուցահանդես վաճառքի ժամանակ վաճառվել է 137 000 դրամի գյուղատնտեսական արտադրանք, ինչը մոտ 100 բնակիչ ունեցող գյուղի համար 5 օրվա կտրվածքով զգալի դրամական հոսք է: 12 արշավախումբ և 7 տուրիստական կազմակերպությունների ղեկավարներ անձամբ ծանոթացել են Գոմք համայնքի զբոսաշրջային հնարավորություններին՝ համայնքի հետ հետագա համագործակցություն ձևավորելու մտայնությամբ:
Էկոտուրիզմի փառատոնը կազմակերպել էին «Երիտասարդ կենսաբանների ասոցիացիա» և «Ջերմուկի զարգացման կենտրոն» հասարակական կազմակերպությունները:
Հունիս 07, 2016 at 13:42