ԷկոԼուր
«Առավոտվանից սպառնալիքներ եմ ստանում Էրենբունու այգու «տերերի» մանկլավիկներից, թե հետս վատ բան կլինի, քեզ սենց կանենք, եթե շարունակեմ այգու համար պայքարը:
Այգին պատկանում է համայնքին: Ինչ-որ մեկը չի կարող լինել ավելի լավը, քան համայնքի բնակիչները միասին վերցրած»,- Facebook-ի իր էջում գրում է Երեւանի բնակիչ Վարդան Համբարձումյանը: Վարդանն արդեն մի քանի անգամ ահազանգում է Էրեբունի համայնքի Նոր Արեշ 50 հասցեում գտնվող մանկական կանաչ այգու կառուցապատման մասին:
Նրա ուղարկած լուսանկարներում պարզ երեւում է, թե ինչպես է կառուցապատումն իրականացվում, եւ ծառերը հայտնվում են կառուցվող օբյեկտի ներսում: «ԷկոԼուր»-ն ահազանգը փոխանցել է ՀՀ բնապահպանության նախարարությանն ու Երեւանի քաղաքապետարանին: Դեռ պատասխան չենք ստացել, սակայն «Արմենպրես» գործակալության միջոցով նախարարությունը տեղեկացրել է, որ արդեն աշխատանքային խումբ է ձեւավորվել, որը տեղում ուսումնասիրություններ կիրականացնի: Ընկերությունը կամ ունի կառուցապատումը թույլատրող փաստաթղթեր, կամ` ոչ: Եթե` ոչ, ապա պետք ակտ կազմվի: Սակայն ստուգումների արդյունքները դեռ չկան, իսկ քաղաքացին, ով հանդես է եկել հանրային տարածքի զավթման դեմ, սպառնալիքներ է ստանում:
Խնդրի առնչությամբ անհանգստություն է հայտնել նաեւ Էկոլոգիական հասարակական դաշինքը, որն իր ցանցի միջոցով գրում է. «Հայաստանում «ամենաթողությունն» այնքան է խորացել, որ լռեցնում են բոլոր նրանց, ովքեր համարձակվում են դուրս գալ նրանց դեմ, բարձրաձայնել նրանց ապօրինությունները»:
Օգոստոս 03, 2012 at 18:06