«Դանդի Փրիշս Մեթալս Կապան»-ում կրճատումներ չկան

«Դանդի Փրիշս Մեթալս Կապան»-ում կրճատումներ չկան

ԷկոԼուր

Հանքարդյունաբերության խնդիրները բիզնեսի տեսանկյունից. ԷկոԼուրի հետ զրույցում իր տեսակետն է ներկայացնում «Դանդի Փրիշս Մեթալս Կապան» ՓԲԸ-ի գլխավոր տնօրեն Հրաչ Ջաբրայանը:

- Պարոն Ջաբրայան, Էներգետիկայի և բնական պաշարների նախարար Երվանդ Զախարյանը հայտարարել է, որ ներկայումս հանքարդյունաբերությունը գտնվում է ծանր վիճակում մետաղների միջազգային շուկայում գների անկման հետևանքով: Դանդիի վրա ի՞նչ ազդեցություն և հետևանքներ է ունեցել մետաղների միջազգային շուկայում ճգնաժամը: Եղել են արդյո՞ք ընկերությունում փոփոխություններ և կրճատումներ:

- Բնականաբար, նախարարի տեղեկությունը ճիշտ է, բավականին մեծ նվազում կա միջազգային շուկայում` պղնձի և ընդհանրապես մետաղների գների հետ կապված: Մենք բազմամետաղային հանքավայր ենք՝ ոսկի, արծաթ, պղինձ և ցինկ: Մեծագույն եկամուտը մեզ ապահովում է ոսկին և պղինձը: Այդտեղ մեծ նվազումների հետևանքով, բնականաբար, մեր եկամուտների վրա շատ մեծ բացասական ազդեցություն ունեցած է և կշարունակե ունենալ վերջին 3 տարիների ընթացքում: 2011-ի օգոստոսից ոսկու գինն ընկած է մոտավորապես 100 տոկոսով, իսկ պղնձի գինը՝ 230 տոկոսով: Սակայն ոչ մի կրճատում չի եղել մեզ մոտ: Մենք 2011-ին ունեինք 1200 աշխատակից: Այսօր ևս ունենք 1200 աշխատակից:

- Ինչքա՞ն ներդրում եք արել, և որքանո՞վ է նվազել ընկերության եկամուտը:

- 10 տարվա ընթացքում մենք ներդրել ենք մոտ 225 միլիոն դոլար: 2015-ի ժամանակահատվածում մեր ներդրումը եղել է 13 միլիոն դոլար կապիտալ և 37 միլիոն աշխատանքային առօրյա ծախսեր: Իսկ մեր եկամուտը բավականին չնչին է եղել 2015-ին, ինչպես 2014-ին և 2013-ին:

- Իսկ ճգնաժամը ինչպե՞ս եք պատրաստվում հաղթահարել:

- Ես մեկնում եմ Կանադա, այնտեղ մեր տնօրենների խորհրդի հանդիպումն է: Ես վստահ եմ, որ եկող դժվարությունները կարող ենք հաղթահարել: Այսօրվա կտրվածքով մեր ծրագիրը՝ շարունակել կապիտալ ներդրումներն այս տարի, մոտավորապես 17 միլիոն դոլար, և մեր աշխատանքները նույն ծավալով շարունակել:

- Դեռևս 2014 թվականին ֆինանսների նախարարության կողմից ընկերության նկատմամբ կազմվել էր 3.8 միլիարդ դրամի ակտ, ինչպես ֆինանսների նախարարությունն էր հայտարարել, ընկերությունը շահագործել է լիցենզիոն պայմանագրով իրեն չտրամադրված հանքային երակներ: Դուք դատական կարգով բողոքարկել էիք նախարարության ակտը: Ի՞նչ փուլում են գտնվում դատական գործընթացները: Ի վերջո, հաջողվե՞ց բռնագանձել այդ գումարը:

- Բռնագանձելը՝ ոչ, որովհետև մենք գնացել ենք դատարան այդ հարցով, և, ըստ օրենքի, պետությունը չի կարող մեզանից բռնագանձել այդ գումարը, մինչև դատական գործը չվերջանա: Ներկայումս գտնվում է դատական փուլում, հաջորդ դատական նիստը տեղի կունենա փետրվարի 29-ին: Ասեմ, որ մենք մինչև օրս ժխտել ենք և կշարունակենք ժխտել ֆինանսների նախարարի կամ նախարարության հայտարարությունը: Ասեմ, որ չորրորդ անգամ նախարարությունը դատարանին խնդրում է, որ հետաձգվեն նիստերը: Եթե նայենք, բոլոր հանքարդյունաբերող ընկերությունները Հայաստանի մեջ աշխատում են ճիշտ նույն օրենքի սահմաններում, և նախարարը կամ նախարարությունը ինձ չի կարող համոզել, որ բոլոր հանքարդյունաբերող ընկերությունները սխալ են, և իրենք ճիշտ են:

- Ընկերությունը 2015-ի ընթացքում պետբյուջե է վճարել մոտ 3,4 միլիարդ դրամ հարկ:  2014-ին այդ գումարը կազմել էր 5,2 մլրդ դրամ: Ինչո՞վ է պայմանավորված գումարի այդքան մեծ տարբերությամբ նվազումը:

- Առաջին պատճառն այն է, որ 2014-ի համեմատ եկամուտը նվազել էր 2015-ին: Մի քանի միլիոն դոլարի նվազ եկամուտ ենք ունեցել, որովհետև մետաղի գներն ընկան:

Երկրորդ պատճառը կապված է վաճառքի հետ: Օրինակ, եթե մենք առաքումն անում ենք 2014-ի դեկտեմբեր ամսին, բայց մեր գնորդը ստանում է հունվար ամսին և վճարումը կատարում է հունվարին, մենք դրա համար ռոյալթիները, որ վճարում ենք կառավարությանը, վճարում ենք 2015-ի հունվար ամսվա մեջ կամ դրանից հետո: Այդ եկամուտի ռոյալթիները հաշվարկվում է մյուս տարվա վրա: Այդ տարբերությունն այդտեղից է գալիս:

- Բնապահպանության նախարարություն հայտ է ներկայացվել ընկերության կողմից Գեղանուշի պոչամբարի հյուսիսային պատնեշի ամրացման և դրենաժային համակարգի կառուցման վերաբերյալ: Հնչեցին մեկնաբանություններ, որ այս նախագծով ընկերությունը պարզապես փորձում է ավելացնել պոչամբարի ծավալները: Ներկայումս որքա՞ն է կազմում պոչամբարի ծավալը և եթե նախատեսվում է ավելացնել՝ որքանո՞վ:

- Այդտեղի հյուսիսային պատնեշի ամրապնդումը և ընդլայնումն ընդհանրապես տարբեր ծրագրեր են: Մեկը մյուսի հետ չի կարող կապ ունենալ,  մեր պոչամբարը մեր ներկայիս արտադրությամբ տասնյակ տարիներ մեզ բավարար է, և որևէ մեկը ընդլայնման կարոտ չէ: Մենք ընդհանուր մշակում ենք տարին 410-420 հազար տոննա հանքաքար, իսկ այդ պոչամբարը 15-16 տարվա կյանք ունի 600 հազար տոննա հանքաքար մշակելու տարեկան կտրվածքով: Այսինքն, 20 տարուց ավել ինքը տակավին կարող է մեզ ծառայի: Բայց և այնպես, մենք որոշել ենք այդ ներդրումն անել, այդ հյուսիսային պատնեշն ավելի ամրապնդել, պարզապես որովհետև պոչամբարը կառուցվել է 1950-ական թթ., բավականին մնացել է չգործածվող: 2008-ին վերակառուցվել է մեր կողմից, և կարծում եմ՝ ժամանակն է, որ մենք ամրակապենք այդ պատը և ավելի ապահով դարձնենք:

- Վերջերս Գեղանուշ համայնքում տեղի է ունեցել քննարկում, որը բավականին թեժ մթնոլորտում էր անցել: Բնակիչները ընկերությունից պահանջում են փոխհատուցում պոչամբարի պատճառած վնասների դիմաց: Դուք էլ Ձեր հերթին պահանջեցիք ապացույցներ, որ իրենց կրած վնասների պատճառը հենց պոչամբարն է: Ազդակիր համայնքի հետ այս կոնֆլիկտն, ըստ Ձեզ, ի՞նչպես պետք է լուծել:

- Նախ ասեմ, որ այդտեղ կոնֆլիկտ չկա: Այս ժողովուրդը տարիներով այդտեղ ապրել է, և ես 2011-ից համագործակցում եմ իրենց հետ ու այսպիսի ոչ մի բողոք չեմ ստացել: Եվ վերջին անգամ, որ համագյուղացիները բողոք են ներկայացրել ընկերություն, 2008 թվականին է եղել: Ճիշտ նույն ժամանակահատվածում այդ բողոքը հետ են վերցրել, և համայնքի ավագանին որոշում է կայացրել, որ պոչամբարը կարող է կառուցվել: Դրանից հետո ոչ մի բողոք չի եկել:

Ես հանդիպումը հրավիրեցի, որովհետև միշտ թափանցիկ ոճով աշխատել ենք այդ գյուղացիների հետ, շատ ենք օգնել այդ գյուղացիներին, և ես՝ անձամբ, շատ-շատ եմ օգնել այդ գյուղացիներին ամեն տեսակետով: Ես ուզում եմ, որ մարդիկ իմանան՝ եթե այդտեղ իսկապես հարց կա, մենք պատրաստակամ ենք այդ հարցին լուծում տալու, բայց այսօր որևէ միջազգային ստանդարտներով աշխատող ընկերություն մեղադրանք չպիտի ընդունի, եթե փաստ չկա:

Ես չեմ ասում, որ դուք փող ծախսեք և փաստեք, ես ասում եմ՝ դուք ինձ փաստեք՝ ձեր տարածքները որտեղ են, ես մասնագետ ուղարկեմ, և այդ մասնագետը թող վերլուծի, եթե այդտեղ իսկապես հարց կա, մենք կնստենք, կխոսենք: Բայց եթե կարծում եք, որ մի հատ նամակ ուղարկելով ինձ ես ձեզ պետք է փող բաժանեմ, այդպիսի բան հնարավոր չէ: Իսկ ՀԿ-ի ներկայացուցչի պահանջն այդ է, որ ես պարզապես հելնեմ և փոխհատուցեմ բոլորին: Այդպիսի բան գոյություն չունի և չի կարող ունենալ: Ես ասեմ, որ ստուգել եմ այդ տարածքների մի մասը: Սովետական միության փլուզումից հետո այս գյուղացիներին բավականին նոր տարածքներ են տրամադրվել գետից հեռու: Գետը շատ հեռու է գյուղից, և քանի որ այդ տարածքները հեռու են եղել գյուղից, Սովետական միության փլուզումից հետո նոր տարածքներ է տրամադրվել այդ գյուղացիներին գյուղին ավելի մոտ: Եվ այդ գետի ափի տարածքները, որ իրենք խոսում են, այդ ժամանակ իրենք թողել են արդեն, չեն վերամշակել, և հիմա ինձանից փոխհատուցում են ուզում այդ 20-25 տարի առաջ իրենց թողած տարածքների համար, որ ընդհանրապես պոչամբարի հետ կապ չունի: Իմ մոտ աշխատում են մարդիկ Գեղանուշից, որոնց զավակներն ապրում են Գեղանուշում, որոնց թոռնիկները գնում են Գեղանուշի դպրոցը: Ես անձամբ գնացի իրենց հետ հանդիպեցի, ասեցի՝ այսպիսի բան գոյություն ո՞ւնի: Ասեցին՝ պարոն Ջաբրայան, հեքիաթներ է, մենք էլ Գեղանուշում ենք ապրում, ոչ մի բան չկա այդտեղ, և ասեմ, որ ես` անձամբ, առաջարկել եմ, որ ես Գեղանուշում տուն վարձեմ, և ես գնամ Գեղանուշ ապրեմ որոշ ժամանակահատվածում, ես էլ տեսնեմ, ինչի մասին է բողոքը՝ առավոտվա հոտի մասին, կամ որ անձրև է գալիս, տարբեր գույներով է գալիս: Խնդիր չունեմ:

- Ընկերությունն ի՞նչ սոցիալական ներդրումներ է իրականացրել Գեղանուշ համայնքում: Առանձին գումար հատկացվո՞ւմ է գյուղապետարանին:

-Ծրագիր մշակեցինք՝ համագործակցությամբ գյուղապետարանի հետ, որ երեք տարվա կտրվածքով պաշտոնական 30 միլիոն ներդրում պետք է լինի: Երեք մեծ ծրագրեր համայնքի համար՝ ջրի խողովակաշարի սարքելը, մշակույթի պալատի սարքելը, ինչպես նաև ճանապարհի վերանորոգումը: Այդ ծրագիրը երեք տարվա ընթացքում իրականացրեցինք: Միաժամանակ բավականին մեծ օգնություն տրամադրեցինք գյուղացիների երեխաների ուսման վարձերի հետ կապված, բժշկության հետ կապված, դպրոցի հետ կապված: Եվ ինչպես հայտարարեցի հունվարի 22-ի մեր հանդիպմանը, դրանք շարունակվելու են: Որ նամակ են գրել, այնպես չի, որ ես ընդվզելու եմ և ասելու եմ՝ վերջ, մենք ներդրում չենք անելու: Չէ, ես այդ ժողովրդին բացարձակապես չեմ մեղադրում, մենք կշարունակենք մեր համագործակցությունը:

- 2015 թվականին ընկերության սոցիալական փաթեթը ինչքա՞ն է կազմել, և 2016-ին, հաշվի առնելով ճգնաժամը մետաղների միջազգային շուկայում, շարունակելո՞ւ եք սոցիալական ներդրումները:

- Հաստատ շարունակելու ենք սոցիալական ներդրումները: Եթե շատ ծախսեմ, կրճատում պետք է անեմ: Կրճատումն այսօր անհնարին բան է, որովհետև ժողովուրդն աշխատանքի կարիք ունի: Ընդհանուր մեր տարեկան սոցիալական փաթեթը կազմում է 500 հազար դոլար: Այդ մեկը հիմնարկի, իսկ ես նաև ունեմ անձնական հիմնադրամ, որը ղեկավարում ենք ես և կինս, և բավականին լուրջ գումարներ է տրամադրում քաղաքացիներին իրենց կարիքների համար, նամանավանդ ազատամարտիկների ընտանիքներին: Դրանք կշարունակվեն: 2015-ին նվազ ներդրում ենք արել, մոտավորապես 350 հազար դոլար, 400 հազարին մոտ: Կարծում եմ՝ 2016-ն էլ նույնը կլինի:

- Դուք ՀՅԴ-ի ներկայացուցիչ եք: Գիտենք, որ իշխող հանրապետական կուսակցությունը  կոալիցիա է ստեղծել ՀՅԴ-ի հետ: Ըստ Ձեզ, «Դանդի»-ի վրա դա ինչ-որ կերպ կարո՞ղ է անդրադառնալ: Լարվածությունը ձեր և իշխանական որոշ պաշտոնյաների, օրինակ, նույն Գագիկ Խաչատրյանի (ՀՀ ֆինանսների նախարար) միջև կարո՞ղ է թեթևանալ:

- Ընդհանրապես քաղաքական հարցերին չեմ ուզում խառնվել, բայց այսպես ասեմ՝ ինձ ընդհանրապես մարդու կուսակցական պատկանելիությունը չի հետաքրքրել: Ինձ կհետաքրքրե մարդու որակը և մոտեցումը: Ես լավագույն ընկերներ ունեմ, որ հանրապետական կուսակցության կպատկանին, և լավագույն ընկերներ, որ ՀՅԴ-ին, ընկերներ ունեմ, որ անկուսակցական են: Կարծում եմ, որ այդ մեկը որևէ ձևով կապ չունի աշխատանքի հետ, բայց անկախ մարդու կուսակցական պատկանելիության, եթե իսկապես նպատակը բարի է, և աշխատանքն ուղղված է երկրի բարելավման համար, ես գնահատում եմ, իսկ եթե աշխատանքն ուղղված է  անձնական շահերի համար և ոչ արդարացի, մեկ է, ես իրենց քննադատելու եմ և հարվածելու եմ՝ անկախ իրենց կուսակցական պատկանելիության:

Հարցազրույցը վարեց Մոնիկա Երիցյանը



19:15 Փետրվար 11, 2016


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news