ԷկոԼուր
Լոռու մարզի Արդվի համայնքի բնակիչները շարունակում են պայքարել Շեկաղբյուրի ոսկի-բազմամետաղային հանքերևակման տարածքում որոնողական աշխատանքների իրականացման դեմ: Նրանց բողոք-հայտարարությունը սեպտեմբերի 12-ին ՀՀ Ազգային ժողովում ընթերցեց «Ելք» խմբակցության պատգամավոր Մանե Թանդիլյանը:
«Արդվին սրբավայր է, և արդվեցիներն այդ սրբավայրն առ այսօր պահպանել են աչքի լույսի նման: Հայաստանի երեք սրբավայր-դամբարաններից մեկը հենց Արդվին է, որտեղ հանգչում է Հովհաննես Օձնեցի Իմաստասերը: Այս ամենից զատ, հետախուզման համար նախատեսված տարածքներից են սնվում արդվեցիները, որտեղ հավաքվում է խմելու ջուրը և որն անասնապահությամբ զբաղվող գյուղի համար նաև արոտավայր է: Այս ամենից գյուղին զրկելը, հանքարդյունաբերության հետևանքով առաջացած թափոններով ու վնասակար նյութերով աղտոտելը մաքուր օդն ու ողջ տարածաշրջանը, անթույլատրելի է: Դիմում ենք հանրային քննարկման առաջին փուլի պատասխանատուներին, տարածքային կառավարման մարմիններին` չեղյալ համարելու լսումների առաջին փուլը, քանի որ այս փուլից են բխում մնացած անօրինական քայլերը, որոնք են՝ հայտ ներկայացնել, լրամշակման ուղարկել նախկին հայտը և նոր լսումներ նշանակել: Այս ամենը կատարվում է անօրինական կերպով, քանի որ առաջին լսումները կեղծվել էին: Հանրային լսումների երկրորդ փուլին գյուղացիներն իրենց ասելիքը հայտնեցին բողոքի ակցիայի տեսքով՝ թույլ չտալով ընկերության ներկայացուցիչներին մուտք գործել, քանի որ ընկերությունը ի սկզբանե ամեն ինչ անում էր անօրեն կերպով:
Ընկերությունն ապօրինաբար քանդել և մի քանի մեքենա հումք է տեղափոխել այդ տարածքից, որի հետևանքները գյուղացիները ստիպված են եղել վերացնել սեփական նախաձեռնությամբ՝ էքսկավատորներով քանդվածը ձեռքով հարթեցնելու միջոցով: Դիմում ենք նախաձեռնողներին և նրանց հովանավորներին. բոլորիս է պարզ, որ կան հովանավորներ, այլապես ոչ մեկ չէր կարող ապօրինաբար քանդել, հումք տեղափոխել և մնալ անպատիժ: Այս ամենից ելնելով` Արդվու ավագանին մերժել է «Միռամ» ՍՊԸ-ին երկրաբանական ուսումնասիրություն իրականացնել Արդվու տարածքում: Պետք չէ հանուն փողի և կարճաժամկետ շահի գնալ սրբապղծության: Արդվեցիները դեմ են այս ամոթալի արարքին, որը խեղելու է մի ողջ գյուղի ճակատագիր», - արդվեցիների ձայնը բարձրացրեց Մանե Թանդիլյանը: Այնուհետև պատգամավորը հայտարարեց, որ ունի տեղեկատվություն Արդվիի բնակիչներին սպառնալու վերաբերյալ. «Արդվիի բնակիչներին որոշ խմբեր մոտենում և սկսում են համոզել ու սպառնալ, որ փոխեն իրենց տեսակետը: Օգտվելով այս առիթից հայտարարում եմ, որ եթե Արդվիի բնակիչների տեսակետը կենթարկվի փոփոխության, ես կհորդորեմ ոստիկանությանը համարել այս հայտարարությունը փաստարկված և սկսել հետաքննություն»:
Մանե Թանդիլյանի ելույթից հետո ՀՀ բնապահպանության նախարարության և ոստիկանության ներկայացուցիչներ սեպտեմբերի 13-ին ժամանեցին Արդվի և արդվեցիների հետ Շեկաղբյուրի հանդամասում դիտարկեցին հորատված տարածքը: Արդյունքում կազմվեց արձանագրություն, որի համաձայն հանդամասում առկա է 9 մ երկարությամբ և 0.5 մ լայնությամբ քանդված տարածք՝ 3 մ խորությամբ, որն առաջացել է 2017 թ-ի գարնանը: Ուսումնասիրության պահին տարածքում աշխատանքներ չէին իրականացվում, տեխնիկան բացակայել է:
Արդվեցիները վստահ են, որ փորվածքն արել է «Միռամ» ՍՊԸ-ն մինչև առաջին լսումները, և ապօրինի կերպով հանքանյութ է տեղափոխել նմուշառման համար: Արդվեցիները բնապահպանների աջակցությամբ հողով ծածկել են հանդամասի փոսը:
Ներկայումս Շեկաղբյուրի ոսկի-բազմամետաղների հանքերևակման նախնական գնահատման հայտը վերադարձվել է լրամշակման, և փորձաքննական գործընթացը դադարեցվել է մինչև լրամշակված հայտը ներկայացնելը:
«Մենք պնդում ենք, որ առաջին լսումները եղել են կեղծ, հետևաբար, իրենք իրավունք չունեին ոչ նախագիծ կազմելու, ոչ էլ հետո լրամշակման ուղարկելու: Եթե գյուղացիները չեն ուզում՝ ի՞նչ լրամշակում: Կանենք նույնը, ինչ առաջին անգամ, թույլ չենք տա և վերջ», - ասաց Արդիվիի Սուրեն Կիրակոսյանը:
Սեպտեմբեր 14, 2017 at 14:02