ԷկոԼուր
ՀՀ Վայոց ձորի մարզի Սարավան համայնքի հարակից տարածքում հատված ծառեր չեն հայտնաբերվել: Այս մասին ԷկոԼուրին տեղեկացրեցին ՀՀ բնապահպանության նախարարությունից:
Հիշեցնենք, որ ԷկոԼուրը մայիսի 16-ին ահազանգ էր ստացել, որ Սարավան գյուղի հարակից տարածքում՝ Դարբ գետի ափին, ծառեր են հատում: Քաղաքացին նկատել էր մոտ 20 հատված ծառ: «Հայանտառ» ՊՈԱԿ-ի գլխավոր անտառապետ Ռուբեն Պետրոսյանը ԷկոԼուրին տեղեկացրել է․ «Մեր աշխատակիցները ստուգեցին ահազանգը եւ պարզեցին, որ Սարավանի համայնքապետը տարածքը տրամադրել է ինչ-որ հանքարդյունաբերական ընկերության տնկարանի ստեղծման համար։ Թե ինչ ընկերություն է, նրանք չգիտեն, եւ հիմա զբաղված են տարածքի մաքրմամբ»։
Այս կապակցությամբ Սարավանի համայնքապետ Սիմոն Բաբայանը ԷկոԼուրին ասաց հետեւյալը. «Դա թյուրիմացություն է: Նման բան չկա: Ոչ մի ծառահատում չի եղել: Անցյալ տարի հրդեհից ծառեր էին չորացել, մի քանի ճյուղ են կտրել դեկորատիվ նպատակներով»: Ըստ գյուղապետի` տնկարան հիմնելու գաղափարը եղել է փոխհամաձայնեցմամբ: Սիմոն Բաբայանի խոսքով`տնկարանը աշխատատեղ կապահովի, ծառերը հետագայում կծառայեն համայնքի կանաչապատմանը: Վարձակալման հանձնված տարածքը կազմում է 1.200 հեկտար:
Տնկարան հիմնող հանքարդյունաբերական ընկերությունը «Գեոթիմ» ՓԲԸ-ն է՝ «Lydian International Limited» ընկերության դուստր ընկերությունը, որը պատարաստվում է շահագործել Ամուլսարի ոսկու հանքավայրը:
Մայիս 27, 2014 at 15:32