ԷկոԼուր
Վառ նարնջագույն հեղուկ ջրատարում՝ դա Արմանիսի հանքարդյունաբերական կոմբինատի արտանետումներն են: Ջրատարն անցնում է Ստեփանավանի՝ Արմանիս գյուղի ճանապարհի կողքով: Գյուղի տարածքում է գտնվում Արմանիսի ոսկու հանքավայրը, հարստացուցիչ կոմբինատը եւ պոչամբարը: Ոսկին արդյունահանում է «Սագամար» ընկերությունը՝ «Նեւա-Ռուս» ընկերության դուստր ձեռնարկությունը: «Նեւա-Ռուս» ընկերության ներդրումների տնօրեն, հայաստանյան ծրագրերի ղեկավար Կարեն Ղազարյանը, ձեռնարկության աշխատանքները Հայաստանի նախագահ Սերժ Սարգսյանին ներկայացնելով, վստահեցրեց, որ «Սագամար»-ն առաջին ձեռնարկությունն է, որն օգտագործում է կանադական եւ գերմանական տեխնոլոգիաներ,որոնք նվազագույնի են հասցնում շրջակա միջավայրի աղտոտումը:
Նայելով թափոններով աղտոտված Ձորագետին, ջրատարով հոսող անհայտ բաղադրությամբ հեղուկին, ճանապարհի երկարությամբ լցված լցակույտերին, կարելի է վստահությամբ ասել, որ գերմանական եւ կանադական ֆիրմաները կամ իրենց չեն արդարացրել, կամ նրանց փոխարինող է գտնվել:
Տեխնոլոգիայի որակի, գետի աղտոտման եւ առողջարանային Ստեփանավան քաղաքից 1-2 կմ հեռավորության վրա փոշու արտանետումների հարցերն արդեն 2 տարի անընդմեջ բարձրացնում է տեղական «Լոռե» էկոակումբ ՀԿ-ն: Սակայն ահազանգերին որեւէ պատշաճ արձագանք չկա: Սովորաբար արտանետումները լինում են հինգշաբթիից ուրբաթ` հանգստյան օրերից առաջ: Ակտիվիստներն անմիջապես զանգահարում են ՀՀ բնապահպանության նախարարության թեժ գիծ եւ խնդրում են տեսուչ ուղարկել: Ահազանգն ընդունում են, բայց բնապահպանական տեսչությունը չի գալիս: Նախարարությունից «ԷկոԼուր»-ին բացատրեցին, որ ահազանգերին տեսչությունը կարող է արձագանքել միայն նախարար Արամ Հարությունյանի հանձնարարությամբ: Ստացվում է, որ եթե նախարարն արձակուրդում է, կամ հանգստյան օրերին հանգստանում է եւ նախարարությունում չէ, ապա տեսչությունն անզոր է խախտողների դեմ: Ձեռնարկության ստուգումները կանցկացնեն 2012թ.:
Իսկ մինչ այդ գործողությունները ծրագրվում են, գետի կիրճում հանգստանում են տուրիստները: Նրանց երեխաները լողում են գետում` չկասկածելով, որ կիրճի վերջում ֆաբրիկան չափաբաժնով թույն է լցնում:
Լուսանկարը` Մանյա Մելիքջանյանի
Օգոստոս 14, 2012 at 13:18