ԷկոԼուր
ՀՀ Էներգետիկայի եւ բնական պաշարների նախարարությունը ընդերգօգտագործման ոլորտում մի շարք բացթողումներ է հայտնաբերել: Այս մասին օգոստոսի 8-ին լրագրողներին ասել է ՀՀ Էներգետիկայի եւ բնական պաշարների նախարար Երվանդ Զախարյանը: Ինչպես տեղեկացնում է նախարարության պաշտոնական կայքը, Երվանդ Զախարյանը նշել է, որ ընդերքօգտագործման ոլորտում կատարվել են առկա իրավիճակի ծավալուն ուսումնասիրություններ, որոնց արդյունքում, անհրաժեշտությունից ելնելով, նախապատրաստվել են «Ընդերքի մասին» ՀՀ օրենսգրքի և այլ նորմատիվ-իրավական ակտերում անհրաժեշտ փոփոխություններ:
«Նախկինում և առ այսօր Ընդերքի տրամադրման գործընթացում օգտվում էին պայմանական կոորդինատային համակարգից, որը հանգեցրել է ընդերքօգտագործման ոլորտում լուրջ խնդիրների և անհամապատասխանությունների:
Դրանց շտկման նպատակով ՀՀ տարածքի 1:10000 տոպոգրաֆիական և կադաստրային քարտեզների էլեկտրոնային տարբերակները ներկայումս համադրվում են՝ ընդերքօգտագործողներին կոորդինատները համաշխարհային աշխարհագրական կոորդինատային համակարգով տրամադրելու նպատակով:
Իրականացված ուսումնասիրությունների արդյունքում ոլորտում բացահայտվել են մի շարք թերություններ և բացթողումներ, թե երկրաբանական հետազոտություններ իրականացնող ընկերությունների մոտ, թե օգտակար հանածոներ արդյունահանող ընկերությունների մոտ: Նախարարի խոսքով իրավիճակի շտկման համար անհրաժեշտ է անպայման ստուգել և չափագրել բոլոր ընդերքօգտագործողների կողմից կատարվող աշխատանքները:
Ներկայումս նախատեսվում է պատրաստել աշխատանքային ծրագիր, այդ թվում նաև՝ աշխատանքների հաշվառման և կառավարման ավտոմատ համակարգի ներդման, ընդերքի ոլորտի կառավարման համակարգի և կադրային հարցերի վերանայմամբ:
Նախատեսվում է նաև իրականացնել «Հանրապետական երկրաբանական ֆոնդ» ՊՈԱԿ-ում առկա ֆոնդային նյութերն ամբողջությամբ թվայնացնելու և ինտերնետային կայքում տեղադրելու գործընթաց՝ այդ նյութը լայն հասարակայնության համար առավել հասանելի դարձնելու նպատակով»,- գրված է կայքում:
Օգոստոս 29, 2014 at 16:44