ՀԲՃ-ն դատի կտա բնապահպանության նախարարությանը, եթե վերջինս անցկացնի Մեղրասարի հանքավայրի շահագործման նախագիծը

ԷկոԼուր

Հոկտեմբերի 28-ին տեղի ունեցան «ԱՏ Մետալս» ՍՊԸ-ի կողմից բնապահպանական փորձաքննության ներկայացված ՀՀ Սյունիքի մարզի Մեղրասարի ոսկու արդյունահանման աշխատանքային նախագծի վերաբերյալ լիազորված անձի մասնագիտական եզրակացության, հասարակական և ազդակիր համայնքի ղեկավարի կարծիքների հասարակական լսումները:

Լսումներին ներկա էին ՀՀ ԲՆ «Բնապահպանական փորձաքննություն» ՊՈԱԿ-ի գլխավոր փորձագետ Կարինե Մովսիսյանը, ՀՀ ԲՆ Կենսառեսուրսների կառավարման գործակալության բնության հատուկ պահպանվող տարածքների կառավարման բաժնի պետ Արամ Աղասյանը, «ԱՏ-Մետալս» ընկերության տեխնիկական բաժնի պետ Հարություն Հովհաննիսյանը, «Ակունք-ֆիրմա» ՍՊԸ-ի տնօրեն Հովհաննես Նիկողոսյանը, Համահայկական բնապահպանական ճակատի անդամ Լևոն Գալստյանը, էկոԼուրի լրագրող Մոնիկա Երիցյանը:

Լսումների ողջ ընթացքը ներկայացնում ենք ստորև.

Կարինե Մովսիսյան.

- Համապատասխան փաստաթղթերը գրանցվելուց հետո սկսվել է բնապահպանական փորձաքննության գործընթացը՝ համաձայն «Շրջակա միջավայրի վրա ազդեցության փորձաքննության մասին» հին օրենքի, քանի որ նոր օրենքը ուժի մեջ է մտել օգոստոսի 11-ից, իսկ համապատասխան փաստաթղթերը մեզ մոտ մուտք են եղել հունիս ամսվանից:

Լևոն Գալստյան.

- Հին օրենքի 6-րդ հոդվածը ասում է, որ նախատեսվող գործունեության իրականացման ծանուցման կարգը պահանջում է, որ պետք է ծանուցումից հետո 15 օրյա ժամկետում կազմակերպել հասարակական լսումներ: Այդ լսումները կազմակերպվե՞լ են:

Կարինե Մովսիսյան.

- Քանի որ այս օրենքն ունեցել է շատ մեծ թերություններ, որից մեկը եղել է նաև այդ 6-րդ կետի անկատար լինելը, ըստ ծանուցման փուլի, վերջնական հաշվով ոչ մի եզրահանգում կամ ոչ մի աշխատանք կատարվելիք ծանուցումից հետո չի նախատեսվում: Այսինքն, եթե մենք սկսում ենք ծանուցման փուլից, մենք չգիտենք, այդ ծանուցման վերջում ինչ պետք է առաջարկվի կամ ներկայացվի համապատասխան պատվիրատուին: Դրա համար շատ ժամանակ՝ կախված մեր գործընթացի տրադիցիա դարձած ընթացքից, ծանուցման փուլը ինչ-որ տեղ հետ է գնացել: Սկսվել է հիմնական փորձաքննության փուլից:

Լևոն Գալստյան.

- Ուրեմն մենք խախտում ենք «Շրջակա միջավայրի վրա ազդցության փորձաքննության մասին» ՀՀ օրենքի 6-րդ հոդվածի 4-րդ կետը, որտեղ պարզ գրված է, որ ծանուցումը ստանալուց հետո 15 օրյա ժամկետում պետք է կազմակերպել հասարակական լսումներ: Հիմա տրադիցիայով է, թե ինչով է, դուք խախտել եք օրենքի այդ կետը, նախաձեռնողի և համայնքի ղեկավարի հետ միասին, այսինքն, հոդված 6-ի պահանջները չեն կատարվել, դուք կատարել եք միայն հոդված 8-ի պահանջները:

Կարինե Մովսիսյան.

- Այո, սկսել ենք հոդված 8-ից:

Լևոն Գալստյան.

- Ինչո՞ւ եք խախտել օրենքը, դուք չէ, նախաձեռնողը և համայնքի ղեկավարը:

Կարինե Մովսիսյան.

- Եթե դուք հարցը ուղղում եք ինձ…

Լևոն Գալստյան.

- Ձեզ չի վերաբերվում: Քանի որ ես լսումներին մասնակցել եմ, եղել է ընդամենը մեկ լսում: Ես գտնում եմ, որ այս հանրային լսումները նույնպես օրենքի խախտում են, որովհետև, 6-րդ հոդվածի պահանջը չկատարելով, միանգամից դուք անցել եք 8-րդ հոդվածին: Մենք երբ եկել էինք Տաշտուն համայնք լսումների, ենթադրում էինք, որ 6-րդ հոդվածի համաձայն եկել էինք լսումների, որովհետև օրենքը դա է պահանջում: Հետո, 8-րդ հոդվածը դուք չեք կատարել, 8-րդ հոդվածից թռել եք:

Կարինե Մովսիսյան.

- 8-րդ հոդվածը կատարել ենք, մի րոպե…

Լևոն Գալստյան.

- Ես ասում եմ իմ կարծիքը, կներեք, դուք շատ բան կարող եք ասել, դուք մի պատասխանեք, որովհետև ձեր պարտավորությունը չէ, պարտավորությունը նախաձեռնողինն է և համայնքի ղեկավարինը: Օրենքում հստակ գրված է, որ առաջինը 6-րդ հոդվածն է, պետք է կատարվեն լսումներ, չեն կատարվել, 8-րդ հոդվածում նորից ասում է, որ պետք է կատարվեն լսումներ, որը չի իրականացվել, հիմա մենք միանգամից անցել ենք մասնագիտական լսումներին, այսինքն, այս լսումները նորից մենք կատարում ենք օրենքի խախտումով, դրա համար, որպես նախարարության ներկայացուցիչ ձեզ դիմում եմ՝ դուք գտնում եք, որ մենք շարունակե՞նք օրենքը խախտել, հա՞: Եթե գտնում եք շարունակենք՝ մենք էլ մասնակից դառնանք այդ օրենքի խախտման գործընթացին: Եկեք դառնանք, բոլորս միասին:

Արամ Աղասյան.

- Այսինքն, այսօրվա լսումները արդեն խախտո՞ւմ է:

Լևոն Գալստյան.

- Այո, քանի որ 2 լսում պետք է անցկացվեր մինչև այս լսումները սկսվելը: Ամեն անգամ այս հանքարդյունաբերական ծրագրերի ժամանակ այս նույն լոգիկայով անցկացնում եք, մենք ամեն անգամ ասում ենք, նախարարությունը մեր վրայից սղցնելով անցկացնում է, ասում է՝ մի լսում ենք անում:

Կարինե Մովսիսյան.

- Մի րոպե…

Լևոն Գալստյան.

- Չէ, մի րոպե չի, արդեն էս լուրջ հարցա: Եթե մենք օրենքով ենք խոսում, ուրեմն օրենքով ենք խոսում: Եթե այս լսումները օրենքով է, ուրեմն եկեք դուք /Կարինե Մովսիսյանին/ տակը ստորագրեք, որ այս լսումները օրենքով է: Հենց հիմա ստորագրեք որպես փորձագետ և շարունակեք այս լսումները:

Կարինե Մովսիսյան.

- Ես որպես 10-րդ հոդվածի կատարում…

Լևոն Գալստյան.

- Ես բողոք եմ ներկայացնում, որովհետև դուք խախտել եք օրենքը:

Կարինե Մովսիսյան.

- Ձեր բողոքը ասեք, գրանցեք:

Լևոն Գալստյան.

- Ո՞նց գրանցեք /զարմացած/:

Կարինե Մովսիսյան.

- Բա ո՞նց անենք: Դուք հիմա ինձ ինչո՞ւմ եք մեղադրում:

Լևոն Գալստյան.

- Ես ձեզ չեմ մեղադրում: Փաստորեն խախտել են այս մարդիկ օրենքը, նախարարությունը ոչ մի քայլ չի ձեռնարկել, հիմա եկել եք մասնագիտական լսումներ եք անցկացնում, ինչի՞ համար: Դուք չեք նկատել, որ օրենքը խախտվել է:

Կարինե Մովսիսյան.

- Հա, մի գուցե կատարվել է հին օրենքի սահմաններով, որ գնում ես, հոդվածներով գալիս, հասնում ենք 6-րդ հոդվածին՝ այո, եթե արել ենք, լավ, լսումներ արեցինք, ի՞նչ պիտի անենք այս լսումներից հետո:

Լևոն Գալստյան.

- Ինձ չի հետաքրքրում՝ ինչ պիտի անեք: Ես կարդում եմ օրենքի հոդվածները, գրված է՝ 6-րդ հոդվածով պետք է անցկացվեն լսումներ, հետո 8-րդ հոդվածով: Դուք արել եք մեկ լսում ընդամենը, խախտել եք օրենքը, վերջ, դրա համար այս լսումները հիմա օրենքի խախտում է նորից:

Արամ Աղասյան.

- Ըստ օրենքի 3 լսում պետք է լինի, այստեղ մեկն է արվել, մեկն էլ…

Լևոն Գալստյան.

- Այո:

Կարինե Մովսիսյան.

- Քանի որ փաստաթղթերը վերցվել է հիմնական փուլի համար, ծանուցման փուլը շրջանցվել է: Ես գործընթացը սկսել եմ հիմնական փուլից սկսած, ծանուցման փուլ չեն եկել ներկայացրել:

Լևոն Գալստյան.

- Բա ինչի՞ եք վերցրել թղթերը:

Կարինե Մովսիսյան. Ես հիմա ո՞նց ասեմ՝ ինչի ենք վերցրել:

Լևոն Գալստյան.

- Չվերցնեիք:

Կարինե Մովսիսյան. 

- Քանի որ մակագրվել է իմ վրա, ես էլ գործը ընդունել եմ:

Լևոն Գալստյան.

- Դե ուրեմն մակագրողին կանչեք, թող գա, պատասխան տա, կամ դիմենք դատարան, թող պատասխան տան՝ ինչի են օրենքները խախտել: 

Կարինե Մովսիսյան.

- Խնդրեմ, դիմեք դատարան:

Լևոն Գալստյան.

- Բա հիմա ի՞նչ ենք քննարկում: Դուք օրենքի խախտում եք անում հիմա, այ դուք, հիմա: Փաստորեն իրենք խախտել են, դուք իրենց օրենքի խախտումը պաշտպանում եք, ուզում եք` շարունակեք: Ես կտրականապես դեմ եմ այս լսումների անցկացմանը, եթե դուք ուզում եք շարունակել՝ շարունակեք, բայց մենք դատի կտանք, ես ձեզ գարանտիա եմ տալիս:

Կարինե Մովսիսյան.

- Դատի տվեք:

Լևոն Գալստյան.

- Ձեզ դատի չենք տա, դատի կտանք նախաձեռնողին, որ ինքը օրենքը խախտել է, նախարարությանը, որ ինքը օրենքի խախտման վրա աչք է փակել:

Կարինե Մովսիսյան.

- Թող տան դատարան, այս իրավիճակից ես ելք չեմ գտնում:

Լևոն Գալստյան.

-Եկեք հասկանանք, հա, արդեն 5-րդ անգամ այս նույն պատմությունը տարբեր նախագծերում կրկնվում է:

Կարինե Մովսիսյան.

- Դուք հիմա նշեք մի դեպք, որ ծանուցման փուլով է գնացել, ընդհանրապես գործընթացը ծանուցման փուլով չի գնացել:

Լևոն Գալստյան.

- Մենք արդեն 5-րդ անգամ այս հարցը բարձրացնում ենք: Մենք հետևողական չենք լինում ամեն անգամ, նախարարությունն էլ ամեն անգամ 2 լսումով անցկացնում է և գնում է առաջ: Նախարարության մեղքի բաժինն այն է, որ ինքը չի պաշտպանում օրենքի կետը /ընթերցում է օրենքը/: Հիմա, եթե այս ամեն ինչը չի կատարվել, ո՞նց ենք մենք անցել 8-րդ հոդվածին: Այստեղ լիքը բան է գրված, որ պետք  է արվեր մինչև 8-րդ հոդվածին անցնելը, ճի՞շտ է: Նախաձեռնողը կարո՞ղ էր կարդալ օրենքի այդ կետը: Չի կարդացել, ձեր ասելով բերել, 8-րդ հոդվածից է սկսել: Բա դուք ինչի՞ համար եք նախարարությունում, որ իրեն վերցրել եք առանց 6-րդ հոդվածի պահանջը կատարելու: Իմ հարցը միայն դա է: Այս լսումները օրենքից դուրս լսումներ են, շարունակեք օրենքի խախտում, խնդրեմ, եթե շարունակեք, մենք ուրեմն դուրս ենք գալիս և գնում ենք դատարան այդ դեպքում: Խնդրեմ, կարող եք շարունակել:

Կարինե Մովսիսյան.

- Ոնց ուզեք, ձեր իրավունքն է:

Լևոն Գալստյան.

- Չէ, թող որոշեն, ով է կազմակերպիչը այս լսումների, ինքն էլ պիտի որոշի:

Հարություն Հովհաննիսյան.

- Լսումները շարունակում ենք, ամեն մարդ…

Լևոն Գալստյան.

- Դուք չեք որոշողը, այս անգամ նախարարությունն է որոշող, որովհետև նախարարության մասնագիտական լսումներն են, լսումներն այս անգամ ձեռնարկում է նախարարությունը, ոչ թե դուք:

Կարինե Մովսիսյան.

- Հիմա ես ասեմ: Քանի որ գործընթացը ինձ ներկայացվել է և տրվել է հիմնական փուլով անցնելուց, ես սկսել եմ իմ հիմնական փուլի գործընթացը և այսօր հասել եմ մասնագիտական եզրակացության հասարակական լսումների կետին: Եթե դա ձեզ չի բավարարում, ես ուրիշ ոչինչ չեմ կարող ասել:

Լևոն Գալստյան.

-Մեզ չի բավարարումը ո՞րն է, այսինքն:

Կարինե Մովսիսյան.

- Այսինք դուք գտնում եք…

Լևոն Գալստյան.

- Չեմ գտնում, ես ասում եմ, որ օրենքի կետը դուք չեք պաշտպանել, այդտեղ գտնելու հարց չկա:

Կարինե Մովսիսյան.

- Բա ինչ բառ օգտագործեմ:

Լևոն Գալստյան.

-Դուք խախտել եք օրենքը, նորից եմ կրկնում, ուզում եք խախտումով շարունակեք, հիմա անցկացնեք մասնագիտական լսումներ, անցկացրեք, խնդիր չկա, դրա համար մենք դուրս ենք գալիս, դիմում ենք դատարան այդ դեպքում, որովհետև մեր և հանրության իրավունքները խախտվել են տվյալ օրենքի իրագործման փուլում, իսկ մնացած լսումները ինձ հետաքրքիր չի իրականում:

Կարինե Մովսիսյան. Դե, որ եթե հետաքրքիր չի…

Լևոն Գալստյան.

- Այս ձևի լսումները իրականում հետաքրքիր չէ:

Կարինե Մովսիսյան.

- Ես չեմ կարող ձեզ ստիպել, որ ներկա գտնվեք:

Լևոն Գալստյան.

- Գիտեմ, որ չեք կարող, բայց դուք օրենք եք խախտում, ասեմ ձեզ, ձեզ ինչ են տվել, ինչ հանձնարարական են տվել՝ դա ոչ մեկի չի հետաքրքրում, որովհետև հանձնարարականը պետք է տրված լինի օրենքին համապատասխան, իսկ այդ հանքավայրն էլ գտնվում է «Արևիկ» ազգային պարկի տարածքում և իր բուֆերային գոտում…դա էլ իմացեք և բավական է, այստեղ էլ ուրիշ խոսելու թեմա չկա ընդհանրապես, իսկ այն, որ նախագծում ոչ մի ռիսկ գնահատված չէ՝ դա էլ անցյալ անգամ ասել ենք, այնպես որ կարող եք անցկացնել ձեր մասնագիտական լսումները, բայց մենք կդիմենք դատարան:

Կարինե Մովսիսյան. Խնդրեմ:

Համահայկական բնապահպանական ճակատի ներկայացուցիչները լքեցին լսումների դահլիճը, իսկ լսումները շարունակվեցին:

Կարինե Մովսիսյան.

- Փորձաքննական գործընթացում օրենքով սահմանված կարգով գործընթացը իրականացնելու համար համապատասխան նախագծային փաստաթղթերը ներկայացվել են նախարարության համապատասխան ստորաբաժանումներին և ստացվել են համապատասխան կարծիքներ: Բացի դրանից, օրենքի սահմաններում հրավիրվել է համապատասխան մասնագետը՝ անկախ փորձագետը, ով իր մասնագիտական եզրակացությունն է  տվել համապատասխան նախագծային փաստաթղթերին: Առաջին փուլի աշխատանքների ավարտից հետո ի հայտ են եկել առաջարկություններ և դիտողություններ, նամակ է գրվել համապատասխան կազմակերպությանը, որպեսզի նախագծային փաստաթղթերում ամրագրվի և լրամշակվի վերհանված առաջարկությունները և դիտողությունները: Կատարած լրամշակումներից հետո նյութերը տրամադրվել են մեր անկախ փորձագետին, և նա համարել է լրամշակումը ընդունելի և ներկայացրել է իր համապատասխան կարծիքը: Ինչ վերաբերում է հանքավայրի՝ «Արևիկ» ազգային պարկի տարածքում գտնվելուն և չգտնվելուն, քանի որ այդ գործընթացը կատարվում է լիազոր մարմնի համապատասխան գործակալության կողմից, մենք այս քննարկումների ժամանակ ապահովել ենք ներկայացուցչին, որպեսզի համապատասխան պարզաբանումներ և լրացումներ արվեն:

Արամ Աղասյան.

-«Արևիկ» ազգային պարկը ստեղծվել է կառավարության որոշմամբ: Որոշման 3-րդ հավելվածով հաստատվել են «Արևիկ» ազգային պարկի առաջարկվող սահմանները: Նույն որոշման 7-րդ կետի 3-րդ ենթակետով հանձնարարական կար, որպեսզի իրականացվեր 2010 թ-ի ընթացքում սահմանների նկարագիր, սահմանների ճշգրտման աշխատանքները, այդ թվում նաև ազգային պարկի գոտևորման սխեման: Այսինքն, այս պահի դրությամբ «Արևիկ» ազգային պարկը հաստատված սահմաններ և գոտևորման սխեմա չունի և սահմանների նկարագիր չունի: Մենք մեր գրության մեջ նշեցինք, որ ներկայացված նախագիծը մասամբ գտնվում է «Արևիկ» ազգային պարկի առաջարկվող սահմանների մեջ, բայց հստակ ասել, որ սահմանների նկարագրի ժամանակ սա կարող է ընդգրկվի մեջը, թե ոչ, մենք այսօր չենք կարող, որովհետև սահմանների նկարագիրը և քարտեզագրման աշխատանքները իրենց մեջ պարունակում են բավականին լուրջ աշխատանքներ, բուսական և կենդանական աշխարհի ուսումնասիրության աշխատանքներ, որտեղ պետք է հստակ երևա տվյալ տարածքի բնապահպանական արժեքը:

ԷկոԼուր.

-WWF-ի քարտեզի վերաբերյալ ի՞նչ կասեք:

Արամ Աղասյան.

- Այստեղ բավականին սխալներ կան այն իմաստով, որ WWF-ը հիմք է ընդունել ընդամենը ուսումնասիրվող տարածքի սահմանները, և այն, որ WWF-ը ասում է, որ 60 տոկոսը ներառված է մեջը՝ ես ձեզ կարող եմ ցույց տալ այս մյուս քարտեզը, որտեղ 25-30 տոկոսի չափով է…

ԷկոԼուր.

-Ի՞նչ քարտեզ է դա:

Արամ Աղասյան.

- Սա մենք օգտվել ենք Գեոդեզիայի և քարտեզագրության ինստիտուտի աշխատակիցների տրամադրած…կորդինատները ներկայացրել ենք իրենց, իրենք մեզ օգնել են, այդ կորդինատային կետերը տեղադրվել են և…նույն հարցը կարող եմ տալ, բա էս WWF-ի քարտեզն է, օդի մեջ ասում ենք, էս էլ մեր կողմից ներկայացված քարտեզն է:

Հարություն Հովհաննիսյան.

- Քանի որ գոտիավորումը կատարված չէ, և դուք անձամբ եղել եք մեր տարածքում, դուք կարո՞ղ եք ասել, գոտիավորման ժամանակ մեր տարածքը ո՞ր գոտու մեջ կարող է ընկնել:

Արամ Աղասյան.

- Ես չեմ կարող բացառել, որ սա ընկնի նույն տնտեսական գոտու տարածքում: Սա Հայաստանում ամենաբարձր կետն է ճանապարհաշինության մեջ և 2535 մ անցումային կետից բարձր կարող է լինել: Այսինքն, դա գտնվում է անտառազուրկ տարածքում: Եթե հանքը շահագործողը ի սկզբանե կատարում է հանքի ուսումնասիրության աշխատանքներ, պարզ է, որ վերցնում է ավելի մեծ տարածք, քան հետո, որ նախագիծ է անում: Հիմա մեր դեպքում, նախքան սահմանների ճշգրտումը, քարտեզագրման աշխատանքները՝ մենք վերցնում ենք մաքսիմալ ավելի շատ տարածք, որպեսզի հետագայում այդ շրջանակներում կատարվեն բույսերի, կենդանիների և այլնի ուսումնասիրություններ:

ԷկոԼուր.

- Եթե սահմանները հաստատվեն և հանքավայրի տարածքը ընկնի «Արևիկ» ազգային պարկի տարածքի մեջ, որտեղ բազմաթիվ Կարմիր գրքում գրանցված տեսակներ կան, ի՞նչ պետք է արվի այդ դեպքում:

Արամ Աղասյան.

- Նայած ինչ գործունեություն ենք տվյալ դեպքում կատարում, սա արգելոց չի:

Հարություն Հովհաննիսյան.

- Ազգային պարկի տնտեսական գոտում անգամ թույլատրվում է հանքային տնտեսության ձևավորում, միայն չպետք է կատարվեն պայթեցման աշխատանքներ:

Արամ Աղասյան.

-Եթե չի նախատեսում պայթեցման աշխատանք, ուրեմն կարելի է:

ԷկոԼուր.

- Ձեր աշխատանքները տարվելու են ամենօրյա պայթեցման աշխատանքներով 9 բալանոց սեյսմիկ գոտում:

Արամ Աղասյան. Փորձաքնքությունը հենց դրա համար է: Այսօր ներկայացված է նախագիծ: Նույն փորձաքննությունը, կարող է որոշակի փոփոխություններ արվի նույն նախագծի մեջ: Ես չէի ուզի, որ դա լիներ «Արևիկ» ազգային պարկի մեջ, բայց եթե նույնիսկ լինելու դեպքում էլ փորձաքննությունը միանշանակ օրենքի տառով պետք է ասի, որ պետք է բացառվեն պայթեցման որևիցե մի աշխատանք:

Մասնակից.

- Նախագծողը առաջարկում է 2 տարբերակ՝ և պայթեցումով և առանց պայթեցման:

ԷկոԼուր.

- Նախագծում հստակ նշված է, որ պայթեցման աշխատանքներով է իրականացվելու, և եթե այդ նախպագիծն անցնի, կիրականացվի այնպես, ինչպես գրված է նախագծում:

Արամ Աղասյան.

- Նախագիծը կարող է անցնել միայն մեկ դեպքում, եթե դիտողությունները, փոփոխությունները ներառվեն այդ նախագծում:

ԷկոԼուր.  

- Հանքավայրը գտնվում է 9 բալանոց սեյսմիկ գոտում:

Մասնակից.

- Դրանից 1 կմ 800 մ այն կողմ Քաջարանի կոմբինատն է այդ նույն բալանոց տարածքում աշխատում: 100 տարի է, աշխատում է և աշխատում է: Նախագիծն անցել է փորձաքննություն և ստացել է դրական կարծիք՝ ՀՀ ԱԻՆ «Տեխնիկական անվտանգության ազգային կենտրոն» ՊՈԱԿ-ի կողմից:

ԷկոԼուր.

- Երկրաշարժի դեպքում անվտանգության ինչ միջոցառումներ են նախատեսված:

Մասնակից. Այսինքն դտ սարի գլխին ո՞ւմ անվտանգությունը ապահովենք:

ԷկոԼուր.

- Այսինքն, եթե սարի գլխին է, դուք կարծում եք…խնդրում եմ պատասխանեք իմ հարցին, հարցին հարցով մի պատասխանեք:

Հովհաննես Նիկողոսյան. Նախագծում կա գրված, որ խմբեր պետք է լինեն, ահազանգից հասնեն, ԱԻՆ-ը մոտիկանա, պաժարնին պիտի մոտիկանա, մարզպետարան պիտի հաղորդվի, բոլորը գրված է, իսկ ինչ վերաբերում է սցենարներին, սցենարները անում է ԱԻՆ-ը և հաստատում է:

ԷկոԼուր.

-Ի՞սկ ուրանի առկայության մասին:

Հարություն Հովհաննիսյան. Մեզ մոտ ուրանի քանակությունը մինիմումից մինիմում է: 2 տարի առաջ նորից նման ահազանգեր եկան, որ ռադիոակտիվ մեծ ֆոն կա…նման կիսատ ինֆորմացիաները ես միշտ համարել եմ տեռորիզմ ժողովրդի հանդեպ, երբ դու ինֆորմացիան տալիս ես և չես բացատրում՝ դա զենք է արդեն: Մենք խնդրեցինք ԱԻՆ-ին, գան, ստուգեն:

ԷկոԼուր.

Ե՞րբ է ԱԻՆ-ը ձեզ մոտ չափումներ իրականացրել:

Հարություն Հովհաննիսյան.

- 2013 թ-ի հունիս կամ հուլիս ամիսներին:

ԷկոԼուր.

- Փաստաթուղթը ձեզ մո՞տ է հիմա:

Հարություն Հովհաննիսյան.

-Հիմա մեզ մոտ չի, էդ փաստաթուղթը փորձաքննությունում է:

Փաստաթուղթը առկա չէր նաև ՀՀ բնապահպանության նախարարության փորձագետի մոտ:

Հովհաննես Նիկողոսյան.

- Մենք ձեր ներկայությամբ կարող ենք գալ և չափումներ անել:

ԷկոԼուր.

- Փոշու մեջ ի՞նչ տոքսիկ նյութեր եւ ծանր մետաղներ կան:

Հովհաննես Նիկողոսյան. Մենք երկու տեսակի փոշի ունենք՝ հանքաքարի փոշին և խտանյութի փոշին: Հանքաքարի փոշին այն նույն փոշին է, որը ամեն օր ճանապարհից դուրս է գալիս:

ԷկոԼուր.

- Նախագծում ինչո՞ւ չկա նշված փոշու մեջ տոքսիկ նյութերի և ծանր մետաղների պարունակությունը:

Հովհաննես Նիկողոսյան.

- Որովհետև դա չի պարզվում, այսինքն, եթե դուք նոր՝ «ՄԹՆՈԼՈՐՏԱՅԻՆ ՕԴԻ ՊԱՀՊԱՆՈՒԹՅԱՆ ՄԱՍԻՆ» ՀՀ ՕՐԵՆՔԸ հանեք, այդտեղ փոշին դիֆերենցվում է, և պետք է փոշու մեջ առանձին ամեն նյութի համար վճարվի: Մենք կհաշվենք, բայց մենք ոչ նման հաշվարկ ունենք օրենքում, ոչ էլ նման նորմատիվ ունենք:

ԷկոԼուր.

- Մեղրի գետի վրա ի՞նչ ազդեցություն կունենա հանքավայրի շահագործումը:

Հովհաննես Նիկողոսյան.

- Իրենք նախագծով ոչ մի արտահոսք դեպի Մեղրի գետը պետք է չունենան, իրենց մոտ շրջանառու համակարգ է:

ԷկոԼուր.

- Իսկ բուսական կենդանական աշխարհի վրա ազդեցություն ռիսկերը:

Հովհաննես Նիկողոսյան.

- Բուսական և կենդանական աշխարհի վրա ազդեցությունը հաշված է, նաև հողի և մարդու առողջության վրա, և նախագծում տրված են բոլոր կետերը:

ԷկոԼուրը՝ Կարինե Մովսիսյանին.

- Պարոն Գալստյանի կողմից նշված…

Կարինե Մովսիսյան. Պարոն Գալստյանի կողմից վեր բարձրացվածը՝ օրենքի սահմաններում, համապատասխան ՀՀ օրենսդրությամբ սահմանված կարգով դիտարկվում է մյուս ատյաններում: Հիմա ես իրեն որևիցե վերջնական պատասխան ասել չեմ կարող:

ԷկոԼուր.

-Բայց դուք համարում եք, որ…

Կարինե Մովսիսյան.

- Եկեք ինձանից խոսք մի քաշեք…համարում եք, չեք համարում: Ես ասում եմ՝ ՀՀ օրենսդրությամբ սահմանված կարգով, ամեն մեկը իրա գործով:

ԷկոԼուր.

- Ես ընդամենը հարցնում եմ՝ դուք համարո՞ւմ եք, որ լսումները անցկացվեցին, օրինակա՞ն եք համարում այս լսումները:

Կարինե Մովսիսյան.

- Էլի նորից նույն հարցն եք տալիս…պարոն Գալստյանը ինչո՞ւ դուրս եկավ այստեղից:

ԷկոԼուր.

- Որ գնա դատարան, որովհետև այս լսումները համարում է անօրինական: Հիմա դուք ո՞նց եք համարում:

Կարինե Մովսիսյան. Ես չեմ մեկնաբանում:

ԷկոԼուրի հետ զրույցում Համահայկական բնապահպանական ճակատի անդամ Լևոն Գալստյանը նշեց, որ ՀԲՃ-ն դատի կտա բնապահպանության նախարարությանը, եթե վերջինս անցկացնի Մեղրասարի հանքավայրի շահագործման նախագիծը:

Մանրամասները՝ տեսանյութում:

Հոկտեմբեր 29, 2014 at 15:42