Սեւանա լճի պահպանության փորձագիտական հանձնաժողովը բացասական եզրակացություն տվեց Ամուլսարի նախագծին, իսկ նախարարությունը հավանության արժանացրեց նախագիծը

Սեւանա լճի պահպանության փորձագիտական հանձնաժողովը բացասական եզրակացություն տվեց Ամուլսարի նախագծին, իսկ նախարարությունը հավանության արժանացրեց նախագիծը

ԷկոԼուր

ՀՀ ԳԱԱ-ին առընթեր Սեւանա լճի պահպանության փորձագիտական հանձնաժողովը բացասական եզրակացություն տվեց Ամուլսարի ոսկու քվարցիտների հանքավայրի բաց եղանակով շահագործման նախագծին: Չնայած դրան ՀՀ բնապահպանության նախարարությունը դրական եզրակացություն տվեց նախագծին:  Նախագիծը ներկայացվեց «Գեոթիմ» ընկերության կողմից 2012թ. հուլիսի 30-ի հասարակական լսումների ժամանակ:

«ԷկոԼուր»-ի հարցմանն ի պատասխան Սեւանա լճի պահպանության փորձագիտական հանձնաժողովի ուղարկած հանձնաժողովի նախագահ Վլադիմիր Մովսիսյանի ստորագրությամբ նամակում  (թիվ Е/18/2012 , 09.08.2012թ.) նշված է.

«ՀՀ ԳԱԱ Սեւանա լճի պահպանության փորձագիտական հանձնաժողովը քննության է առել «Գեոթիմ» ՓԲԸ «ՀՀ Վայոց Ձորի եւ Սյունիքի մարզերի սահմանագլխին գտնվող Ամուլսարի ոսկեբեր քվարցիտների հանքավայրի շահագործման» աշխատանքային նախագիծը:

Հանձնաժողովն արձանագրել է, որ նախագծում հանքավայրի լցակույտերը նախատեսվում է 2570-2360մ նիշերի սահմաններում, 735թ. աղետալի երկրաշարժի էպիկենտրոնից մի քանի կիլոմետր հեռավորության վրա 40-50մ բարձրությամբ  4 շերտով շուրջ 100մ միջին բարձրությամբ m=1.0 շեպերի թեքությամբ, առանց միջանկյալ բերմանների: Նախագծում չկան շեպերի կայունությունը հիմնավորող հաշվարկներ`հաշվի առնելով տարածշրջանի 10 բալ սեյսմիկ ուժգնությունը:

Բացի այդ` նախագծում լցակույտի համար նախատեսված իջույթի հիդրոերկրաբանական առանձնահատկությունների շնորհիվ դիտարկվում են գրունտային ջրերի բազմաթիվ ելքեր, որոնք լցակույտում պարունակվող վտանգավոր բաղադրիչները կտեղափոխեն Որոտանի գետահունը, այնուհետեւ Որոտան-Արփա-Սեւան թունելով նաեւ Սեւանա լիճ: Իջույթի սահմաններում զարգացած են ակտիվ սողանքային տեղամասեր, որոնց վրա լցակույտերի բեռնավորումը եւ հանքավայրում պայթեցման գործընթացները կարող են առավել ակտիվացնել սողանքային երեւույթները հատկապես գարնանային ամիսներին իրենց անկանխատեսելի հետեւանքներով:

Նախագծի Radman Associates հատորում նշվում է, որ ռադոնի կոնցենտրացիան գերազանցում է 400ԲԿ m-3 ներգործության մակարդակը, բայց «Շրջակա միջավայրի վրա ազդեցության գնահատական» հատորում ոչ մի միջոցառում չի նախատեսված ռադոնի մակարդակը իջեցնելու համար:

Փորձագիտական հանձնաժողովը ելնելով վերոնշյալից  եւ առավել եւ հաշվի առնելով, որ ըստ ինտերնետային տվյալների նախատեսվում է տվյալ տարածքում կառուցել հանքաքարի հարստացման ֆաբրիկա, «ՀՀ Վայոց Ձորի  եւ Սյունիքի մարզերում սահմանագլխին գտնվող Ամուլսարի ոսկեբեր քվարցիտների հանքավայրի շահագործման» աշխատանքային նախագծին տվել է բացասական եզրակացություն:

Հանձնաժողովը վերոնշյալ եզրակացության վերանայման հիմքեր չի արձանագրել»: Միեւնույն ժամանակ, «ԷկոԼուր»-ը նամակ ստացավ նաեւ «Գեոթիմ» ընկերությունից, որը պատրաստվում է շահագործել Ամուլսարի հանքը: Նամակում ասված է.

«Ամուլսարի վերաբերյալ ս.թ. ապրիլի 18-ին Բնապահպանության նախարարությունում կայացած հանրային քննարկումներից հետո, շահագրգիռ կողմերը նախարարությանը գրավոր ներկայացրել են իրենց մտահոգությունները: Դրանք այնուհետ հանձնվել են Գեոթիմ ընկերությանը, որը մանրամասն պատասխանել է բոլոր հարցադրումներին: Մասնագիտական բարձր մակարդակով անդրադարձ է եղել Ջերմուկի վրա հնարավոր ազդեցության վերաբերյալ շահարկումներին, Սևանի ավազանի պետական հատուկ հանձնաժողովի հարցադրմանը` Սևանի վրա հնարավոր ազդեցության և նախագծի հետ կապված բոլոր այլ մտահոգությունների վերաբերյալ:
 
Այս ծավալուն աշխատանքին մասնակցել են ինչպես Գեոթիմի, այնպես էլ միջազգային հեղինակավոր Wardell Armstrong International և Golder Associates անկախ խորհրդատվական ընկերությունների բարձրակարգ մասնագետները:
 
Մանրակրկիտ հետազոտությունների հիման վրա տրված այս պարզաբանումները հանձնվել են շահագրգիռ կողմերին, ինչպես նաև հնչել են Բնապահպանության նախարարությունում ս.թ. հուլիսի 30-ին կայացած հանրային քննարկման ընթացքում, որից հետո Բնապահպանության նախարարությունը դրական գնահատական է տվել և հաստատել շահագործման այս փուլի համար ներկայացված «Բնապահպանության և շրջակա միջազվայրի վրա ազդեցության գնահատականին» (ՇՄԱԳ):
 
Բնապահպանության նախարարության կողմից ներկայացված պահանջների համաձայն, ընկերությունը պարտավորվել է կատարել օրենքով նախատեսված փորձաքննություններ և շրջակա միջավայրի  մոնիտորինգի մի շարք միջոցառումներ:

Նախարարության կողմից կառաջարկվի միջազգային անկախ փորձագիտական ընկերություն` Գեոթիմի միջազգային Բնապահպանական և սոցիալական ազդեցության  գնահատականի (ԲՍԱԳ) անկախ փորձաքննության համար: Հատուկ ուշադրություն պետք է դարձվի Սևանի, Ջերմուկի և կարմիր գրքում գրանցված կենդանական և բուսական տեսակների հետ կապված հարցերին:
 
Ընկերությունը միաժամանակ կշարունակի ներդրումները հանքի զարգացման և երկրաբանահետախուզական աշխատանքների ավարտի նպատակով: Նախատեսվում է իրականացնել մոտավորապես 250 մլն ԱՄՆ դոլարի ներդրում:  Հանքի շահագործման փուլում նախատեսվում է իրականացել ևս մոտավորապես 200 մլն դոլարի ներդրում:
Արդյունահանման առավելագույն հզորության ընթացքում նախատեսվում է ՀՀ պետական բյուջե տարեկան վճարել մոտավորապես 86 մլն դոլար:
 
Միևնույն ժամանակ Ընկերությունը կշարունակի ներդրումներ հարակից համայնքներում` ենթակառույցների, տնտեսական զարգացման, գյուղատնտեսության, առողջապահության, երեխաների զարգացման և համայնքների կարողությունների հզորացման բնագավառներում` ի նպաստ համայնքների համակողմանի զարգացման:
 
«ՇՄԱԳ-ի դրական գնահատականը երեք հանրային լսումների և մեկ քննարկման, ինչպես նաև Հայաստանի կառավարության, տեղի համայնքների և քաղաքացիական հասարակության ներկայացուցիչների հետ ինտենսիվ և հիմնավոր շփումների արդյունք է»,- ասում է Լիդիան ինթերնեյշնլ ընկերության նախագահ և գլխավոր գործադիր տնօրեն Թիմ Քոֆլինը:  

«Այս գործընթացը հնարավորություն է ընձեռել շահագրգիռ կողմերին ծանոթանալ նախագծին, բարձրաձայնել իրենց մտահոգությունները, հարցադրումներ ներկայացնել և բոլոր մտահոգությունների վերաբերյալ պատասխանները լսել: Մենք պատրաստակամ ենք շարունակելու բոլոր շահագրգիռ կողմերի հետ շփումները և կառուցելու օրինակելի հանք, որով կարող է հպարտանալ Հայաստանը, տեղական համայնքները և Լիդիան ընկերությունը»»:

19:53 Օգոստոս 09, 2012


Թեժ կետեր


Մարզեր


Բաժանորդագրում

Subscribe to receive our latest news