ԷկոԼուր
ՀՀ կառավարությունը հավանություն տվեց «Հայկական ատոմային էլեկտրակայան» փակ բաժնետիրական ընկերության առաջին էներգաբլոկը շահագործումից հանելու մասին» Հայաստանի Հանրապետության օրենքի նախագծին: Հայկական ատոմային էլեկտրակայանի (ՀԱԷԿ) առաջին էներգաբլոկը 1989 թվականի փետրվար ամսից գտնվում է երկարատև կանգառի ռեժիմում: ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանի խոսքով`առաջին բլոկի ապամոնտաժումը հնարավորություն կտա երկրորդ բլոկի աշխատանքի երկարացման ժամկետի ծրագիրը իրականացնել` ավելի քիչ գումար ծախսելով: Առաջին բլոկի բոլոր այն սարքավորումները, որոնք հնարավոր է օգտագործել, կտեղափոխվեն երկրորդ բլոկ:
Նշենք, որ ՀԱԷԿ-ի երկրոդ էներգաբլոկի շահագործման ժամկետը լրացել է` սակայն հաշվի առնելով, որ Հայաստանում նոր միջուկային էներգաբլոկի կառուցումը հետաձգվում է, ՀՀ կառավարությունը 2012թ-ին ընդունել է որոշում` ՀԱԷԿ-ի երկրորդ էներգաբլոկի շահագործման ժամկետը 10 տարով երկարաձգելու մասին:
2007 թվականին ՀՀ կառավարության կողմից ընդունված Հայկական ատոմային էլեկտրակայանը շահագործումից հանելու ռազմավարությամբ առաջարկվում է ՀԱԷԿ-ի շահագործումից հանման տարբերակ ընտրել է «Հաջորդական ապամոնտաժում» տարբերակը, որը նախատեսվում է իրականացնել 40 տարվա ընթացքում: Հայկական ԱԷԿ-ի շահագործումից հանումը իրականացվելու է 3 փուլով: 2007թ-ի գնահատականներով ՀԱԷԿ-ի շահագործումից հանելը գնահտատվել է շուրջ 310,37 միլիոն ԱՄՆ դոլար:
Հայկական ԱԷԿ-ի շահագործումից հանվող էներգաբլոկները կդառնան բարձր ակտիվության ռադիոակտիվ թափոնների առաջացման խոշոր աղբյուր: Իսկ Հայաստանը խնդիր ունի ռադիոակտիվ թափոնների պահման տեսանկյունից, քանի որ համապատասխան տարածքներ են պետք, խոշոր ֆինանսական ներդրումներ` նորագույն տեխնոլոգիաների օգտագործմամբ համապատասխան պահեստարանների կառուցման, ռադիոակտիվ թափոնների վնասազերծման և պահեստավորման համար: Նշենք, որ մինչև 1991 թ-ը ՀԱԷԿ-ի աշխատած միջուկային վառելիքը տեղափոխվում էր Ռուսաստան վերամշակման և պահվում էր այնտեղ: ՀՀ անկախությունից հետո ՀՀ-ի շրջափակման պատճառով աշխատած միջուկային վառելիքի տեղափոխում չիիրականացվում և պահվում է ՀԱԷԿ-ի տարածքում:
ՀՀ կառավարությունը ռադիոակտիվ թափոնների, ինչպես նաև միջուկային վառելիքի անվտանգ կառավարման համար մշակել է և սույն թվականի հոկտեմբերի 5-ին ընդունել Հայաստանի Հանրապետությունում ռադիոակտիվ թափոնների և աշխատած միջուկային վառելիքի անվտանգ կառավարման ռազմավարությունը: ՀՀ էներգետիկ ենթակառուցվածքների և բնական պաշարների նախարարին հանձնարարվել է վեցամսյա ժամկետում մշակել և կառավարության աշխատակազմ ներկայացնել առաջացած ռադիոակտիվ թափոնների և աշխատած միջուկային վառելիքի անվտանգ կառավարման ռազմավության դրույթների իրականացման միջոցառումների ծրագիր։
Հոկտեմբեր 13, 2017 at 13:15