ԷկոԼուր
ՀՀ բնապահպանության նախարար Արամայիս Գրիգորյանն ընդունել է Կանադայի բնապահպանության և կայուն զարգացման մշտական հանձնաժողովի նախագահ Հարոլդ Ալբրեխտի գլխավորած պատվիրակությանը, որի կազմում էին ՀՀ-ում և ՌԴ-ում Կանադայի արտակարգ և լիազոր դեսպան Ջոն Ռոնալդ Քյուրը, Կանադայի պատվավոր հյուպատոս Արտաշես Էմինը և Մոսկվայում Կանադայի դեսպանատան ներկայացուցիչ Քորին Պետրիսորը:
Ինչպես տեղեկացնում է ՀՀ բնապահպանության նախարարության տեղեկատվության եւ հասարակայնության հետ կապերի վարչությունը, նախարար Արամայիս Գրիգորյանը նշել է. «Թեև բնապահպանության ոլորտում ՀՀ բնապահպանության նախարարության և կանադական կողմի միջև համագործակցության փորձ չկա, այնուամենայնիվ, այս հանդիպումն առիթ է փոխգործակցության հեռանկարներ և հնարավորություններ քննարկելու համար»:
Կողմերն անդրադարձել են ջրային ռեսուրսների, բնության հատուկ պահպանվող տարածքների պահպանության, կենսաբազմազանության պահպանման, հանքարդյունաբերության, թափոնների կայուն կառավարման և այլընտրանքային էներգիայի /մասնավորապես քամու, արևի էներգիաների և կոշտ թափոնների վերամշակման միջոցով/ ստացման խնդիրներին, քննարկել երկու երկրների փորձն ու հնարավորությունները: Որոշվել է առաջիկայում զարգացնել երկու երկրների համապատասխան գերատեսչությունների կապերը և սերտ համագործակցություն սկսել վերոնշյալ ոլորտներում:
Նշենք, որ կանադական ընկերությունները ներդրումներ են կատարում Հայաստանի հանքարդյունաբերության ոլորտներում: «Դանդի փրիշս մեթալս» ՓԲԸ-ն ի դեմս «Դանդի փրիշս մեթալս Կապան» ՓԲԸ-ի շահագործում է Հայաստանում Շահումյանի ոսկու բազմամետաղային հանքավայրը: Մեկ այլ կանադական ընկերություն` ի դեմս «Բլեքսթերզ Էներջի Արմենիա» ՍՊԸ-ի, զբաղվում է Հայաստանում նավթի եւ գազի որոնմամբ:
Ապրիլ 27, 2015 at 13:20