ԷկոԼուր
Ի՞նչ ծրագրերի իրականացմանն են ուղղվել Սևանա լճից 2008, 2012, 2014, 2017 թթ-ին իրականացված հավելյալ ջրառի արդյունքում ստացված գումարները: Այս և այլ հարցերով «ԷկոԼուր» տեղեկատվական ՀԿ-ն նամակով դիմել է էներգետիկ ենթակառուցվածքների և բնական պաշարների նախարար Արթուր Գրիգորյանին:
«ԷկոԼուր»-ի հարցման մեջ նշված է.
«Մինչ հեղափոխությունը` 2017 թ-ի դեկտեմբերի 28-ին, ՀՀ կառավարության նիստի ընթացքում, ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը հայտարարել է, որ «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքի համաձայն` Սևանա լճից բաց թողնված ջրի՝ 170 մլն խմ-ն գերազանցող չափաքանակի հաշվին արտադրվող էլեկտրական էներգիայի վաճառքից էներգահամակարգի ընկերություններում առաջացել է լրացուցիչ շահույթ: Նախարարությունն արտաբյուջետային հաշիվ է բացելու: «Միջազգային էներգետիկ կորպորացիա» և ՀԷՑ ՓԲԸ-ները առաջացած լրացուցիչ շահույթի գումարներն այդ հաշվին կփոխանցեն, որով կկառավարվեն 170 մլն խմ-ից ավելի ջրառից առաջացած ֆինանսական միջոցները: Երկու ընկերությունները, ըստ Աշոտ Մանուկյանի, փոխանցել են արդեն 1 միլիարդ 650 միլիոն դրամ, և նախարարությունը պետք է կառավարության հաստատմանը ներկայացներ այն ծախսերի ուղղությունները, որոնց իրականացման համար կառավարությունը նպատակահարմար կգտներ այդ գումարներն օգտագործել։
Խնդրում ենք տեղեկացնել.
- 2017թ-ին Սևանա լճից հավելյալ 100 միլիոն խմ ջրառի արդյունքում քանի՞ կՎտ/ժ հավելյալ էլեկտրաէներգիա է արտադրվել և որքա՞ն լրացուցիչ շահույթ է առաջացել:
- ՀՀ էներգետիկ ենթակառուցվածքների և բնական պաշարների նախարարությունը բացե՞լ է արտաբյուջետային հաշիվ այդ լրացուցիչ շահույթի համար:
- ՀՀ էներգետիկ ենթակառուցվածքների և բնական պաշարների նախարարությունը կառավարության հաստատմանը ներկայացրե՞լ է այդ լրացուցիչ շահույթի ծախսերի ուղղությունները, ի՞նչ ներդրումային ծրագրերի վրա է նախատեսված ծախսել այդ գումարները:
- Քանի՞ կՎտ/ժ հավելյալ էլեկտրաէներգիա է արտադրվել 2008, 2012, 2014 թվականներին առանձին-առանձին Սևանա լճից իրականացված լրացուցիչ ջրառից և որքան լրացուցիչ շահույթ է առաջացել ամեն անգամ, ի՞նչ ծրագրերի իրականացման վրա են ծախսվել այդ գումարները»:
Օգոստոս 22, 2018 at 17:00