ԷկոԼուր
ԵԱՀԿ Երևանյան գրասենյակի ղեկավար, դեսպան Անդրեյ Սորոկինն ընդունել է «Սինջար եզդիների ազգային միավորում» ՀԿ-ի ներկայացուցիչներին եւ քննարկել «Մեգո Գոլդ» ընկերության Թուխմանուկի հարստացուցիչ ֆաբրիկայի 3-րդ պոչամբարի կառուցման խնդիրը: «Դեսպանը կարևորեց խնդիրը և ասաց, որ իրենց լիազորությունների շրջանակում կաշխատեն այդ ուղղությամբ»,-ԷկոԼուրի հետ զրույցում ասաց «Սինջար եզդիների ազգային միավորում» ՀԿ-ի նախագահ Բորիս Թամոյանը:
Ըստ նրա` եզդիներն անհանգստացած են, որ պոչամբարը պետք է կառուցվի եզդիական Ռյա-Թազա և Միրաք գյուղերի մոտակայքում, ինչը մեծ վտանգ է ներկայացնում այդ գյուղերի բնակիչների համար:
«Այդ գյուղերն ավանդական եզդիական գյուղեր են և հիմնադրվել են հայոց ցեղասպանությունից հետո, երբ եզդիները հայերի հետ միասին Օսմանյան Թուրքիայից տեղափոխվեցին այստեղ: Այդ գյուղերում մարդիկ են ապրում, որոնց կարող են սպառնալ լուրջ հիվանդություններ: Բացի դրանից, պոչամբարի կառուցման հետևանքով այդ գյուղերը կզրկվեն անասնապահությամբ զբաղվելու իրենց հնարավորությունից և ուղղակի կարտագաղթեն Հայաստանից, քանի որ այլ հնարավորություն չունեն այստեղ ապրելու», - ասաց Բորիս Թամոյանը` հավելելով, որ այդ գյուղերը ճանաչված չեն որպես ազդակիր համայնքներ, ինչը օրենքի կոպիտ խախտում է: Հիշեցնենք, որ ազդակիր համայնք ճանաչվել է միայն Մելիքգյուղ համայնքը:
«Մենք հիմա փոքր տեսաֆիլմ ենք պատրաստում, որտեղ ներկայացվում է, թե ինչ վտանգներ են սպասվում Ռյա-Թազա և Միրաք գյուղերի բնակիչներին: Տեսաֆիլմը տարածելու ենք գյուղերում և իրազեկման աշխատանքներ ենք իրականացնելու: Տեղեկանալով ռիսկերի մասին՝ մարդիկ չեն ուզենա իրենց ապագան վտանգել: Մենք գիտենք, որ գյուղապետերի վրա պետք չէ հույս դնել, նրանք աշխատում են խնդիրներից զերծ մնալ: Պարզ է, որ եթե այդ ընկերությունը հասել է այդտեղ, ուրեմն մարզպետարանի հետ կապեր ունի, և մարզպետարանը կարող է ճնշել գյուղապետերին: Այդ իսկ պատճառով հարկավոր է մարդկանց տեղեկացնել և ցույց տալ ճանապարհները՝ ինչպես պետք է պայքարել: Ճանապարհը՝ իրավական դաշտն է: Այդ պոչամբարը անօրինական է, պետք է ի ցույց դնել անօրինականությունները», - ասաց Բորիս Թամոյանը:
Իր հերթին Ապարանի Օրհուս կենտրոնի ղեկավար Նատալիա Մանուկյանը նշեց, որ Թուխմանուկի հանքավայրի պոչամբարի ազդեցության տակ գտնվում են ոչ թե երկու եզդիական գյուղեր, այլ երեք՝ Ռյա թազա, Միրաք և Ջարջառիս: Այս բոլոր գյուղերը, ինչպես նաև Ապարան քաղաքի բնակիչները, ովքեր ունեն մշակովի հողատարածքներ այդ տարածքում, օգտվում են Հալավարի ջրամբարից: Նատալիա Մանուկյանի խոսքով` փորձագետ Սեյրան Մինասյանի կողմից կատարված հետազոտության արդյունքում պարզվել է, որ Թուխմանուկի պոչամբարները Հալավարի ջրամբարից բարձր են գտնվում: Դա նշանակում է, որ պոչերի մեջ պարունակվող ծանր մետաղները և տոքսիկ նյութերը ակտիվորեն կուտակվում են Հալավարի ջրամբարում:
«Մենք այս տարվա մարտ ամսին փորձեցինք Ռյա-Թազայի բնակիչներին իրազեկել, որ ձեզանից ոչ հեռու կա պոչամբար և այդ պոչամբարի ծանր մետաղները կուտակվում են Հալավարի ջրամբարում: Մենք ցանկացանք ցույց տալ հետազոտությունների արդյունքները, սակայն գյուղապետը չուզեցավ մեզ ընդհանրապես տեսնել: Մենք հանդիպեցինք բնակիչների հետ: Բնակիչները զարմացած էին», - ասաց Նատալիա Մանուկյանը: Նա նշեց, որ Թուխմանուկի չռեկուլտիվացված առաջին և երկրորդ պոչամբարներից և թունավոր նյութերի արտահոսք է լինում, և ամռան չոր ամիսներին փոշին տեղափոխվում է մոտակա մշակովի հողատարածքները:
Նշենք, որ սույն թվականի հունիսի 30-ին ՀՀ բնապահպանության նախարարությունը դրական եզրակացություն է տվել «Մեգո Գոլդ» ՍՊԸ-ի Թուխմանուկի ոսկու հարստացուցիչ ֆաբրիկայի նոր պոչամբարի աշխատանքային նախագծին, որը մերժում էր ստացել ՀՀ բնապահպանության նախարարության կողմից դեռ 2013թ-ի մայիսին:
Սեպտեմբեր 25, 2014 at 11:20