ԷկոԼուր
Գեղարքունիքի մարզի Աստղաձոր համայնքում իրականացված սուբվենցիոն երկու ծրագրերի շրջանականերում 1300 գծամետր երկարությամբ խմելու ջրատարի ներքին ցանց է կառուցվել Զորավար Անդրանիկ փողոցում: Այս մասին գրում է «Արմենպրես»-ը, հղում անելով Գեղարքունիքի մարզպետարանի քաղաքաշինության վարչությանը, և նշում է, որ բարելավվել է խմելու ջրի մատակարարումը շուրջ 400 տնտեսություններում: Ասֆալտապատվել է նույն փողոցի մի հատվածը՝ 630 գծամետր երկարությամբ:
Ջրագծի փոխումը սակայն չի լուծում Աստղաձոր համայնքի խմելու ջրի սուր խնդիրը, քանի որ խմելու ջրի մատակարարումն ապահովում են բացառապես խորքային հորերը, և բնակիչները դժգոհ են հորերի ջրի որակից:
«Ճիշտ է, Զորավար Անդրանիկ փողոցի խմելու ջրատարի ներքին ցանցը փոխվել է: Սակայն ջուրը, որը տրամադրվում է մեզ, խորքային հորերի արտեզյան ջուր է: Այդ ջուրը որակապես խիստ զիջում է Աստղաձոր գետի ակունքի ջրին, որը մենք հարևան Զոլաքար համայնքի հետ համատեղ օգտագործում էինք խմելու համար: 2016թ-ին իրականացված ծրագրի արդյունքում գետի ջուրն ուղղվեց Զոլաքար: Աստղաձորը մնաց միայն խորքային հորերի հույսին: Բացի այն, որ արտեզյան ջուրը որակապես զիջում է Աստղաձոր գետի ակունքի ջրին, այն նաև տարեց տարի նվազում է՝ պայմանավորված կլիմայի փոփոխությամբ: Մենք մտավախություն ունենք, որ խորքային հորերը մի օր կցամաքեն, և Աստղաձորը կմնա առանց որևէ ջրի»,- ԷկոԼուրի հետ հեռախոսազրույցում ասաց Աստղաձորի բնակիչ Վարդան Գրիգորյանը: Նա նշեց, որ շարունակելու են պայքարել, որպեսզի Աստղաձոր գյուղը նորից ջուր ստանա Աստղաձոր գետի ակունքից:
Հիշեցնենք, որ Աստղաձոր գետի ջուրը 2016թ-ին ամբողջությամբ տեղափոխվել է Զոլաքար համայնք «Համայնքների գյուղատնեսական ռեսուրսների կառավարման և մրցունակության» և «Ենթակառուցվածքների և գյուղական ֆինանսավորման աջակցության» ծրագրերի իրականացման արդյունքում: Ծրագրերն իրականացվել են Գյուղատնտեսության զարգացման միջազգային հիմնադրամի (IFAD) վարկային միջոցներով:
Դեկտեմբեր 04, 2019 at 16:50