ԷկոԼուր
Բեշիկ-Այա անվամբ ջրամբարների կասկադի կառուցման թուրքական նախագիծը հանդիպեց Վրաստանի կանաչների դիմադրությանը: Վրաստանի Կանաչների կուսակցությունը հունվարի 16-ին տարածեց մամլո հաղորդագրություն, որտեղ մասնավորապես ասված է, որ տվյալ նախագծով Քուռ գետը պետք է փակվի Թուրքիայի տարածքում (Արդագանի շրջան), եւ կառուցվեն ջրամբարների կասկադներ: Նախագծի իրականացման դեպքում Վրաստանի տարածքում Քուռ գետի հունի 5 կմ երկարությամբ տարածքում ջուր ընդհանրապես չի լինի, եւ տարածքը կչորանա:
Շատ լարված իրավիճակ կստեղծվի ամռանը, երբ գետը բնական ջրերի հոսքի բացակայության պատճառով կկորցնի ինքնամաքրման հնարավորությունը եւ կդառնա կոյուղաջրերի կոլեկտոր:
Հատկապես աղետալի իրավիճակ կլինի Բորժոմիում եւ Թբիլիսում. մեծ է հավանականությունը, որ համաճարակ կսկսվի:
Ինչ վերաբերում է Ադրբեջանին, ապա Մինգեչաուրի ջրամբարները ջրով մատակարարող գլխավոր աղբյուրներն են Քուռ գետը, Ալազանին եւ Իորին: Թուրքական նախագծի իրականացման դեպքում ջրամբարը կկորցնի ջրի 10%-ը, ինչը մեծ վնաս կհասցնի Ադրբեջանի գյուղատնտեսությանը եւ էներգետիկային:
Վրաստանի կանաչների հաղորդագրության մեջ նշված է, որ Վրաստանի Կանաչների կուսակցության գլխավոր քարտուղար Գեորգի Գաչեչիլաձեի մամլո ասուլիսից հետո նախագահ Սահակաշվիլին հանդես է եկել հայտարարությամբ, որ «Թուրքիան ձեռք չի տա Քուռին, բայց փոխարենը թուրքական կողմը կասկադներ կկառուցի Վրաստանում, բայց` իր համար»:
«Դա լավագույն ելքը չէ Վրաստանի համար, գուցե եւ վատագույնն է, որովհետեւ երբեմն մեծ ջրամբարներն ավելի մեծ վնաս են հասցնում բնությանը, քան ջրի անբավարարությունը: Այնպես որ, որքան էլ մի ջանա, միեւնույնն է` մեր բնության հանդեպ վնասն ապահովված է»,- հայտարարում է Վրաստանի Կանաչների կուսակցությունը:
Փետրվար 10, 2012 at 11:13