ԷկոԼուր
Փետրվարի 2-ին ՀՀ վերաքննիչ դատարանը մերժել է «Հայջրմուղկոյուղի» ՓԲԸ-ի բողոքը և ուժի մեջ է թողել Սյունիքի մարզի ընդհանուր իրավասության դատարանի որոշումը: Դատարանը բավարարել է Կապանի բնակիչների հայցը, ովքեր «Հայջրմուղկոյուղի» ՓԲԸ-ից պահանջում էին կատարել բաժանորդների հետ կնքված պայմանագրերով ստանձնած պարտավորությունները, այն է` ապահովել կենցաղային կեղտաջրերի հեռացումն ու մաքրումը և վերացնել մարդկանց առողջությանը եւ նորմալ կենսակերպը վտանգող ռիսկերը: Կապանցիներին այս գործում աջակցեցին «Էկոլոգիական անվտանգության ապահովման և ժողովրդավարության զարգացման» ՀԿ-ն և «Բաց հասարակության ինստիտուտի օժանդակության» հիմնադրամի հայաստանյան մասնաճյուղը: Սյունիքի մարզի ընդհանուր իրավասության դատարանը բավարարեց կապանցիների պահանջը: Դատարանը որոշումը կայացրեց 2011թ. մարտի 24-ին: Այս մասին ասված է «Էկոլոգիական անվտանգության ապահովման և ժողովրդավարության զարգացման» ՀԿ-ի մամլո հաղորդագրության մեջ:
Փետրվար 10, 2012 at 14:11