ԷկոԼուր
Ամուլսարի ոսկու հանքավայրի շահագործման ծրագրի դեմ պայքարող քաղաքացիները սեպտեմբերի 6-ին ակցիա անցկացրեցին կառավարության շենքի դիմաց: Ակցիայի հայտարարված նպատակը` «պայթեցնել հանքերի հետ կապված միֆերն ու վախերը, աջակցել կառավարությանը` հաստատել քաղաքացիների կամքը և տեսչական մարմնի ընդունած որոշումը` կրկին փորձաքննության ենթարկել Ամուլսարի ծրագիրը»:
Ակցիային մասնակցում էին Վայոց ձորի մարզից Ջերմուկ համայնքի բնակիչները, Գեղարքունիքի մարզից Սևանա լճի ափամերձ համայնքների բնակիչները, բնապահպաններն ու քաղաքացիական ակտիվիստները: Նրանք իրենց հետ բերել էին խորհրդանշական փուչիկներ` կանաչ և կարմիր գույների:
«Պատասխանատու հանքարդյունաբերություն», «Արբիտրաժային դատարաններ», «Տնտեսական աճ», «Միջազգային ստանդարտներ» հասկացությունները ցուցարարները համարեցին միֆեր և «պայթեցրեցին» դրանք կարմիր փուչիկներով: Փոխարենը հղեցին «Խիստ տեսչություն», «Խիստ վերահսկողություն», «Գլոբալ արդարադատություն», «Ջուր», «Բնապահպանական օրենքներ» ուղերձները:
Ցուցարարները վանկարկեցին` «Ամուլսարն առանց հանքի, Նիկոլ հուպ տուր, Լիդիանին կուլ տուր: Կանաչ, մաքուր, Հայաստան»:
«Մենք` Ջերմուկի բնակիչներս, շուրջ 80 օր հսկում ենք Ամուլսարի ճանապարհները, որ ոչ մի գործ այնտեղ չանեն: Մենք ուզում ենք պահպանել մեր քաղաքը, մեր ջրերը, մեր սերունդը: Չպետք է թողնենք, որ այդ ծրագիրն իրականացվի: Մինչև վերջ էլ կանգնելու ենք, մինչև հասնենք մեր նպատակին», - ասաց Ջերմուկ համայնքի բնակիչ Էդմոնդ Աղաբեկյանը:
«Ամուլսարն ամենախոշոր հանքավայրն է, որ բացվելու է Հայաստանի կենտրոնում: Այդ ազդեցությունը տարածվելու է բոլոր ուղղություններով` Վայոց ձոր, Սևան, Սյունիքի մարզ, Արփա, Որոտան գետերի ավազաններ: Ով է 50 և ավելի տարիներ վտանգները կառավարելու ու վերացնելու, համապատասխան կայաններ տեղադրելու և սպասարկելու ջրերը մաքրելու համար և արդյո՞ք դա տեխնիկապես և այլ առումներով հնարավոր է», - ասաց Հայկական բնապահպանական ճակատի անդամ Լևոն Գալստյանը:
Ցուցարարները նշեցին, որ բնապահպանության և ընդերքի տեսչական մարմինը ստուգումներ իրականացնելիս Ամուլսարի տարածքում խախտումներին զուգահեռ հայտնաբերել է Կարմիր գրքում գրանցված «Ոզնաթուփ մեխակ» բուսատեսակ և «Ապոլո» տեսակի թիթեռ: «Եթե «Ապոլո» թիթեռն Ամուլսարի տարածքում իսկապես գոյություն ունի, ուրեմն ՀՀ օրենսդրությունն իմպերատիվ կերպով արգելում է այդ տարածքում որևէ հանքարդյուբերական գործունեություն իրականացնել», - նշեց Լևոն Գալստյանը:
«Ապոլո» թիթեռի կերպարանքով ակցիան մասնակցում էր բնապահպան Մարիամ Սուխուդյանը, ով տևական ժամանակ դուրս էր եկել ակտիվ փողոցային պայքարներից: Այսօր նա Ամուլսարի պահապանների կողքին էր:
«Տարիներ առաջ այս պայքարը սկսեցին բնապահպանները, բայց հիմա, երբ արդեն տեսնում ես այդ հասուն գիտակցությունը հենց տեղի բնակչության մոտ` թե կրթվածությամբ, թե նվիրվածությամբ, այդ շարժումը սկսում է քաշել: Ինձ վրա շատ ազդեց այն փաստը, որ տեղի բնակիչներն են ոտքի կանգնել ու պայքարում: Կարծես Ջերմուկի բնությունն արտատպված է նրանց մեջ:
Հանքավայրն անհամատեղելի է Ջերմուկ առողջարանի հետ: Ջերմուկն առողջարանային գոտուց հանքային մեռյալ քաղաքի է փոխակերպվելու: Անհնարին է, որ այդ երկուսն իրար հետ գոյատևեն և իրար վրա չազդեն: Վարչապետ Նիկոլ Փաշինյանն էլ, երբ եկել էր Ջերմուկ, ասաց, որ իմ օրոք լիներ, ես թույլ չէի տա», - ասաց Մարիամ Սուխուդյանը:
«Եկել ենք ուղերձ հղելու կառավարությանը, որ ինքը համարձակորեն պաշտպանի Հայաստանի օրենսդրությունը, չտրվի միջազգային ճնշումներին», - նշեց Հայկական բնապահպանական ճակատի անդամ Աննա Շահնազարյանը:
Գեղարքունիքի մարզից «Տարածքային զարգացման և հետազոտությունների կենտրոն» ՀԿ-ի նախագահ Սաթիկ Բադեյանն ասաց. «Ամուլսարը սպառնում է նաև Սևանին, և մենք` Սևանի բնակիչներս, պահանջում ենք Ամուլսարի հանքի շահագործման դադարեցում:
Եթե Ամուլսարի ոսկին ժամանակի ընթացքում այլևս չենք ունենա, Սևանը, ճիշտ պաշտպանելու դեպքում, միշտ կունենանք: Մենք մեր բոլոր ջանքերը պետք է կենտրոնացնենք Սևանի փրկության համար»:
Ամուլսարի ծրագրին ազդակիր Գնդեվազի գյուղի բնակիչ, լրագրող Թեհմինե Ենոքյանը կոչ արեց բոլորին սեպտեմբերի 7-ին` 10:30-ին, Վարչական դատարանում մասնակցել Ամուլսարի գործով դատական նիստին:
Սեպտեմբեր 06, 2018 at 18:13