ԷկոԼուր
Ս. թ. փետրվարի 5-ին ՀՀ շրջակա միջավայրի նախարարության ջրային ռեսուրսների կառավարման գործակալությունում տեղի ունեցավ քննարկում «Լիդիան Արմենիա» ՓԲԸ-ի՝ Արփա գետից ջրառի ջրօգտագործման թույլտվության նախագծի վերաբերյալ։
«Լիդիան Արմենիա» ՓԲԸ-ն դիմել է ՀՀ շրջակա միջավայրի նախարարություն՝ Ամուլսարի ոսկեբեր քվարցիտների հանքավայրի շահագործման համար Վայոց ձորի մարզի վարչական տարածքում արդյունաբերական նպատակով Արփա գետից 11 լ/վրկ ջրառի ջրօգտագործման թույլտվություն ստանալու նպատակով:
Նախագծի համաձայն՝ ջրառը նախատեսվում է իրականացնել մինչև 5 տարի ժամկետով, ջրահեռացում չի նախատեսվում: «Բնապահպանական թողքը հաշվարկվել է «Լիդիան Արմենիա» ՓԲԸ-ի կողմից, ինչը համապատասխանում է 2018 թ. Կառավարության համապատասխան որոշմանը»,- նշեց գործակալության պետի ժամանակավոր պաշտոնակատար Էդգար Փիրումյանը: Ըստ նախագծի՝ այն տարբեր ամիսներին կտատանվի 0,57-1,02 խմ/վրկ-ի սահմաններում:
Այս նախագծի առնչությամբ որևէ գրավոր կամ բանավոր առաջարկություն, բողոք և դժգոհություն չէր ներկայացվել Ջրային ռեսուրսների կառավարման գործակալություն: ԷկոԼուրի այն հարցին, թե արդյո՞ք դա կարող է հիմք հանդիսանալ ընկերության նախագծին հավանություն տալու համար, Փիրումյանը պատասխանեց. «Այո՛, այս փուլում, այո՛: Որպես հասարակական ծանուցում, այո՛: Նշանակում է, որ հասարակական որևէ դժգոհություն տեղի չի ունեցել: Եթե որևէ հայտ, գրավոր կամ բանավոր դիմում, դժգոհություն տեղի չի ունենում, ինքը համարվում է հասծանուցված՝ դրական եզրույթով»: Այս քննարկմանը հաջորդելու են նախագծի վերաբերյալ հետագա քննարկումներ արդեն գործակալությունում: ԷկոԼուրի ճշտող հարցին, եթե հիմա որևէ բողոք կամ դիմում չլինի, կտրվի՞ այդ թույլտվությունը, Փիրումյանը դրական արձագանքեց:
Հիշեցնենք, որ անցյալ տարվա հոկտեմբերին Ամուլսարի ոսկու հանքավայրի շահագործման նպատակով «Լիդիան Արմենիա» ՓԲԸ-ն դիմել էր Շրջակա միջավայրի նախարարություն՝ Դարբ գետից 40.0 լ/վրկ ջրառի ՋԹ ստանալու համար: Սակայն Շրջակա միջավայրի նախարարի 2019 թ-ի հոկտեմբերի 25-ի 353Ա հրամանով մերժվեց ընկերության ներկայացրած նախագիծը: «Լիդիան»-ը հայտարարել էր, որ ապօրինի է համարում նախարարի հրամանը և մտադիր է դիմել Վարչական դատարան:
Փետրվար 05, 2020 at 18:48