Եթե փորձաքննության պահանջները կատարվեն, Ամուլսարի ծրագիրն այդ տեսքով չի կարող իրականացվել

ԷկոԼուր

Ամուլսարի ոսկու հանքավայրի բաց շահագործման եւ ոսկու կորզման  ցիանային արտադրության համալիր ծրագիրը  ստացել է ՀՀ բնապահպանության նախարարության «Բնապահպանական փորձաքննություն» ՊՈԱԿ-ի պայմանական դրական եզրակացությունը` 6 պահանջների կատարման պայմանով:

Եզրակացության մեջ ասված է.

«1. Քանի որ, «Սեւանա լճի մասին» ՀՀ օրենքի 8-րդ հոդվածի համաձայն, Սեւանա Լճի անմիջական ազդեցության գոտու տարածքը քաղաքաշինական գործունեության հատուկ կարգավորման օբյեկտ է, նշված գոտում քաղաքաշինական գործունեություն իրականացնելիս, անհրաժեշտ է առաջնորդվել ՀՀ կառավարության «Քաղաքաշինական գործունեության հատուկ կարգավորման օբյեկտների տարածքներում քաղաքաշինական գործունեության իրականացման կարգը հաստատելու մասին` 26.06.2009թ. թիվ 792-Ն և «Սեւանա լճի ջրհավաք ավազանի տարածքային հատակագծման նախագիծը հաստատելու մասին» 11.12.2003թ. թիվ 1787-Ն որոշման պահանջներով:

2. Նախատեսվող գործունեությունն իրականացնելիս` ապահովել ՀՀ կառավարության 18.07.2013թ. թիվ 746-Ն որոշման պայմանները` կապված Սեւանա լճի ջրհավաք ավազանի մաս կազմող Սպանդարյան-Կեչուտ 22 կմ երկարությամբ ՀՏԿ-ի (թունելի) շահագործման  համար նախատեսվող տարածքի պահպանման հետ:

3. ՀՀ կարմիր գրքում գրանցված ծիրանավոր մատնունի բուսատեսակի պահպանումն ու վերարտադրությունն իրականացնել համաձայն ՀՀ կառավարության  31 հուլիսի 2014թ. N781-Ն որոշման` նախապես ստանալով ՀՀ բնապահպանության նախարարության համաձայնությունը:

4. Հանքի շահագործման ընթացքում շրջակա տարածքներում կազմակերպել շրջակա միջավայրի ճառագայթային մոնիտորինգ:

5. Նախքան գործունեության իրականացումը օրենքով սահմանված կարգով կարգավորել գործունեության տարածքում գտնվող համայնքային եւ մասնավոր սեփականություն հանդիսացող հողամասերի խնդիրը:

6. Հանքի փակումից երկու տարի առաջ սահմանված կարգով ՀՀ բնապահպանության նախարարություն` շրջակա միջավայրի վրա ազդեցության փորձաքննության ներկայացնել հանքի փակման վերջնական ծրագիրը»:

Հետաքրքիր է, որ այս պայմանների ուշադիր դիտարկման արդյունքում ունենք Ամուլսարի ողջ գործունեության սահմանափակում յուրաքանչյուր պահանջի պահով:

Հաջորդ նյութերում ԷկոԼուրը կներկայացնի մեկնաբանություններ «Բնապահպանական փորձաքննություն» ՊՈԱԿ-ի դրական եզրակացության վերաբերյալ:

Դեկտեմբեր 01, 2014 at 16:44