Արշավ-երթ Ամուլսար ապրիլի 28-ին. ՀԲՃ

Արշավ-երթ Ամուլսար ապրիլի 28-ին. ՀԲՃ

Հայկական բնապահպանական ճակատ (ՀԲՃ) քաղաքացիական նախաձեռնություն

Ամուլսարը Զանգեզուրի լեռնաշղթայի գագաթներից է, ունի 2987 մ բարձրություն և գտնվում է Վայոց ձորի և Սյունիքի մարզերի սահմանագլխին: Այստեղ են ձևավորվում բազմաթիվ խմելու և հանքային ջրերի աղբյուրներ, ինչպես նաև Արփա, Որոտան և Դարբ գետերը, որոնք Վայոց Ձորի և Սյունիքի հիմնական ջրային զարկերակներն են։ Այս գետերի ջրերով են ոռոգում հարյուրավոր հեկտար խաղողի, ծիրանի, դեղձի, խնձորի այգիներ և այլ հողահանդակներ։ Նաև Արփա գետի հովտում են արտադրվում լավագույն հայկական գինիները։ Ամուլսարից մի քանի կմ հեռավորության վրա են գտնվում Սպանդարյանի և Կեչուտի ջրամբարները, որոնք Որոտան-Արփա-Սևան ջրատար թունելով միացված են Սևանա լճին։ Լեռան ընդերքով բացված այս թունելով հնարավոր է տարեկան 415 միլիոն խորանարդ մետր ջուր տեղափոխել դեպի Սևանա լիճ: Ամուլսարի մոտակայքում են գտնվում նաև Ջերմուկի հանրահայտ հանքային ջրերը, որոնց շնորհիվ այս տարածաշրջանը տասնամյակներ շարունակ եղել է ամենահայտնի առողջարանային քաղաքներից մեկը:

Հենց այստեղ՝ Հայաստանի ջրերի սրտում, Լիդիան օֆշորային ընկերությունը՝ ՀՀ կառավարության հովանավորությամբ, ցանկանում է ոսկի արդյունահանել: Արդեն շուրջ տասը տարի է, ինչ այս տարածքների բնակիչները, բնապահպանները, հանրային գործիչները, ոլորտի լավագույն մասնագետները, նաև արտասահմանյան գիտնականները պնդում են, որ Ամուլսարում հանքի բացումը և դրա արդյունքում հողերի ու ջրերի անխուսափելի աղտոտումն ու կորուստը ճակատագրական կլինեն ոչ միայն Վայոց Ձորի և հյուսիսային Սյունիքի, այլ ամբողջ Հայաստանի և ավելի լայն տարածաշրջանի համար:

Այս պայքարների շնորհիվ է նաև, որ հանքի շահագործումը ձգձգվում է արդեն 7 տարի՝ 2011 թվից մինչև այսօր: Իսկ այս տարի արդեն բոլորս ականատես եղանք նաև ոչ պակաս հանրային դիմադրություն ստացած Թեղուտի հանքարդյունաբերական ծրագրի տապալմանը: Այն բոլոր վատ կանխատեսումները, բոլոր նախազգուշացումները, որ անում էին բնապահպանները, ի վերջո, ցավոք, իրականություն դարձան: Այսօր Ամուլսարի հանքարդյունաբերողները գրեթե նույն խոսքերով, նույն ոճով նույն խոստումներն են տալիս, ինչ մի քանի տարի առաջ Թեղուտի դեպքում էր:

Ապրիլի 28-ին Ամուլսար արշավելով մենք նպատակ ունենք մի կողմից մեկ անգամ ևս իրազեկել շրջակայքի բնակիչներին այդ ծրագրի վտանգների և մեր բոլորի պայքարի մասին, իսկ մյուս կողմից մեր միասնական բողոքի ձայնն արտահայտել ու հայտարարել Ամուլսարը պահպանելու պահանջը: Յուրաքանչյուրիս մասնակցությունը շատ կարևոր է, մեր բազմամարդ լինելն էական ազդեցություն կունենա, քանի որ այս մասին լրատվական նյութերը տարածվելու են միջազգային մամուլում, իսկ բողոքի ու դիմադրության ցանկացած գործողություն ազդում է Լիդիանի հեղինակության վրա և նվազեցնում ծրագրի շահութաբերության ակնկալիքները։

Մասնակցել ցանկացողներին խնդրում ենք անպայման գրանցվել հետևյալ եղանակներից որևէ մեկով.

1. Զանգել 099 53 05 88, 093402849 համարներով։

2. Անձնական նամակ գրել Հայկական բնապահպանական ճակատ / Armenian Environmental Front-ի էջին։

3. Նամակ գրել [email protected] էլ. փոստին:

Հարկավոր է նշել անունը, ազգանունը, հեռախոսի համարը, եթե գալու եք ձեր մեքենայով, ապա նաև առկա ազատ տեղերի թիվը: Գրանցման վերջնաժամկետը մինչև ապրիլի 26-ի օրվա վերջն է։

Երևանից մեկնելու ենք ապրիլի 28-ին ժամը 7։30՝ Կոնսերվատորիայի մուտքի մոտից, իսկ վերադարձը նախատեսվում է ժամը 22.00-ի հատվածում: Եթե միանալու եք այլ քաղաքներից, ապա խնդում ենք, զանգեք կամ նամակ գրեք, որպեսզի համակարգենք գործողությունները:

Արշավ-երթի ծրագին և մասնակցելու պայմաններին կարող եք ծանոթանալ այստեղ։

16:51 Ապրիլ 26, 2018


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news