«Դիլիջան» ազգային պարկը պնդում է, որ բացի «Լեռնային Հայաստանից» ռեկրեացիոն գոտում կառուցված որեւէ այլ օբյեկտ չկա

«Դիլիջան» ազգային պարկը պնդում է, որ բացի «Լեռնային Հայաստանից» ռեկրեացիոն գոտում կառուցված որեւէ այլ օբյեկտ չկա

ԷկոԼուր

ՀՀ բնապահպանության նախարարությունը` ի դեմս «Դիլիջան» ազգային պարկի ղեկավար Աշոտ Դավթյանի, պատասխանեց «ԷկոԼուր»-ի հրապարակային հայտարարությանն այն մասին, որ Դիլիջանում կառուցվում են անօրինական օբյեկտներ, որոնց համար հատվում է անտառը, եւ որ ազգային պարկի տարածքը մասնատվել է կտորների եւ, փաստացիորեն, վաճառվել է: Հավելենք, որ դա անհամատեղելի է ազգային պարկի գլխավոր գործառույթի հետ, որը Դիլիջանի անտառների յուրահատուկ էկոհամակարգի եւ կենսաբազմազանության պահպանությունն է:

«ԷկոԼուր»-ի հետ հեռախոսազրույցում «Դիլիջան» ազգային պարկի ղեկավար Աշոտ Դավթյանն անհամաձայնություն հայտնեց հայտարարությանը եւ տվեց հետեւյալ պարզաբանումը: Ազգային պարկի 33 765 հա տարածքից պարկի կառավարման ներքո գտնվում է 28 000 հա: Մնացած հողերը համայնքների կառավարման ներքո են: Ռեկրեացիոն գոտին զբաղեցնում է 4 194 հա տարածք: Այդ տարածքում կան 46 տարածքների սեփականատերեր, որոնք ընդհանուր առմամբ զբաղեցնում են 47 հա տարածք: Եւս 67 հա տրված է Դիլիջանի միջազգային դպրոցի կառուցման համար: Բացի «Լեռնային Հայաստան» համալիրից մնացած բոլոր տարածքները դեռ կառուցապատված չեն, թեպետ անժամկետ վարձակալության են վերցված: Այսինքն, Դավթյանի խոսքերով, ազգային պարկի ռեկրեացիոն գոտին կառուցապատված չէ: Ինչ վերաբերվում է շինություններին, ապա, Դավթյանի խոսքերով, այդ օբյեկտները գտնվում են համայնքների տարածքում, եւ դրանց օրինական կամ անօրինական լինելու համար պատասխանատվություն են կրում համայնքները:

Մեր կողմից նշենք, որ բացի ռեկրեացիոն գոտուց եւ արգելոցային տարածքներից, որոնք եւսմոտ 10% տարածք են զբաղեցնում, ազգային պարկի մնացած տարածքը տնտեսական նշանակության գոտի է: Այդ գոտում գտնվում են համայնքները եւ անտառը, որը կարող է օգտագործվել տնտեսական նպատակներով, օրինակ` ծառահատում իրականացնել: Անտառային ֆոնդի մեջ մտնում են նաեւ  վարելահողերը, արոտավայրերը, մարգագետինները:

Որպեսզի այս հարցում հստակություն մտցնենք, մենք հարցնում ենք Բնապահպանության նախարարությանը`

-նախարարությունն ու՞նի այն օբյեկտների ցուցակը, որոնք կառուցվել են «Դիլիջան» ազգային պարկի 33 765 հա տարածքում,

-«Դիլիջան» ազգային պարկի մենեջմենթ պլանում նշված ի՞նչ տարածքներ (անտառային ֆոնդ, ռեկրեցին գոտի, մարգագետին, արոտավայր, բնակավայր, վարելահող եւ այլն) են զբաղեցնում այդ օբյեկտները

-դրանցից որո՞նք ունեն բնապահպանական փորձաքննության դրական եզրակացություն:

12:30 Օգոստոս 19, 2011


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news