Մագելի քարանձավը վտանգվում է կառավարության որոշմամբ

Մագելի քարանձավը վտանգվում է կառավարության որոշմամբ

ԷկոԼուր

ՀՀ կառավարությունն ընդունել է  «Զբոսաշրջության նպատակով քարանձավների արդյունավետ օգտագործումն ապահովող միջոցառումների ծրագիրը  հաստատելու մասին»  որոշումը, որը խիստ վտանգ է ներկայացնում Արջերի, Մոզրովի և Մագելի քարանձավների համար: Այս ծրագրի շրջանակներում 2016 թվականին ՀՀ մշակույթի նախարարությունը  պետք է ընկերությունների համար հայտարարի մրցույթ «Քարանձավները անհրաժեշտ ենթակառուցվածքներով ապահովելու և զբոսաշրջության նպատակներով օգտագործելու համար»: Ծրագրով կոնկրետ նշված է միայն Մագելի քարանձավը, բայց նաև ասված է, որ խոսքը 3 քարանձավների մասին է, մյուս երկուսը,  ամենայն հավանականությամբ,  զբոսաշրջության ոլորտում առավել հայտնի Արջերի և Մոզրովի քարանձավներն են:

Մագելի քարանձավն իրենից ներկայացնում է հազվագյուտ էկոհամակարգ, որը շատ նուրբ է և հեշտությամբ կարող է վնասվել: Այստեղ ապրում են Կարմիր գրքում գրանցված 5 տեսակի չղջիկներ: Չղջիկները չեն դիմանա քարանձավում մարդկանց աղմուկին, նախատեսվող շինարարական աշխատանքներին, լույսին և այլն: Փորձագետներն ու գիտնականներն ասում են, որ Մագելի քարանձավում  մարդկային գործունեության հետևանքով  չղջիկների 60-70 տոկոսը պակասել է: Քարանձավի պահպանության համար բնապահպանները դրա մուտքը փակել են ճաղավանդակով, իսկ կողքին դրել են քարանձավը նկարագրող ցուցանակ:

Արդեն 5-6 տարի է, ինչ Մագելի քարանձավը զբոսաշրջությամբ զբաղվող բիզնեսի ուշադրության կենտրոնում է. այն գտնվում է զբոսաշրջիկների կողմից ամենաայցելվող վայրերից մեկի՝ Նորավանքի  ճանապարհին: Քարանձավը դժվար հասանելի չէ և ունի լավ պատմություն: Այս ամբողջ ընթացքում շարունակվում է պայքար բնապահպանների և զբոսաշրջությամբ զբաղվող բիզնեսի միջև:

Կառավարության նոր որոշման լույսի ներքո շատ կաևոր է  ՀՀ մշակույթի և ՀՀ բնապահպանության նախարարությունների դիրքորոշումը, քանի որ Մագելի քարանձավը մի կողմից պատմամշակութային հուշարձան է, մյուս կողմից՝ Կարմիր գրքում գրանցված չղջիկների բնակության վայր:

17:09 Դեկտեմբեր 24, 2015


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news