Բիզնեսմեններն ու ներդրողները միացել են կլիմայի փոփոխության դեմ մղվող համաշխարհային պայքարին

Բիզնեսմեններն ու ներդրողները միացել են կլիմայի փոփոխության դեմ մղվող համաշխարհային պայքարին

ԷկոԼուր    

Կլիմայի փոփոխության դեմ մղվող համաշխարհային պայքարին միացել են նաև բիզնեսմեններն ու ներդրողներն աշխարհի տարբեր երկրներից:

Փարիզում անցկացվող ՄԱԿ-ի «Կլիմայի փոփոխության մասին» շրջանակային կոնվենցիայի 21-րդ համաժողովի շրջանակներում անցկացված բիզնես-ֆորումի ժամանակ նրանք կոնկրետ խոստումներ են տվել՝ ջերմոցային գազերի արտանետումների կրճատման և էներգիայի մաքուր աղբյուրներին անցնելու վերաբերյալ: Ֆորումի մասնակիցների թվում էին ԱՄՆ պետքարտուղար Ջոն Քերրին և Ֆրանսիայի արտաքին գործերի նախարար Լորան Ֆաբիուսը:

«Կլիմայի վերաբերյալ Փարիզում անցկացվող գագաթնաժողովին ես կոչ արեցի բիզնեսմեններին աջակցել կլիմայի փոփոխության դեմ տարվող պայքարին և ցույց տալ, որ կանաչ բիզնեսը՝ լավ բիզնես է: Աշխարհի տարբեր երկրների ընկերություններ արձագանքեցին այս կոչին: Աշխարհի առաջատար կորպորացիաները ցույց տվեցին, որ իրենք կարող են զբաղվել կլիմայի փոփոխության հարցերով և հասնել ֆինանսական հաջողությունների», - հայտարարել է ՄԱԿ-ի գլխավոր քարտուղար Բան Կի Մունը: Նա նշել է, որ բիզնեսմեններն ու ներդրողները հասկանում են, որ մաքուր և ցածրածխածնային աղբյուրներին անցնելու գործընթացը սկսված է, և այն անդառնալի է:

«Մասնավոր սեկտորի կոլեկտիվ գործողությունները կլիմայի փոփոխության դեմ պայքարում օրեցօր աճում են: Բիզնեսմեններն ու ներդրողները աշխարհի տարբեր վայրերից աջակցում են կլիմայի վերաբերյալ համաձայնագրի ընդունմանը, որը կհնչեցնի անհրաժեշտ և հստակ ազդանշաններ՝ կապված համաշխարհային շուկայի հետագա զարգացման հետ», - ասել է Բան Կի Մունը և հայտնել, որ ավելի քան հարյուր մասնավոր ընկերություններ հայտարարել են ջերմոցային գազերի արտանետումների կրճատման վերաբերյալ կոնկրետ պարտավորությունների մասին: 

«Միայն անցյալ տարի ավելի քան 2000 ընկերություններ և 500 ներդրողներ գրանցել են իրենց պարտավորությունները կլիմայի փոփոխության ոլորտում: Բայց որպեսզի թույլ չտանք գլոբալ ջերմաստիճանի բարձրացում 2 աստիճանից ավելի, մենք պետք է առաջ շարժվենք և շատ արագ», - նշել է ՄԱԿ-ի Գլխավոր քարտուղարը:

Տեղեկատվությունը վերցված է ՄԱԿ-ի պաշտոնական կայքից:

18:21 Դեկտեմբեր 09, 2015


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news