Չարենցավանի վնասված ծառերի ահազանգն ու պատկան մարմինների պատասխանը

ԷկոԼուրն ահազանգ էր ստացել Չարենցավանի բնակիչներից, որ Չարենցավանում բակային տարածքներում վնասում, կտրում, այրում են բակային տարածքների ծառերը, որ դրանց չորանալուց հետո տեղում ավտոտնակ կամ խանութ կառուցեն:

ԷկոԼուրն ահազանգն ուղղել էր Բնապահպանության և ընդերքի տեսչական մարմին, Կոտայքի մարզպետարան և Չարենցավանի համայնքապետարան՝ տրամադրելով նաև լուսանկարներ: ԷկոԼուրը համայնքապետարանից հարցրել է.

• Համայնքապետարանն արդյո՞ք ահազանգ ստացել է Չարենցավանի բակային տարածքներում ծառերի վնասման վերաբերյալ և ի՞նչ քայլեր է ձեռնարկել այս ուղղությամբ:
• Համայնքապետարանը Չարենցավանում որքա՞ն ավտոտնակի և խանութի կառուցման թույլտվություն է տվել 2022թ. ընթացքում և արդյո՞ք ստուգվել է, թե տրված տարածքները կանաչապատ են, թե՞՝ ոչ:
• Բակային տարածքներում ծառերի կտրման կամ վնասման քանի՞ դեպք է բացահայտել Չարենցավանի համայնքապետարանը 2022թ. ընթացքում և ի՞նչ քայլեր է ձեռնարկում այդ ապօրինությունների վերացման և մեղավորներին պատասխանատվության ենթարկելու համար:

Ի պատասխան ԷկոԼուրի հարցման՝ Չարենցավանի համայնքապետի ժամանակավոր պաշտոնակատար Հ. Ղազանչյանը սույն թվականի հոկտեմբերի 28-ի N 1875-22 նամակով ԷկոԼուրին հայտնել է.

«Հայտնում ենք, որ.

1. 2022 թվականին Չարենցավանի համայնքապետարանը Չարենցավան համայնքի բակային տարածքներում ծառերի վնասման վերաբերյալ ահազանգ չի ստացել:
2. Չարենցավանի համայնքապետարանի կողմից տրվել են թվով 15 ավտոտնակի և խանութի կառուցապատման թույլտվություններ, որոնք կառուցապատման համար կամ սեփականության իրավունքով տրամադրված են եղել բնակիչներին:
3. 2022 թվականի ընթացքում ծառերի կտրման ոչ մի դեպք չի արձանագրվել»:

Համայնքապետարանը չի պատասխանել հարցին՝ արդյոք ստուգվել է, թե շինթույլտվության համար տրված տարածքները կանաչապատ են, թե՝ ոչ:

ԷկոԼուրին տրամադրված լուսանկարներում երևում են ծառերի վնասված հատվածները, մինչդեռ ՀՀ բնապահպանության և ընդերքի տեսչական մարմնի Կոտայքի տարածքային բաժնից ԷկոԼուրին հայտնել են, որ տեղազննման արդյունքում հատված կամ վնասված ծառեր չեն հայտնաբերել:

ՀՀ բնապահպանության և ընդերքի տեսչական մարմնի Կոտայքի տարածքային բաժնի պետ Դ. Դավթյանի նամակում նշված է.

«Ի պատասխան Ձեր՝ 2022 թվականի հոկտեմբերի 21-ի Բնապահպանության և ընդերքի տեսչական մարմնին (Այսուհետ՝ Տեսչական մարմին) ուղղված դիմումի, տեղեկացնում եմ, որ արդեն իսկ Չարենցավան համայնքի (այսուհետ՝ Համայնք) բնակիչների բողոքի հիման վրա Տեսչական մարմնի Կոտայքի տարածքային բաժնի և Չարենցավանի համայնքապետարանի աշխատակիցների կողմից Համայնքի բնակչի մասնակցությամբ իրականացված զննման արդյունքում պարզվել է, որ Չարենցավան համայնքի 3-րդ և 6-րդ թաղամասերում գտնվող տարածքները հանդիսանում են քաղաքացիների սեփականություն (կադաստրային ծածկագրեր՝ 07-007-0048-0138, 07-007-0048-0116, 07-007-0048-0100), որոնք ավտոտնակ կամ այլ շինարարություն իրականացնելու նպատակով Համայնքի ղեկավարի շինթույլտվությունների հիման վրա կատարում են հիմքերի փորման և հողահարթեցման աշխատանքներ: Նշված տարածքներում հատված կամ վնասված ծառեր չեն հայտնաբերվել: 3-րդ թաղամասի լողավազանի հարակից տարածքում համայնքապետարանի կողմից կատարվել են խնամքի հատումներ:

Նշված թաղամասերի համայնքային սեփականություն հանդիսացող տարածքներում հայտնաբերվել է 1 հատ «Բարդի» տեսակի ծառ, որի բնի հատվածում նկատվել է այրվածքի հետքեր, սակայն ծառը չի վնասվել մինչև աճի դադարեցման աստիճան (կենսունակ է) և անհայտ անձի կողմից մինչև աճի դադարեցման աստիճան վնասված 30 սմ բնի հաստությամբ 1 հատ «Թեղի» տեսակի ծառ:

Միաժամանակ տեղեկացնում եմ, որ վնասված ծառի վերաբերյալ գրություն է ուղարկվել Ոստիկանության Չարենցավանի բաժին՝ իրավախախտին հայտնաբերելու և պատասխանատվության ենթարկելու համար:

Նշեմ նաև, որ տեսչական մարմնի կողմից հետևողական աշխատանքները շարունակվում են նմանօրինակ խախտումների բացահայտման և կանխարգելման ուղղությամբ»:

ՀՀ Կոտայքի մարզպետարանի գլխավոր քարտուղար Լևոն Պետրոսյանը 25.10.2022թ. թիվ 02/05.1/06279-2022 նամակով հայտնել է, որ Չարենցավան քաղաքի բնակիչներից բակային տարածքներում ծառերի հատման վերաբերյալ ՀՀ Կոտայքի մարզպետարան ահազանգ չի ստացվել: Նշվել է, որ հետամուտ կլինեն նման երևույթների կանխարգելմանը:

Հիշեցնենք, որ ՀՀ շրջակա միջավայրի նախարարության մշակած «ՀՀ հողային օրենսգրքում լրացումներ կատարելու մասին» օրինագծով նախատեսվել է, որ քաղաքային բնակավայրերի սահմաններում գտնվող բնակավայրերի հողերում, անկախ սեփականության ձևից պետական, համայնքային կամ մասնավոր, ծառերի հատումը կարող է իրականացվել միայն համայնքի ղեկավարի թույլտվությամբ: Թույլտվություն պահանջվելու է սանիտարական կամ խնամքի հատումների համար (բացառությամբ պտղատու ծառերի), հողամասը նորմատիվ իրավական ակտերով սահմանված պահանջներին համապատասխանեցնելու, կառուցապատման նպատակով ձեռք բերված հողերում ծառահատում իրականացնելու և ծառապատման դեպքերում: Օրինագիծը դեռևս չի ընդունվել:

Հոկտեմբեր 28, 2022 at 15:30