Քննչական կոմիտեն կրկին հայտարարեց, որ Ամուլսարի ծրագրի բնապահպանական ռիսկերը կառավարելի են

Քննչական կոմիտեն կրկին հայտարարեց, որ Ամուլսարի ծրագրի բնապահպանական ռիսկերը կառավարելի են

ԷկոԼուր

Եթե «Լիդիան Արմենիա» ընկերության կողմից պատշաճ կերպով իրականացվեն Ամուլսարի ծրագրի ԲՍԱԳ և ՇՄԱԳ փաստաթղթերում նախատեսված և հավելյալ առաջարկված մեղղման միջոցառումները, ապա բնապահպանական ռիսկերը կլինեն կառավարելի: Այս մասին օգոստոսի 26-ի ասուլիսի ժամանակ ասաց Քննչական կոմիտեի ՀՀ քննչական կոմիտեի հատկապես կարևոր գործերի քննության գլխավոր վաչության կոռուպցիոն, սեփականության դեմ ուղղված հանցագործությունների վարչության պետ Յուրա Իվանյանը՝ նշելով, որ այս եզրակացությանն են եկել ELARD-ի փորձագետները:

Իվանյանի խոսքով՝ փորձագետներն արձանագրել էին, որ Ամուլսարի ծրագրի տարածքի և Ջերմուկի թերմալ տաք աղբյուրների միջև ստորգետնյա ջրերի հոսքի և աղտոտման փոխանցման ուղիներ առկա չեն, երկրաշարժի դեպքում ազդեցություն կրած ստորգետնյա ջրերը Ջերմուկ չեն հասնի, ազդեցություն կրող ստորգետնյա ջրերը ծրագրի տարածքից կարող են չլցվել Սպանդարյան-Կեչուտ թունել, ինչպես նաև, իզոտոպային տվյալների համաձայն, Ամուլսարի լեռան ստորգետնյա ջրերը չեն լցվում թունել, Կեչուտի ջրամբարի և Սևանա լճի վրա ազդեցություն չի լինի, երկրաշարժի դեպքում ազդեցությունը կրած ջրերի պոտենցիալ միախառնումը նախ Կեչուտի ջրամբարի ջրերի հետ և հետո Կեչուտի ջրամբարի ջրերինը Սևանի ջրերի հետ չի առաջացնի Սևանա լճի կոնցենտրացիայի նշանակալի կամ նույնիսկ չափելի փոփոխություններ երկու ջրամբարներում հերթականությամբ նոսրանալու և Սևանա լճի չափսերի պատճառով:

Ինչ վերաբերում է տեղական գետերին՝ Արփա, Որոտան, Դարբ, ապա, ըստ Իվանյանի, փորձագետները գտել էին, որ ԲՍԱԳ-ի մոդելները չեն գնահատում և քանակապես չեն չափում այդ ազդեցությունները, առկա տեղեկատվության հիման վրա հնարավոր չէր որոշել ստորգետնյա ջրերի վրա ազդեցությունների աստիճանը, և փորձագետները ենթադրել են, որ հանքի մաքրման չենթարկված կոնտակտային ջրերը կարող են աղտոտել ստորգետնյա ջրերը:

«Առաջնային խնդիրը ցանկացած հանքարդյունաբերության մեջ, որպեսզի որևէ տեսակի աղտոտված ջուր դուրս չգա շրջակա համակարգ, կանխվեն շրջակա միջավայրի վրա ազդեցությունները, կիրառվում են մեղղման միջոցառումներ: Ըստ փորձագետների գնահատման՝ Լիդիանի նախատեսված միջոցառումները ողջամիտ են:

Փորձաքննության եզրակացության մեջ ջրերի և երկրաբանության մասով փորձագետները մի շարք թերություններ են առանձնացրել, տվյալների բացեր, ըստ էության, անբավարար են եզրահանգուներ կատարելու համար: Սա վերաբերում է երկրաբանությանը, ապարների դասակարգմանը, ջրի մոդելավորմանը:

Թեև եզրակացության մեջ նշվում են մի շարք թերությունների, բացթողումների մասին, սակայն եզրակացությունն անհրաժեշտ է գնահատել ընդհանուր համատեքստում՝ բնապահպանական ռիսկերը կառավարելի են, թե՝ ոչ, շրջակա միջավայրին վտանգ սպառնում է, թե՝ ոչ: Առաջնային պլան է գալիս մեղղման միջոցառումների ողջ համակարգը, որպեսզի կանխվեն հնարավոր ռիսկերը: Փորձագետները մեղղման միջոցները գնահատել են ողջամիտ: Եթե դրանք կիրառվեն նախագծված, պատշաճ, ապա բնապահպանական ռիսկերը կլինեն կառավարելի:

Միևնույն ժամանակ փորձագետներն առաջարկել էին 16 միջոցառում, որպեսզի շրջակա միջավայրի վրա ռիսկերը կառավարելի լինեն, որոնցից 10-ը «Լիդիան»-ը նախատեսել էր», - ասաց Իվանյանը:

Նրա խոսքով՝ ուսումնասիրվել են ոչ միայն «Լիդիան»-ի հետազոտությունները, այլ նաև պետական մարմինների, հասարակական կառույցների, բնապահպանների, միջազգային փորձագետների կողմից ներկայացված փաստաթղթերը, օրինակ, ՀՀ ԳԱԱ Երկարաբանության ինստիտուտի, Հարութ Բռոնոզյանի ներկայացրած տվյալները և այլն:

Իվանյանը նշեց, որ Ամուլսարի տարածքում ուրանի և թորիումի առկայության մասին տեղեկատվություններ ստացված փաստաթղթերում չկան:

Քննչական կոմիտեի պաշտոնյան նշեց, որ ELARD-ը գնահատել է ոչ միայն ջրային ռեսուրսների վրա ազդեցությունները, այլ նաև կենսաբազմազանության և օդի որակի:

Ըստ Իվանյանի՝ կենսաբազմազանության մասով փորձագետները նշել են, որ ԲՍԱԳ-ում այն գնահատվել է բավարար: Օդի որակի գնահատման կապված հարցերը նույնպես պարզաբանվել են:

«ՇՄԱԳ-ում և ԲՍԱԳ-ում ներկայացվում են կանխարգելիչ միջոցառումները, ընդհանուր առմամբ, չեն հայտնաբերվել լուրջ խնդիրներ, որոնք հնարավոր չի լինի մեղմել: Այն մտահոգությունները, որ փոշին կհասնի հարակից բնակավայրեր, Ջերմուկ, դրանք չեն հիմնավորվել», - ասաց Իվանյանը:

Խոսելով այն մասին, թե ինչու է Ամուլսարի ծրագրի համալիր փորձաքննության համար ընտրվել ELARD-ը, Իրավյանն ասաց. «Նկատի ունենալով, որ Լիդիան Արմենիայի կողմից հետազոտություններն իրականացվել էին աշխարհահռչակ հեղինակավոր կազմակերպութունների կողմից, խնդիր դրվեց, որպեսզի փորձաքննությունը իրականացվի նրանց չզիջող միջազգային կառույցի կողմից»:

Իվանյանը հավելեց, որ այս հարցով ՀՀ-ն նաև դիմել է EITI-ին՝ խորհրդատվության համար, և վերջիններս երաշխավորել են ELARD-ին, որպես տարածաշրջանի պրոֆեսիոնալ ընկերություն:

Նշենք, որ ELARD-ի փորձաքննական եզրակացությունը տարբեր մեկնաբանությունների առիթ է տվել: Օգոստոս 23-ին Ջերմուկում վարչապետ Նիկոլ Փաշինյանը հայտարարեց, որ պատրաստվում է ELARD-ի հետ սկայպ-կոնֆերանս անցկացնել՝ եզրակացության վերաբերյալ հստակ պատասխաններ ստանալու նպատակով:

15:31 Օգոստոս 26, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news