Ամուլսարում տեսչական ստուգումները կմեկնարկեն հուլիսի 6-ից

Ամուլսարում տեսչական ստուգումները կմեկնարկեն հուլիսի 6-ից

ԷկոԼուր

Հուլիսի 6-ից ՀՀ բնապահպանության և ընդերքի տեսչական մարմինը կմեկնարկի ստուգումներն Ամուլսարի ոսկու հանքավայրի շահագործման ծրագրի տարածքում: ԷկոԼուրի հետ զրույցում տեսչական մարմնի ղեկավար Արթուր Գրիգորյանը հայտնեց, որ ստուգումները նախատեսված է անցկացնել 10-օրյա ժամկետում, սակայն անհրաժեշտության դեպքում ժամկետը կարող է երկարաձգվել: Ստուգումներին կմիանա նաև տեսչական մարմնի ներքո ձևավորված Աշխատանքային խումբը: Դա կլինի այն ժամանակ, երբ կընդունվի աշխատանքային խմբի աշխատակարգը:

Աշխատանքային խումբը բաղկացած է մասնագիտական եզրակացություններ տրամադրող խմբից և այդ եզրակացությունները հիմնավորելու ու տեսչական աշխատանքների կազմակերպման հարցերում աջակցող խմբից:

Մասնագիտական եզրակացություններ տրամադրելու են ՀՀ բնապահպանության, էներգետիկ ենթակառուցվածքների և բնական պաշարների, արտակարգ իրավիճակների, առողջապահության, տնտեսական զարգացման և ներդրումների, ֆինանսների, մշակույթի, գյուղատնտեսության նախարարությունների ներկայացուցիչները, Վայրի բնության հիմնադրամի հայաստանյան մասնաճյուղը, ՀՀ ԳԱԱ Էկոլոգոնոոսֆերային հետազոտությունների կենտրոնը, ԵՊՀ-ից երկրաբան Հարություն Մովսիսյանը, Երևանի ճարտարագիտական համալսարանից Արմեն Հովհաննիսյանը, իրավաբան Նազելի Վարդանյանը:

Աջակցող խմբում ներգրավված են «ԷկոԼուր» տեղեկատվական ՀԿ-ն, «Հետաքննող լրագրողներ» ՀԿ-ն, Հայկական բնապահպանական ճակատի անդամ Լևոն Գալստյանը, քաղաքացիական ակտիվիստ Աննա Շահնազարյանը, ազդակիր համայնքների բնակիչներ Միհրդատ Ներսիսյանը, Հասմիկ Սարգսյանը, Ահարոն Արսենյանը, Արմեն Վարդանյանը և Թեհմինե Ենոքյանը: Կլինեն նաև ներկայացուցիչներ «Լիդիան Արմենիա» ընկերությունից:

Ուսումնասիրվելու են շինարարական աշխատանքների գործընթացը, ծրագրի ՇՄԱԳ հաշվետվության, դրան տրված փորձաքննական եզրակացության, պաշարների հաստատման գործընթացի, թույլտվությունների ստացման համար անհրաժեշտ փաստաթղթերը:

Արթուր Գրիգորյանը հայտնեց, որ Ամուլսարից հետո տեսչական մարմինը հաջորդ ստուգումը կանցկացնի Քաջարանի պղնձամոլիբդենային հանքավայրի տարածքում:

 

12:52 Հուլիս 04, 2018


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news