ԷկոԼուր
Հայաստանը եւ Ռուսաստանը միասին կաշխատեն ՀԱԷԿ-ի 2-րդ էներգաբլոկի շահագործման ժամկետի երկարաձգման ուղղությամբ: Նոյեմբերի 19-ին գործադիրը հավանություն տվեց Հայաստանի Հանրապետության կառավարության և Ռուսաստանի Դաշնության կառավարության միջև Հայկական ատոմային էլեկտրակայանի 2-րդ էներգաբլոկի շահագործման ժամկետի երկարաձգման վերաբերյալ համաձայանագրի առաջարկությանը: Ըստ այդմ Համաձայնագրի իրականացման նպատակով իրավասու մարմիններ կնշանակվեն հայկական կողմից ՀՀ էներգետիկայի և բնական պաշարների նախարարությունը, իսկ ռուսական կողմից «Ռոսատոմ» ատոմային էներգիայի պետական կորպորացիան:
Համագործակցությունն իրականացվելու է երկու փուլով: Ծրագրի իրականացման առաջին փուլն իր մեջ ներառում է ՀԱԷԿ-ի 2-րդ էներգաբլոկի սարքավորումների և կառուցվածքների համալիր ուսումնասիրությունը, ուսումնասիրությունների արդյունքներով հաշվետվությունների պատրաստումը, «ՀԱԷԿ-ի 2-րդ էներգաբլոկի շահագործման ժամկետի երկարաձգման նախապատրաստման ծրագրերի» մշակումը: Ծրագրի իրականացման երկրորդ փուլն իր մեջ ներառում է հետազոտական, հաշվարկային, անալիտիկ, նախագծային, կոնստրուկտորական, մոնտաժային և գործարկակարգաբերման աշխատանքները, որոնք ապահովում են ՀԱԷԿ-ի 2-րդ էներգաբլոկի նախապատրաստումը շահագործման երկարաձգմանը` համաձայն «ՀԱԷԿ-ի 2-րդ էներգաբլոկի շահագործման ժամկետի երկարաձգման նախապատրաստման ծրագրի», ինչպես նաև անհրաժեշտ սարքավորումների մատակարարումը:
Համաձայանգրի համաձայն` Կողմերի միջեւ կկնքվի Շրջանակային պայմանագիր, որում, ի թիվս այլոց կհստակեցվեն ՀԱԷԿ-ի 2-րդ էներգաբլոկի շահագործման ժամկետի երկարաձգման աշխատանքների ժամկետները:
Հիշեցնենք, որ ՀՀ կառավարության որոշմամբ ՀԱԷԿ-ի 2-րդ էներգաբլոկի շահագործման ժամկետի ավարտը սահմանվել է 2016թ:
Նոյեմբեր 20, 2014 at 17:26