Արարատյան դաշտում խնայված ջրի ծավալն ավելին է, քան Երևանի մեկ տարվա խմելու ջրի սպառված ծավալը. բնապահպանության նախարար

Արարատյան դաշտում խնայված ջրի ծավալն ավելին է, քան Երևանի մեկ տարվա խմելու ջրի սպառված ծավալը. բնապահպանության նախարար

ԷկոԼուր

Արարատյան դաշտում 2017 թ-ին խնայված ջրի ծավալն ավելին է, քան Երևանի մեկ տարվա խմելու ջրի փաստացի սպառված ծավալը: Այս մասին հայտարարեց ՀՀ բնապահպանության նախարար Արծվիկ Մինասյանը: Խնայվել է 2932.5 լ/վրկ ջուր, ինչը 64 խորքային հորերի փականային ռեժիմի բերման արդյունքն է:

Նախարարն ընդգծեց, որ անհրաժեշտ է Արարատյան դաշտում ստորերկրյա ջրառը նվազեցնել այն քանակի, որպեսզի այն չգերազանցի 1.1 միլիարդ խմ-ը, որը սահմանված է «Ջրի ազգային ծրագրի մասին» ՀՀ օրենքով: Համաձայն «Գիտական առաջադեմ տեխնոլոգիաների օգտագործում և համագործակցություն հանուն ռեսուրսների համալիր պահպանության» (ԳԱՏՕ) ծրագրի ուսումնասիրության՝ 2016 թ-ին Արարատյան դաշտում ստորերկրյա ջրառը ավելի քան 45 %-ով գերազանցել էր օրենքով սահմանված ծավալը: Ջրի հիմնական սպառողը ձկնաբուծական տնտեսություններն են:

Ըստ նախարարի` սույն թվականի մայիսի 15-ից սկսելու են ստուգումներն Արարատյան դաշտի ձկնաբուծական տնտեսություններում: «Մենք նախապես ծանուցել ենք բոլորին, որ իրենք պետք է համապատասխանեցնեն փաստացի ջրօգտագործման ծավալները ջրօգտագործման թույլտվությամբ սահմանված չափերին: Խոշոր ձկնաբուծական տնտեսությունները սեփական ուժերով պետք է տեղադրեն ավտոմատ կառավարման համակարգեր, որպեսզի մշտապես ունենանք տեղեկատվություն՝ որքան ջուր է օգտագործում այս կամ այն ձկնաբուծական տնտեսությունը: Նաև նախատեսում ենք պահանջ դնել կիսափակ ռեժիմի անցնելու համար, որպեսզի տնտեսություններն ավելի արդյունավետ օգտագործեն Արարատյան դաշտի ստորերկրյա ջուրը, որի անխնա օգտագործման արդյունքում մեր երկրում այդ հատվածի վրա ձևավորվել է բավական լուրջ էկոլոգիական վտանգ», - ասաց բնապահպանության նախարարը:

Բնապահպանության նախարարության տեղեկանքի համաձայն՝ 2017 թ-ի ընթացքում Արարատյան դաշտում գույքագրվել է 2807 հորատանցք, այդ թվում շահագործվող՝ 1795, չշահագործվող՝ 700, կոնսերվացված՝ 123, գույքագրված, բայց հետագայում լուծարված՝ 4, լցված՝ 158, կապարակնքված՝ 27: Նույն թվականին Արարատյան դաշտում գույքագրվել և հաշվառվել է 235 ձկնային տնտեսություն՝ 570 հորատանցքով: Գույքագրման պահին գործել է 135 տնտեսություն՝ 336 հորատանցքով: Գործող տնտեսությունների ընդհանուր ջրառը կազմում է 25652 լ/վրկ, իսկ հեռացվող ջրաքանակը՝ 22057.5 լ/վրկ:

18:49 Մայիս 10, 2017


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news