Չնայած ՀՀ կառավարության դեմ լինելուն՝ ՀՀ ԱԺ հանձնաժողովը դրական կարծիք տվեց Սևանից բացասական հաշվեկշռի դեպքում հավելյալ ջրառն արգելող օրինագծին

Չնայած ՀՀ կառավարության դեմ լինելուն՝ ՀՀ ԱԺ հանձնաժողովը դրական կարծիք տվեց Սևանից բացասական հաշվեկշռի դեպքում հավելյալ ջրառն արգելող օրինագծին

ԷկոԼուր

Սևանա լճից բացասական հաշավեկշռի դեպքում հավելյալ ջրառն արգելող օրինագծին ՀՀ ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովը հոկտեմբերի 14-ին դրական եզրակացություն տվեց՝ չնայած ՀՀ կառավարության բացասական դիրքորոշմանը: Օրինագիծը հեղինակել է հանձնաժողովի նախագահ Վարազդատ Կարապետյանը:

ՀՀ ԱԺ կայքի համաձայն՝ հանձնաժողովի նիստում նշվել է, որ 2008, 2012, 2014, 2017, 2018 թվականներին Սևանա լճից 170 մլն մ3 առավելագույն չափաքանակից ավելի ջրառ է իրականացվել: Լճի մակարդակի իջեցման հետևանքով մեծացել է ճահճացման վտանգը: Բնական ռեժիմի փոփոխությունը կհանգեցնի լճի եւ նրա ավազանի էկոլոգիական հավասարակշռության խախտմանը: Մասնագետները հաշվարկել են, որ Սևանա լճի էկոհամակարգի կայունացման միակ նախապայմանն է ջրի մակարդակի բարձրացումը:

«Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացում կատարելու մասին» օրենքի նախագծի նպատակն է բնակլիմայական պայմանների պատճառով լճի ջրային բացասական հաշվեկշռի պարագայում սահմանափակել ավելի ջրառի իրականացումը:
Հանձնաժողովի հավանությանն արժանացած օրինագիծը պետք է ընդգրկվի ԱԺ նստաշրջանի առաջիկա նիստերի օրակարգում:

Հիշեցնենք, որ սույն թվականի հոկտեմբերի 3-ին ՀՀ կառավարությունը հավանություն չտվեց այս օրինագծին: ՀՀ կառավարությունն իր մերժումը հիմնավորել էր նրանով, որ ջրի դեֆիցիտի մեղմման նպատակով Սևանա լճից ջրառ իրականացնելն այլընտրանք չունի` անկախ լճի տվյալ ժամանակաշրջանի հաշվեկշռից: Բացի այդ, նախագծով առաջարկվող սահմանափակման պարագայում անհրաժեշտություն կառաջանա ջրամատակարարումն իրականացնել խորքային հորերի շահագործմամբ, ինչը կհանգեցնի էլեկտրաէներգիայի ծախսերի ավելացման, հետևաբար՝ նաև ՀՀ պետական բյուջեից լրացուցիչ ծախսերի կատարման անհրաժեշտության: Կառավարությունը նախագծի ընդունման անհրաժեշտությունը համարել էր ոչ բավարար հիմնավորված և «Նորմատիվ իրավական ակտերի մասին» ՀՀ օրենքի 14-րդ հոդվածի պահանջներին չհամապատասխանող:

Հարց է առաջանում, թե Ազգային ժողովի պատգամավորներն ինչպես կքվեարկեն ՀՀ կառավարության մերժած օրինագծի օգտին:

 

16:02 Հոկտեմբեր 15, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news