Դալմայի այգիների ոչնչացումից 13 տարի անց Դալմայի նախկին հողօգտագործողները շարունակում են պահանջել իրենց հասանելիք փոխհատուցումը

Դալմայի այգիների ոչնչացումից 13 տարի անց Դալմայի նախկին հողօգտագործողները շարունակում են պահանջել իրենց հասանելիք փոխհատուցումը

ԷկոԼուր

Արդեն 13 տարի Դալմայի այգիների նախկին հողօգտագործողները պայքարում են իրենցից խլած հողերի դիմաց փոխհատուցում ստանալու համար: Նրանք հունվարի 26-ին հավաքվել էին ՀՀ նախագահական նստավայրի հարևանությամբ` իրենց հայտնի կանաչ պաստառով ՀՀ նախագահին հիշեցնելու Դալմայի այգիների հետ կապված խնդիրները:

«Մեզ պայմանագրով տրված Դալմայի այգիների հողերը, դեռ պայմանագրի ժամկետը չլրացած, մեր ձեռքից խլել են, տվել են մեծահարուստ ներդրողներին, հիմա պետք է դրա դիմաց փոխհատուցում տան: Մենք եկել ենք, որ նախագահը միջամտի, ասի, որ մեր արժանի փոխհատուցումը տան: 2004 թվականից մենք պայքարում ենք: 48 հողօգտագործող ենք եղել, 38-ին փոխհատուցում տվել են, մնացել ենք 11 հոգիս»,- ԷկոԼուրի հետ զրույցում ասաց Դալմայի այգիների նախկին հողօգտագործող Մանվել Արզոյանը: Նա նշեց, որ իր վարձակալած 2500 քմ հողատարածքի դիմաց իրեն վճարել են 900 դոլլար, դեռ 1500 դոլլար էլ պետք է վճարեն:

«Իմ հողը հատկացրել են հանրապետության երկրորդ նախագահ Ռոբերտ Քոչարյանին` առանց ինձ փոխհատուցում տալու: Քաղաքապետարանը մյուս ինվեստորներին դատի է տվել` փոխհատուցումը ստանալու համար, իսկ իմ դեպքում չեն կարող Ռոբերտ Քոչարյանին դատի տալ: Իմ հարցը մնացել է: Իմ հողատարածքը 2000 քմ է: Իմ այգում եղել է մոտ 720 հատ խաղողի թուփ, պոպոկի ծառներ են եղել, տանձ է եղել, խնձոր է եղել: Իսկ հիմա այդ տարածքում Ռոբերտ Քոչարյանի դաչան է, այնտեղ է ապրում»,- ասաց նախկին հոօգտագործող Բենիկ Փալազյանը:
«2005 թվականին 700 քմ հողատարածքի համար փոխհատուցում ստացել եմ` ներդրողի հետ խոսելով: 1240 քմ հողատարածքի համար պիտի փոխհատուցում տան: 1991 թվականին, երբ հողատարածքը վարձակալեցի, անմշակ էր, ես դարձրել եմ լիարժեք այգի: 2004թ-ի գարնանը գլխի ընկա, որ ծածուկ վաճառել են…: Ցանկապատ են կառուցել 5000 քմ մակերեսի վրա, ներսում ոչ մի գործ չի կատարվում»,- ասաց Վախթանգ Արշակյանը:

«Իմ այգու տարածքը 1500 մ քառակուսի է, ինձ ոչինչ չեն փոխհատուցել: Ջրերը կտրեցին, ծառերս չորացան, կիլիկիացիները կտրեցին, տարան, վառեցին: Այսօր մենակ ավել է աճում»,- ասաց Սարգիս Գրիգորյանը:

Հողօգտագործողները նշեցին, որ 2017թ-ի վերջին փոխհատուման պահանջով նամակ են ուղարկել ՀՀ կառավարություն: Պատասխանել է Երևանի քաղաքապետարանը` ասելով, թե խնդրով զբաղվում են: Ըստ հողօգտագործողների` Երևանի քաղաքապետարանը Դալմայի այգիների ներդրողներից դատական կարգով է փորձում ստանալ իրենց փոխհատուցումները:

Հիշեցնենք, որ Երևանի քաղաքապետարանը 2004թ-ից սկսած Դալմայի հողերը վաճառել է տարբեր անձանց և կազմակերպությունների` հողօգտագործողներին զրկելով իրենցիրավունքներից: Վարձակալների հայցերով տեղի են ունեցել բազմաթիվ դատական գործընթացներ: Սակայն նրանց` հողի նկատմամբ իրավունքը չի վերականգնվել: Օրհուսի կոնվենցիայի համապատասխանության կոմիտեն 2008թ. որոշում է ընդունել, որի համաձայն Դալմայի այգիների հետ կապված Հայաստանը խախտել է Օրհուսի կոնվենցիայի դրույթների մի քանի կետեր:

17:40 Հունվար 29, 2018


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news