ԷկոLուր
Հայաստանի կողմից Սնդիկի մասին Մինամատայի կոնվենցիան ստորագրելու հարցը դեռ բաց է մնում: Կոնվենցիան բաց է լինելու ստորագրման համար 2013թ. հոկտեմբերի 7-ից 11-ը Ճապոնիայի Մինամատա քաղաքում: Փաստաթղթին միացած երկրները պետք է հրաժարվեն սնդիկի առաջնային արդյունահանումից եւ հետեւեն սնդիկի վաճառքի եւ արդյունաբերական գործընթացներում սնդիկի օգտագործման հարցում մի շարք սահմանափակումների, ինչպես նաեւ պետք է միջոցառումներ անցկացնեն սնդիկային աղտոտումների նվազեցման ուղղությամբ:
«Հայ կանայք հանուն առողջության եւ առողջ շրջակա միջավայրի» ՀԿ-ի կազմակերպած հունիսի 28-ի գիտաժողովի ժամանակ քննարկման էին դրված սնդիկային աղտոտման խնդիրները եւ դրա հետ կապված միջազգային գործընթացները:
Որպեսզի Հայաստանը միանա Մինամատայի կոնվենցիային, պետք է որոշակի գործողություններ կատարվեն` մասնավորապես կոնվենցիայի տեքստի, կողմերի հնարավորությունների եւ պատասխանատվության քննարկում:
Կոնվենցիայում արտացոլված են սնդիկով շրջակա միջավայրի աղտոտման հիմնական ուղղությունները: Դրանք արդյունաբերական թափոններն են, հիմնականում հին ցերեկային լույսի լամպերը, բժշկական սարքավորումները, ցեմենտի արտադրությունը, հանքարդյունաբերությունը, քարածուխային սեկտորը:
Գիտաժողովի մասնակիցներն ընդունեցին, որ սնդիկի աղտոտման հետ կապված խնդիրները Հայաստանում իրականում գոյություն ունեն եւ լուծում են պահանջում: «Հայ կանայք հանուն առողջության եւ առողջ շրջակա միջավայրի» ՀԿ-ի մասնագետները չափել են սնդիկի պարունակությունը Սոտքի մթնոլորտում, լքված պոչամբարում, մի քանի ատամնաբուժարանների մոտ, աղբանոցներում եւ ցույց են տվել, որ սնդիկով աղտոտվածություն կա: Այդ աղտոտվածությունը կարող է աճել նաեւ Երեւանի ՋԷԿ-ի հաշվին, որը մտադիր են վերազինել քարածուխի օգտագործման համար:
Սնդիկը Հայաստանում արդյունահանող օգտակար հանածոներին ուղեկոցող տարր է, բայց դրանից առաջացող ռիսկերն արտացոլված չեն շրջակա միջավայրի վրա ազդեցության գնահատականում:
Ցեմենտի արտադրությունը սնդիկով աղտոտման աղբյուրներից մեկն է: Իսկ մեզ մոտ երկու խոշոր ցեմենտի գործարան կա Արարատում եւ Հրազդանում: Հնարավո՞ր է, որ Մինամատայի կոնվենցիան թույլ տա բացել ճշմարտությունը սնդիկային աղտոտվածության մասին: Սպասենք մինչեւ հոկտեմբեր:
Հուլիս 02, 2013 at 13:19