Բաց նամակ վարչապետին. Կոտայքում վտանգավոր թափոնների պահեստի ստեղծումն անթույլատրելի է

Բաց նամակ վարչապետին. Կոտայքում վտանգավոր թափոնների պահեստի ստեղծումն անթույլատրելի է

ԷկոԼուր

Մի շարք հասարակական կազմակերպություններ բաց նամակով դիմել են ՀՀ վարչապետ Կարեն Կարապետյանին՝ պահանջելով շրջանառությունից հանել Կոտայքում վտանգավոր քիմիական թափոնների ազգային պահեստավորման և կառավարման կենտրոնի ստեղծման ծրագիրը:

Նամակում ասված է.

«Մեծարգո՝ վարչապետ
Ձեզ ենք ներկայացնում մեր մտահոգությունը ՄԱԿ-ի զարգացման ծրագրի աջակցությամբ՝ ՀՀ արտակարգ իրավիճակների և ՀՀ բնապահպանության նախարարությունների կողմից համատեղ իրականացվելիք, մեկ միլիոն ԱՄՆ դոլլար արժեքով և անվտանգ քիմիկատների կառավարում լայնածավալ ծրագրի ենթաբաղադրիչ հանդիսացող, ժամկետանց պեստիցիդների պաշարների ոչնչացում և կայուն օրգանական ախտոտիչներով (ԿՕԱ) աղտոտված տարածքների ախտազերծում ծրագրի վերաբերյալ:

Ծրագրի շրջանակներում նախատեսվում է ՀՀ Կոտայքի մարզում առկա պահեստային տարածքի վերակառուցման հիման վրա ստեղծել վտանգավոր քիմիական թափոնների ազգային պահեստավորման և կառավարման կենտրոն: Ըստ ներկայացված նյութի տարածքը պետք է ծառայի, որպես միջանկյալ պահոց` Նուբարաշենից և այլ տեղամասերից հեռացված բարձր կոնցենտրացիայի ԿՕԱ պեստիցիդների և ԿՕԱ-ներով աղտոտված հողերի համար, նպատակ ունենալով կիրառել բնապահպանական տեսանկյունից անվտանգ եղանակեր դրանց ոչնչացման և արտահանման համար:

• Ըստ ծրագրի դրա հիմնական նպատակը այն ենթակառուցվածքի ստեղծումն է, որը թույլ կտա Հայաստանում ներդնել վտանգավոր թափոնների (ՎԹ) ախտազերծման և հողերի վերականգման տեխնոլոգիաներ: Առանց մանրամասնելու ծրագրի տեխնիկական առաջադրանքը, գտնում ենք, որ ծրագիրը շինծու և արհեստածին է, քանի որ Հայաստանը չունի ժամկետանց պեստիցիդների և կայուն օրգանական ախտոտիչների այնպիսի մնացորդային քանակներ, որի համար անհրաժեշտ է ստեղծել պահեստավորման նոր ենթակառուցվածք: Ծրագրում չի նշված թե Հայաստանի Հանրապետության, որ տարածքներում են առկա ենթադրայլ 24 ժամկետանց պեստիցիդային պահեստները:

• Ընտրված տեղամասը ՀՀ Կոտայքի մարզի Մ4 ստրատեգիական ավտոմայրուղու և Սևան-Հրազդան ջրատարի հարակից, 17 հեկտար մակերեսով այն տարածքն է, որը հանդիսանում է Սևանից ներծծվող ստորերկրյա ջրերի այն հորիզոների տարածք, որոնք սնում են Աբովյան, Գառնի հասնող և Երևանը խմելու ջրով ապահովող աղբյուրները:

Գտնում ենք, որ անթույլատրելի է նախատեսել որևէ վտանգավոր նյութեր պարունակող ենթակառուցվածքի՝ առավել ևս վտանգավոր թափոնների վնասազերծման տեխնոլոգիական բազայի ստեղծումը: Այս գաղափարը հղի է ապագայում Հայաստանը դարձնել վտանգավոր կայուն օրգանական ախտոտիչների թափոնների տեղադրման և վերամշակման վայր: Տեղին է նշել նաև, որ ընտրված տարածքը Հայաստանի Հանրապետության կենտրոնում գտնվող սակավաչափ սևահողային տարածք է, որը խիստ անհրաժեշտ է գուղատնտեսության համար:

• Հայաստանի Հանրապետությունը պատերազմող երկիր է և, ռազմավարական անվտանգության ապահովման տրամաբանությունից ելնելով, պետք է զարգանա դեպի մաքուր տեխնոլոգիաներ, այլ ոչ թե ստեղծի պատերազմի մեջ գտնվող երկրի համար ռազմավարական տեսակետից վտանգ ներկայացնող ևս մեկ օբյեկտ:

Հաշվի առնելով վերը նշվածը՝ հայտնում ենք մեր մտահոգությունը Հայաստանի կենտրոնում ստեղծվելիք վտանգավոր թափոների պահեստավորման ու վնասազերծման ազգային կենտրոնի ստեղծման վերաբերյալ և տեսնում ենք լուրջ խնդիրներ թե բնապահպանական, և թե ռազմավարական տեսանկյուններից: Համոզված ենք, որ Հայաստանի Հանրապետությունն ունի մարդկային բավարար ռեսուրսներ ու բարձր տեխնոլոգիաներ, ինչպես նաև զարգացած գյուղատնտեսություն ունենալու և տուրիզմը զարգացնելու հեռանկարներ:

Մեծարգո վարչապետ,
պահանջում և խնդրում ենք շրջանառությունից հանել ծրագիրը և մեզ ընդունել՝ խնդիրը Ձեզ հետ հանգամանորեն քնարկելու համար:

Հարգանքով՝
«ԷկոԼուր» տեղեկատվական ՀԿ-ի նախագահ Ինգա Զարաֆյան
«Էկո ակադեմիա» ՀԿ-ի նախագահ Գրետա Գաբրելյան
«Շողեր միություն» ՀԿ-ի նախագահ Հասմիկ Ասլանյան
«Դալմա-Սոնա հիմնադրամ» Ռուզաննա Ղազարյան
«Էկոլոգիական հասարակական միություն» ՀԿ-ի նախագահ, «Էկոլոգիական Հասարակական դաշինքի» համակարգող Սիլվա Ադամյան
Համահայկական բնապահպանկան Ճակատ քաղաքացիական նախաձեռնություն Լ.Գալստյան
«Թռչնասերների կենտրոն» ՀԿ-ի անդամ Կարինե Փանոսյան
«Հասարակական պաշտպանների միություն» ՀԿ-ի նախագահ Արամ Գրիգորյան
«Բիոսոֆիա» ՀԿ-ի նախագահ Գ.Պետրոսյան
«Civilvoice» ՀԿ-ի Տեղեկատվության և հասարակության հետ կապերի պատասխանատու Բաբկեն Հարությունյան
Նախաձեռնության համակարգող և պատասխանատու անձ«Էկոլոգիական հասարակական միություն»ՀԿ-ի նախագահ, «Էկոլոգիական Հասարակական դաշինքի» համակարգող `
Ս.Ադամյան»:

18:54 Հոկտեմբեր 04, 2016


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news