Երևանի մաքրությամբ կզբաղվի նաև համայնքը

Երևանի մաքրությամբ կզբաղվի նաև համայնքը

ԷկոԼուր

Մայրաքաղաքի վարչական տարածքում այսուհետ աղբահանության և սանիտարական, ինչպես նաև ձնամաքրման աշխատանքներ կիրականացնի նաև «Երևանի աղբահանություն և սանիտարական մաքրում» համայնքային հիմնարկը: Որոշման նախագծին հավանություն է տվել ավագանին՝ ապրիլի 23-ին կայացած նիստում: Այս մասին տեղեկանում ենք Երևանի քաղաքապետարանի պաշտոնական կայքից:

«Մենք գնում ենք նրան, որպեսզի աղբահանության խնդիրը լուծվի: Ցավոք սրտի, երբ մենք եկանք, ավագանու նոր կազմի մասին է խոսքը, Երևանն արդեն իսկ շատ մեծ և լուրջ խնդիրներ ուներ, և դա՝ ի շնորհիվ այն բանի, որ ընդամենը մեկ ընկերություն էր աշխատում մայրաքաղաքում: Մենք ստացել ենք սա որպես ժառանգություն, և սրա լուծումը տալիս ենք: Եվ եթե ինչ-որ մեկը մտածում է, որ մենք պետք է հապճեպ, սխալներ անելով ինչ-որ քայլեր անեինք, ո՛չ, մենք շատ հանգիստ, բոլոր նրբությունները հաշվի առնելով, բոլոր մանրուքները հաշվի առնելով, գնում ենք խնդրի հիմնական լուծմանը»,- ընդգծել է քաղաքապետ Հայկ Մարությանը:
Այն, որ Երևանում սանմաքրման հիմնական պատասխանատուն՝ «Սանիթեք» ընկերությունն, այսօր փաստացի չի կատարում պայմանագրային պարտավորությունները, փաստում է մայրաքաղաքում աղբահանության կազմակերպման առկա վիճակը: Որոշման նախագիծը ներկայացնող քաղաքապետի առաջին տեղակալ Հրաչյա Սարգսյանը մեկ անգամ ևս տեղեկացրել է, որ Երևան համայնքը թե ֆինանսական, թե իրավական բոլոր պարտավորությունները «Սանիթեք» ընկերության հանդեպ լիովին իրականացնում է:

«Ճիշտ կլինի, որ «Սանիթեք» ընկերությունը ներկայացնի պայմանագրային այն կետերը, որոնք խախտվել են, այլ ոչ թե էմոցիոնալ տարբեր հայտարարություններ անի: Իսկ այս պահի դրությամբ, ես ձեզ վստահեցնում եմ, որ մենք կազմակերպության կողմից որպես պայմանագրային կետի խախտում, որ համայնքն իրականացրել է, չենք ստացել»,- նշել է Հրաչյա Սարգսյանը:

Մինչ համայնքային նոր հիմնարկը կանցնի գործի, մայրաքաղաքում աղբահանության կազմակերպման առկա վիճակը հնարավորինս շտկելու նպատակով տեղերում ինքնաթափ մեքենաներ են վարձվել, որոնք հնարավորինս մաքրում են այն աղբը, որը չի հասցնում տեղափոխել «Սանիթեք»-ը:

«Հետագայում մենք միասին կորոշենք՝ Երևանը կմնա՞ որպես օպերատոր, թե՞, այնուամենայնիվ, պետք կլինի նորից մասնավոր բերել: Եվրոպական բոլոր զարգացած երկրները այս պահին գնում են նրան, որ և աղբահանության, և տրանսպորտի պարագայում համայնքը կամ պետությունն իր դերակատարումը, իր մասնաբաժինը պետք է ունենա: Մասնավոր ընկերությունը կարող է մի բան որոշել, կարող են խնդիրներ ունենալ, իրենք այդ պահին մոռանում են, զբաղվում են իրենց ֆինանսական խնդիրներով, բայց համայնքը ոչ մի վայրկյան իրավունք չունի մոռանալու այս խնդիրների մասին»,- ընդգծել է քաղաքապետը:

11:59 Ապրիլ 25, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news