ԷկոԼուր
Լոռու մարզի Գառգառ եւ Օձուն, Արագածոտնի մարզի Պարտիզակ, Տավուշի մարզի Աչաջուր եւ Գեղարքունիքի մարզի Վարդենիկ համայնքներում թաղված են ժամկետնանց թունաքիմիկատներ: Ներկայումս դրանք ուսումնասիրվում են` դրանց մեջ տոքսիկ նյութերի հայտնաբերման համար: Ոսումնասիրությունն անցկացնում է «Հայ կանայք հանուն առողջության և առողջ շրջակա միջավայրի» ՀԿ-ն: «Այդ պահեստները մնացել են խորհրդային ժամանակաշրջանից: Դրանց ավելացել են նաեւ այլ թափոններ: Եւ հիմա ոչ ոք չգիտի, թե այնտեղ կոնկրետ ինչ կա: Իսկ դրանց հարեւանությամբ մարդիկ են ապրում, կան գյուղատնտեսական տարածքներ, աճեցվում է միրգ ու բանջարեղեն»,- ասում է կազմակերպության բժիշկ-փորձագետ Քնարիկ Գրիգորյանը:
Կազմակերպությանն անհանգստացնում է մարդկանց եւ շրջակա միջավայրի համար անվտանգության միջոցառումների բացկայությունը: «Թունաքիմիկատները կարող են արտանետվել օդի, ջրի և բույսերի մեջ և, ներթափանցելով մարդկանց օրգանիզմ, առաջացնել նյարդային և շնչառական համակարգերի, երիկամների հիվանդություններ, խթանել չարորակ նորագոյացությունների զարգացումը»,- ասաց Քնարիկ Գրիգորյանը:
Այս խնդիրը բարձրացվեց համայնքներում հանդիպումների ժամանակ, երբ կազմակերպությունն անցկացրեց թունաքիմիկատների կուտակումների վերաբերյալ ուսումնասիրություններ: Կազմակերպության մասնագետները փորձանմուշներ վերցրեցին ինչպես թունաքիմիկատների պահեստներից, այնպես էլ գյուղատնտեսական տարածքների հողերից: Փորձանմուշների հետազոտությունների արդյունքները կհրապարակվեն: Հետազոտությունն իրականացվում է «Կայուն օրգանական աղտոտիչների թեժ կետերի մոտակայքում հողատարածք ունեցող ֆերմերների բարելավված առողջություն և շրջակա միջավայրի պաշտպանություն» ծրագրի շրջանակներում:
Հոկտեմբեր 10, 2014 at 12:23