«Վեոլիա ջուրը» Դիլիջանում ջրի նոր մաքրման կայան չի կառուցի՝ պատճառաբանելով, որ դա իր գործառույթը չէ

«Վեոլիա ջուրը» Դիլիջանում ջրի նոր մաքրման կայան չի կառուցի՝ պատճառաբանելով, որ դա իր գործառույթը չէ

ԷկոԼուր

Տավուշի մարզի Դիլիջան համայնքում տների ծորակներից շագանակագույն ջուր է հոսում: Այս մասին ԷկոԼուրին ահազանգեց Դիլիջանի բնակիչ Ազնիվ Հովհաննիսյանը: Նա նշեց, որ ընդհանրապես ծորակից հոսող ջուրն ունի դեղին գույն և հոտ, իսկ ներկայումս` ձնհալի և առատ տեղումների ժամանակ ջուրը դարձել է շագանակագույն:

««Ծորակի ջուրը խմելու չէ: Երբ նոր էի այստեղ տեղափոխվել, խմել եմ, հաջորդ օրը բացի փոքրիկիցս, ով շշի ջուր էր խմել, ընտանիքիս բոլոր անդամները աղիքային վարակով հիվանդացան», - ասաց Ազնիվ Հովհաննիսյանը: Նա նշեց, որ սույն թվականի ապրիլի 12-ին նամակով դիմել է ՀՀ առողջապահական և աշխատանքի տեսչական մարմնի ղեկավարին՝ խնդրելով ուշադրություն դարձնել համայնքի՝ երկար տարիներ չլուծվող ջրի խնդրին, ինչպես նաև՝ հարուցել վարչական վարույթ` ստուգելու խմելու ջրի որակը և վերահսկելու, որ «Վեոլիա ջուր» ընկերությունը մատակարարի պատշաճ, խմելու ենթակա ջուր:

«Վեոլիա Ջուր» ընկերության հանրային կապերի ծառայության պետ Մուրադ Սարգսյանն ահազանգի վերաբերյալ ԷկոԼուրին հայտնեց. «Դիլիջանի ջրի մաքրման կայանը շատ հին է, մաքրման հզորությունը՝ թույլ: Գարնան ու աշնան ամիսներին ակտիվ ձնհալների և առատ տեղումների ժամանակ դեպի կայան բավական մեծ քանակի պղտոր ջուր է հոսում: Մաքրման կայանում տեղակայված ֆիլտրերը չեն կարողանում ջրի մաքրման խնդիրը լիարժեք լուծել: «Վեոլիա Ջուր» ընկերությունը նախորդ տարի Դիլիջանի ջրի մաքրման կայանում նոր տեխնոլոգիաներ է դրել, որպեսզի ջրի հնարավորինս խորքային մաքրում ապահովվի: Դեկտեմբերից հետո ջրի որևէ խնդիր չենք ունեցել: Վերջին օրերին ակտիվ ձնհալ է, շատ մեծ քանակությամբ պղտոր ջուր է գալիս: Կայանը չի կարողանում դա մաքրել: Ջրանջատումները դրանով են պայմանավորված: Գտնում ենք, որ ավելի լավ է ջուր չտանք, քան թե վտանգենք մարդկանց առողջությունը: Փորձում ենք 4-ժամյա մատակարարաման գրաֆիկ կազմակերպել Դիլիջան քաղաքում»,- ասաց Մուրադ Սարգսյանը: Նա նշեց, որ խնդիրն արմատապես լուծելու համար Դիլիջանում պետք է ջրի նոր մաքրման կայան կառուցել: Կայանը պետք է կառուցի հայկական կողմը: Իսկ «Վեոլիա ջուր» ընկերության ներդրումային միջոցները պետք է ուղղվեն միայն իրենց վարձակալության հանձնված համակարգը շահագործելուն, պահպանելուն և վերանորոգելուն:

Դիլիջանի քաղաքապետարանից Ազնիվ Հովհաննիսյանին հայտնել են, որ խնդրի առնչությամբ դիմել են «Վեոլիա ջուր» ընկերությանը, պարզաբանումներ պահանջել: «Եթե պարզվի, որ ընկերութունն իր ուժերով չի կարող խնդիրը լուծել՝ ֆիլտրման նոր կայան կառուցել, կդիմեն կառավարություն»,- ասաց Ազնիվ Հովհաննիսյանը:

19:29 Ապրիլ 17, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news