ԷկոԼուր
2014թ-ին ՀՀ ջրային տնտեսության պետական կոմիտեն Համաշխարհային բանկի վարկային միջոցներով նախաձեռնեց Քաղցրաշենի ինքնահոս ոռոգման համակարգի կառուցման ծրագրի իրականացումը: Այս ծրագիրը հանդիպեց ՀՀ Կոտայքի մարզի Գառնի համայնքի բնակիչների և բնապահպանների դիմադրությանը: Ծրագրով նախատեսվում է «Խոսրովի անտառ» պետական արգելոցը սահմանագծող Ազատ գետի ջուր տանել Արարատի մարզի 13 համայնքների 387 հա նոր հողատարածքների ոռոգման համար և էլեկտրաէներեգիայի ծախսի խնայման համար: Գետում պետք է ապահովվի 850լ/վ բնապահպանական թողք:
Ազատի կիրճ
Ազատ գետ
Քաղցրաշենի ինքնահոս ոռոգման համակարգի փոփոխված ծրագրի ռիսկերը.
• Հացավանի պոմպակայանի կետից մինչև Ազատի ջրամբար` մոտ 6 կմ հատվածում, Ազատ գետի հունը կչորանա ջուր չլինելու պատճառով և Գառնիի կիրճն այդ տարածքում կանապատանա:
• Ազատի ջրամբարը, որը ոռոգում է 7100 հա հողատարածք, պակաս լցվածություն կունենա
• Կառաջանա սոցիալական լարվածություն և կմեծանա աղքատության մակարդակը
• Ազատի ջրամբարի չլցվածությունը պատճառ կլինի Սևանա լճից հավելյալ ջրառ իրականացնելու համար
• Կլիմայի փոփոխության բացասական ազդեցության մեղմացմանն ուղղված միջոցառումները չեն կարող իրականացվել
• Կփոխվի Գառնի կիրճի լանդշաֆտը, որը գրավում է զբոսաշրջիկներին
• Կառաջանա բացասական ազդեցություն Խոսրովի անտառ պետական արգելոցի վրա հատկապես արգելոցի սահմանային գոտում, որտեղ Ազատ գետը արգելոցի բնական սահմանն է
• Ազատի կիրճը կդադարի լինել զբոսաշրջային գոտի:
Հացավանի պոմպակայանի ջրառի կետ
Քաղցրաշենի ջրառի կետ
Քացրաշենի ծրագրի պոմպակայանի տարածք
Ազատի ջրամբար
Քաղցրաշենի ինքնահոս ոռոգման համակարգի փոփոխված ծրագիրը խախտում է հետևյալ «կանաչ» իրավունքները.
· ԱՌՈՂՋ ՇՐՋԱԿԱ ՄԻՋԱՎԱՅՐՈՒՄ ԱՊՐԵԼՈՒ ԻՐԱՎՈՒՆՔԻ ԽԱԽՏՈՒՄ- մարդիկ կզրկվեն ջրից, ապրուստի միջոցից, օդի ջերմաստիճանն կբարձրանա:
· ՍԵՓԱԿԱՆ ԳՈՐԾՈՒՆԵՈՒԹՅԱՆ ԸՆՏՐՈՒԹՅԱՆ ԻՐԱՎՈՒՆՔԻ ԽԱԽՏՈՒՄ- գյուղատնտեսական գործունեության և զբոսաշրջության զարգացման խոչընդոտներ
· ՈՐՈՇՈՒՄՆԵՐԻ ԿԱՅԱՑՄԱՆ ԳՈՐԾԸՆԹԱՑՈՒՄ ՄԱՍՆԱԿՑՈՒԹՅԱՆ ԻՐԱՎՈՒՆՔԻ ԽԱԽՏՈՒՄ- Քաղցրաշենի ինքնահոս ոռոգման համակարգի ծրագրի փորձաքննական դրական եզրակացությունը տրվել է` առանց Գառնիի բնակիչների կարծիքը հաշվի առնելու: Իսկ փոփոխված ծրագիրն ընդհանրապես փորձաքննություն չի անցել, հանրային քննարկումներ չեն կազմակերպվել:
· ՏԵՂԵԿԱՏՎՈՒԹՅԱՆ ՄԱՏՉԵԼԻՈՒԹՅԱՆ ԻՐԱՎՈՒՆՔԻ ԽԱԽՏՈՒՄ- Քաղցրաշենի փոփոխված ծրագիրն իրականացվում է առանց հանրային քննարկումների անցկացման, չնայած որ ծրագրի փոփոխությունը պահանջում էր նոր փորձաքննություն և հանրային քննարկման մասին ծանուցում և անցկացում:
· ԲՆԱԿԱՆ ՊԱՇԱՐՆԵՐԻ ՄԱՏՉԵԼԻՈՒԹՅԱՆ ԵՎ ԿԱՅՈՒՆ ՕԳՏԱԳՈՐԾՄԱՆ՝ ՋՐԻ, ՀՈՂԻ, ԸՆԴԵՐՔԻ, ԱՆՏԱՌՆԵՐԻ, ԲՈՒՍԱԿԱՆ ԵՎ ԿԵՆԴԱՆԱԿԱՆ ԱՇԽԱՐՀԻ, ԷԿՈՀԱՄԱԿԱՐԳԵՐԻ ԵՎ ԼԱՆԴՇԱՖՏՆԵՐԻ ՊԱՀՊԱՆՄԱՆ ԻՐԱՎՈՒՆՔԻ ԽԱԽՏՈՒՄ-մարդիկ զրկվում են ջրից: ՀՀ Անկախության հռչակագիր, հոդված 7. Հայաստանի Հանրապետության ազգային հարստությունը՝ հողը, ընդերքը, օդային տարածությունը, ջրային և այլ բնական պաշարները, տնտեսական, մտավոր, մշակութային կարողությունները, նրա ժողովրդի սեփականությունն է:
· ՎՆԱՍԻ ՀԱՏՈՒՑՄԱՆ ԻՐԱՎՈՒՆՔԻ ԽԱԽՏՈՒՄ- Ազատի ջրամբարի չլցվելու դեպքում 7100 հա հողատարածք մնալու է անջրդի: Որևէ փոխհատուցում այդ հողատարածքների սեփականատերերի համար նախատեսված չէ:
· ՊԱՇՏՊԱՆՈՒԹՅԱՆ ԻՐԱՎՈՒՆՔԻ ԽԱԽՏՈՒՄ- Գառնիի ակտիվիստների վրա իրականացվել է ճնշում, հնչել են սպառնալիքներ
Բնակիչների իրավունքների պաշտպանության համար իրականացվել են հետևյալ գործողությունները՝
- 2014 թ-ից հասարակական սեկտորի կողմից «կանաչ» իրավունքների վերաբերյալ բնակչության շրջանում պարբերաբար իրազեկվածության բարձրացում
- Իրավաբանական խորհրդատվություն
- Ստորագրահավաք բազմաթիվ նամակ-դիմումների համար` ուղղված ՀՀ Նախագահին, վարչապետին, ՀՀ բնապահպանության նախարարությանը, Ջրային տնտեսության պետական կոմիտեին, Համաշխարհային բանկին
- Անցկացվել են հանդիպումներ և քննարկումներ ՀՀ վարչապետ Հովիկ Աբրահամյանի, Համաշխարհային բանկի ներկայացուցիչների, փորձագետների, Կոտայքի մարզպետի, ՀՀ բնապահպանության նախարարի, ծրագրի պատասխանատուների և Գառնիի բնակիչների և քաղաքացիական հասարակության ներկայացուցիչների միջև Քաղցրաշենի ծրագրի վերաբերյալ:
- Բազմաթիվ բողոքի ակցիաներ 2015-2016 թվականներին
- Խնդրի հանրայնացում, լրատվամիջոցների ներգրավում, մամլո հաղորդագրությունների պատրաստում և տարածում
Բողոքի ակցիաներ
Արդյունքներ
- Քաղցրաշենի ինքնահոս ոռոգման ծրագրի ջրառի կետը փոխվեց` հեռացվելով «Քարերի սիմֆոնիա» բնության հուշարձանի և հանգստյան գոտու տարածքից
- Ծրագիրը 2017թ-ին շրջանցեց Գառնիի հողատերերի մի մասի տարածքները
- Եվրասիական բանկի ֆինանսավորմամբ Գառնի համայնքում ամբողջությամբ պետք է վերանորոգվի ոռոգման ներտնտեսային ցանցը և գյուղը սնող մայր ջրանցքի 6 կմ հատվածը
- Պայքարը ներկայումս պասիվացել է: Ազատ գետի հունի չորացման, Ազատի ջրամբարի չլցվելու և 7100 հա հողատարածքների անջրդի մնալու և կլիմայական պայմանների վատթարացման, ջրառի կետից մինչև Ազատի ջրամբար ընկած շուրջ 6 կմ տարածքում անապատացման գործընթացների ակտիվացման, կենսաբազմազանության ոչնչացման ռիսկերը չեն վերացել:
Ծրագրի պատասխանատուներն են`
ՀՀ կառավարությունը
ՀՀ ջրային տնտեսության պետական կոմիտեն
Համաշխարհային բանկը
ՀՀ բնապահպանության նախարարությունը
ՀՀ տարածքային կառավարման և զարգացման նախարարությունը
ՀՀ գյուղատնտեսության նախարարություն
ՀՀ տնտեսական զարգացման և ներդրումների նախարարություն
Տեղական ինքնակառավարման մարմինը
ՔԱՂՑՐԱՇԵՆԻ ԻՆՔՆԱՀՈՍ ՈՌՈԳՄԱՆ ՀԱՄԱԿԱՐԳԻ ԾՐԱԳՐԻ «ԿԱՆԱՉ» ԻՐԱՎՈՒՆՔՆԵՐԻ ԽԱԽՏՈՒՄՆԵՐԻ ՌԵԵՍՏՐ-ԳՈՐԾԻՔ (Հայ.)
Մարտ 30, 2018 at 20:31