«Դարանակ» փոքր ՀԷԿ-ի շահագործումը դադարեցնելու խնդրանքով բնակիչները դիմել են ՀՀ վարչապետ Նիկոլ Փաշինյանին

«Դարանակ» փոքր ՀԷԿ-ի շահագործումը դադարեցնելու խնդրանքով բնակիչները դիմել են ՀՀ վարչապետ Նիկոլ Փաշինյանին

ԷկոԼուր

Գեղարքունիքի մարզի Գեղամասար համայնքի Դարանակ բնակավայրի բնակիչները 42 ստորագրությամբ նամակ են ուղարկել ՀՀ վարչապետ Նիկոլ Փաշինյանին՝ խնդրանքով դադարեցնել «Դարանակ» փոքր ՀԷԿ-ի շահագործումը: Նամակի կրկնօրինակը ուղարկվել է ՀՀ բնապահպանության նախարար Էրիկ Գրիգորյանին:

Նամակում նշված է.

«Դարանակ գյուղը վերաբնակեցվել է 1988-1989 թթ-ին՝ Ադրբեջանից գաղթած հայ փախստականների կողմից: Համայնքի բնակիչների հիմնական զբաղմունքը անասնաբուծությունն ու այգեգործությունն է:

Դարանակի ոռոգման և խմելու ջրի միակ աղբյուրը ձորակից հոսող գետն է, որը թափվում է Սևանա լիճ: 2015 թ-ին ապօրինաբար կառուցվեց «Դարանակ» փոքր ՀԷԿ-ը: Այն շահագործվելուց հետո փակվեց մոտավորապես 6 կմ երկարություն ունեցող գետի հունը` խախտելով բնապահպանական բոլոր անհրաժեշտ չափորոշիչները: Վերացան համայնքի ոռոգման, խմելու ջրի բոլոր աղբյուրները: Համայնքը բնակիչների սեփական ուժերով գոյատևել է 30 տարի` չստանալով որևէ աջակցություն պետության կողմից: Այսօր Դարանակ գյուղը կանգնած է ոչնչացման եզրին: Խնդրում ենք դադարեցնել ՀԷԿ-ի շահագործումը, որ կործանարար է և նպաստում է գյուղի համատարած դատարկմանը»:

Դարանակի բնակչուհի Գյուլնազ Գրիգորյանը, ով վարչապետին է ուղարկել բնակիչների նամակը, ԷկոԼուրի հետ զրույցում նշեց, որ ի սկզբանե դեմ է եղել ՓՀԷԿ-ի կառուցմանը, և իր կարծիքն արտահայտել է ժամանակին անցկացված հանրային լսումների ժամանակ: Սակայն ՓՀԷԿ-ը կառուցվեց, և գյուղը հայտնվեց ջրի լուրջ խնդրի առջև:

«Ոռոգում, խմելու ջուր, ամբողջ Դարանակ գետից ենք օգտվում: Երկու ձորակով է իջնում ջուրը, երկու ձորակի ջուրն էլ մտցված է խողովակների մեջ, մենք ջուրը չենք տեսնում: Անասունն էլ, որ գնում է սարն արոտի, հետ է գալիս, գյուղամեջում է ջուր խմում: Մենք խնդրում ու պահանջում ենք, որ ՀԷԿ-ն իր աշխատանքը դադարեցնի, գետը գնա իր հունով», - ասաց Գյուլնազ Գրիգորյանը:

Նշենք, որ «Դարանակ» ՓՀԷԿ-ը կառուցված է Սևանա լիճ թափվող Մասրիկի վտակ Դարանակ գետի և վերջինիս ձախակողմյան վտակ Տանալիխ գետի վրա: ՓՀԷԿ-ի կառուցումը համաֆինանսավորվել է Գերմանա-Հայկական հիմնադրամի «Վերականգնվող էներգետիկա» ծրագրի 2-րֆ փուլի շրջանակներում գերմանական KfW բանկի միջոցներով:

ԷկոԼուրը 2017 թ-ին մոնիտորինգ է իրականացրել ՓՀԷԿ-ում և հայտնաբերել մի շարք խախտումներ: Մոնիտորինգի արդյունքները՝ այստեղ:

17:42 Մարտ 05, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news