ԷկոԼուր
Այսուհետ «Շրջակա միջավայրի մոնիթորինգի և տեղեկատվության կենտրոն», «Անտառային մոնիթորինգի կենտրոն» և «Հիդրոօդերևութաբանության և մթնոլորտային երևույթների վրա ակտիվ ներգործության ծառայություն» պետական ոչ առևտրային կազմակերպությունների (ՊՈԱԿ) գործառույթները կվերապահվեն «Հիդրոօդերևութաբանության և մոնիթրինգի կենտրոն» ՊՈԱԿ-ին:
Գործադիրը ս. թ. հունվարի 30-ին միաձայն ընդունեց վերոնշյալ երեք կառույցների վերակազմակերպմամբ նոր ՊՈԱԿ ստեղծելու մասին որոշումը:
Ըստ որոշման նախագծի՝ «Հիդրոօդերևութաբանության և մոնիթորինգի կենտրոն» ՊՈԱԿ-ը համարվում է վերոնշյալ 3 կազմակերպությունների իրավահաջորդը՝ ստանձնելով միաձուլման ձևով վերակազմակերպված իրավաբանական անձանց իրավունքներն ու պարտականությունները: Համաձայն նախագծի հիմնավորման՝ նախագծի հիմքում դրված է «շրջակա միջավայրի մոնիթորինգ»-ի միասնական ապահովման գաղափարը և դրա մշակման և իրականացման քաղաքականությունը:
ՀՀ կառավարության անդամներին ներկայացնելով նոր նախագիծը՝ ՀՀ շրջակա միջավայրի նախարար Էրիկ Գրիգորյանը նշեց. «Ստեղծում ենք միասնական շրջակա միջավայրի մոնիթորինգի համակարգ: Այս միավորված կառույցը միտված է լինելու միասնական շրջակա միջավայրի մոնիթորինգի ապահովմանը, ինչպես նաև՝ տարբեր երևույթների մեջ պատճառահետևանքային կապերը բացահայտելուն և մեր հասարակությանը տեղեկատվությունը տալուն: Մինչ այժմ բաշխված է տարբեր գերատեսչությունների միջև: Անտառային մոնիթորինգը նախկինում Գյուղատնտեսության, Արտակարգ իրավիճակների նախարարության կազմում էր, հիմա կմիավորվի, տեխնիկապես կվերազինվի»:
«Հիդրոօդերևութաբանության և մոնիթորինգի կենտրոն» պետական ոչ առևտրային կազմակերպությանը կվերապահվեն ձեռնարկատիրական գործունեության հետևյալ տեսակները`
1) լաբորատոր հետազոտությունների և անալիզների իրականացում.
2) հիդրոերկրաբանական տեղեկատվությունների (խորհրդատվությունների) կազմում և տրամադրում.
3) ստորերկրյա ջրերի հանքավայրերի լոկալ կամ փոքր տեղամասերում սահմանափակ տեխնածին գործոնների ազդեցությամբ ձևավորվող ստորերկրյա ջրերի ռեժիմի հատուկ դիտողական ցանցի դիտակետերում ջրերի քանակի և որակի ուսումնասիրությունների իրականացում,
4) հիդրոօդերևութաբանական տեղեկատվության տրամադրում և մասնագիտացված հիդրոօդերևութաբանական ծառայությունների մատուցում.
5) մթնոլորտային երևույթների ռադիոլոկացիոն դիտարկումներ և համապատասխան տեղեկատվական ծառայությունների մատուցում,
6) աշխարհատեղեկատվական համակարգի և հեռազննման տեխնոլոգիաներով հետազոտությունների իրականացում.
Նշենք, որ մինչ այս «Հիդրոօդերևութաբանության և մթնոլորտային երևույթների վրա ակտիվ ներգործության ծառայություն»-ը գտնվում էր Արտակարգ իրավիճակների, իսկ «Շրջակա միջավայրի մոնիթորինգի և տեղեկատվության կենտրոն»-ը և «Անտառային մոնիթորինգի կենտրոն»-ը՝ Շրջակա միջավայրի նախարարության կազմում:
Հունվար 30, 2020 at 16:44