Նիկոլ Փաշինյանը Ջերմուկից հեռացավ առանց համաձայնություն ձեռք բերելու. Ամուլսարի հանքի դեմ ակցիաները կշարունակվեն

Նիկոլ Փաշինյանը Ջերմուկից հեռացավ առանց համաձայնություն ձեռք բերելու. Ամուլսարի հանքի դեմ ակցիաները կշարունակվեն

ԷկոԼուր

ՀՀ վարչապետ Նիկոլ Փաշինյանն հուլիսի 6-ին Ջերմուկ քաղաքում հանդիպեց Ամուլսարի ոսկու հանքավայրի շահագործման ծրագրի դեմ պայքարող ցուցարարներին, բնապահպաններին և ծրագիրն իրականացնող «Լիդիան Արմենիա» ընկերության ներկայացուցիչներին:

Մինչ դահլիճային հանդիպումը Նիկոլ Փաշինյանը ուղղաթիռից ծանոթացել էր Ամուլսարի հանքի տարածքին ու շրջակա միջավայրին։ «Եթե մենք հիմա գտնվեինք գործընթացի նախնական փուլում, իմ կարծիքը կլիներ ուղղակի քաղաքական որոշում` պետք չէ Ջերմուկի մոտ որևէ հանք ունենալ, - հանդիպման մեկնարկին ասաց վարչապետը և շարունակեց, - բայց մենք դե յուրե ունենք իրավիճակ, երբ հանքի շահագործման համար աշխատանքների 80 տոկոսն արդեն արված է: Սա իրավիճակ է, որի հետ պետք է հաշվի նստենք, և ցանկացած որոշում պետք է կայացված լինի փաստերի հիման վրա»:

Նիկոլ Փաշինյանը նշեց, որ այսօրվանից Ամուլսարում մեկնարկում են տեսչական ստուգումներ, և խնդրի հանգուցալուծման համար պետք է գտնել երկու հարցի պատասխան. առաջինը` կունենա՞ արդյոք Ամուլսարի ծրագիրը բացասական ազդեցություն ջրային ռեսուրսների վրա, երկրորդը` կունենա՞ արդյոք ծրագիրը բացասական ազդեցություն Ջերմուկ քաղաքի հետագա զարգացման վրա` որպես առողջարանային և զբոսաշրջային կենտրոնի: Նիկոլ Փաշինյանն առաջարկեց գտնել այս հարցերի պատասխանը ՀՀ կառավարության, «Լիդիան Արմենիա»-ի և տեղի բնակիչների ներգրավածությամբ:

«Իմ կարծիքը պետք է ձևավորվի այս երկու հարցերի փորձագիտական հիմնավորված պատասխանների վրա: Ցանկացած որոշում` և նեգատիվ, և պոզիտիվ, ունի իր գինը: Առաջարկում եմ եռակողմ մեխանիզմ ստեղծենք, որպեսզի այս երկու հարցերի պատասխանը գտնենք: Մեզ պետք է փորձագիտական ապացուցված գնահատական, մի պատասխան, որը ապացուցելի լինի», - ասաց վարչապետը:

Նիկոլ Փաշինյանը բարձրաձայնեց մի վարկածի մասին, որի համաձայն Ամուլսարի ծրագրի դեմ բողոքի ակցիաները կազմակերպված բնույթ են կրում: Սա առաջացրեց հանդիպմանը ներկա ցուցարարների վրդովմունքը:

«Ուզում եմ ասել, որ ինչ ասելու եմ, պետք է դիտարկել որպես կարծիք: Ինձ, որպես վարչապետի, ասել են, որ կարող է լինի նաև այսպիսի վարկած, որ իրականում հանքի հետ կապված այս պատմության ողջ իմաստն այն է, որ ինչ-որ մարդիկ ուզում են ստեղծել ինչ-որ իրավիճակ, որպեսզի Հայաստանին մեծ դատական գործընթացների մեջ ներքաշեն: Ես չեմ ասում` կա այդպիսի բան և չեմ ասում, որ չկա այդպիսի բան: Հիմա ինչն է ինձ ամենաշատը մտահոգում. եթե մեր խոսակցության մեջ լինեն մարդիկ, լինեն սուբյեկտներ, ովքեր ասեն, որ մեզ չեն հետաքրքրում փաստերը, մենք ունենք մեր ճշմարտությունը, սա խնդիր է: Ես հույս ունեմ, որ բոլոր ներկաները համոզված են, որ մենք և կոնկրետ ես այս հարցում ոչ մի շահադրում չունեմ, բացի ՀՀ-ի հավասարակշռված շահը: Գուցե ինձ համար ամեն ծառն ավելի թանկ է, քան ցանկացած երևույթ, բայց վարչապետի պաշտոնում ես պետք է լինեմ հավասարակշռված», - ասաց Փաշինյանը:

ՀՀ բնապահպանության և ընդերքի տեսչական մարմնի ղեկավար Արթուր Գրիգորյանն ասաց, որ համապարփակ ստուգումներ են անցկացվելու: Ստուգումներին ներգրավված է աշխատանքային խումբ, որը կազմված է մասնագիտական եզրակացություն տրամադրող փորձագետներից և աջակցող առանձին խմբից: Արթուր Գրիգորյանը նշեց, որ ստուգումների համար մեթոդաբանություն, որպես այդպիսին, հնարավոր չէ մշակել:

Ի պատասխան «Լիդիան Արմենիա»-ի կայուն զարգացման գծով ավագ մենեջեր Արմեն Ստեփանյանը նշեց, որ մեթոդաբանություն ունենալը շատ կարևոր է: «Առանց մեթոդաբանության հստակեցման հնարավոր չէ սկսել և հիմնվել արդյունքների վրա: Մեր ուսումնասիրություններն անց են կացվել հստակ մեթոդաբանության վրա: Կոչ ենք անում հավասարակշռված փորձագետների խումբ հավաքել, ոչ թե մարդկանց, ովքեր տարիներ շարունակ Ամուլսարի քննադատությամբ են զբաղվել: Ընկերությունը հետաքրքրված է, եթե սկսվել է գործընթաց, հիմքերը լինեն ճիշտ` ճիշտ մեթոդաբանություն, ճիշտ մարդիկ, որպեսզի ճիշտ փաստերի հավաքագրում անցկացնեն», - ասաց Արմեն Ստեփանյանը:

«Խնդիրն այն է, որ մենք չունենք մշակված մեթոդաբանություն, բայց մենք ունենք օրենսդրական հենք` ինչպես անցկացնել գործընացը: Տվյալ պարագայում մի կողմից տեսչական մարմինը իրականացնում է օրենքով իրեն վերապահված լիազրությունները` ներգրավելով իր կողմից ընդունելի փորձագետների, որոնք աջակցելու են ստուգումներին: Մյուս կողմից կան գերատեսչություններ, որոնք տիրապետում են փաստաթղթերի, և այդ փաստաթղթերը ևս պետք է ուսումնասիրվեն», - արձագանքեց տեսչական մարմնի ղեկավար Արթուր Գրիգորյանը:

ՀՀ վարչապետ Նիկոլ Փաշինյանը միջամտեց` նշելով, որ Հայաստանի պետությունը չունի իր սեփական ուսումնասիրությունը ջրային ռեսուրսների և Ջերմուկի վրա ծրագրի հնարավոր ազդեցության վերաբերյալ, և պետք է գիտական ուսումնասիրություն անցկացնել, որի համար ժամանակ է հարկավոր: Վարչապետը բնակիչներից և ընկերությունից հետաքրքրվեց` տալիս են արդյոք նրանք այդ ժամանակը: Բնակիչները համաձայնեցին, իսկ ընկերությունը` ոչ: «Լիդիան Արմենիա» ընկերության գլխավոր տնօրեն Հայկ Ալոյանն ասաց, որ այդ ուսումնասիրության համար 3 ամիս կպահանջնվի, իսկ իրենց համար յուրաքանչյուր չաշխատած օրը գումարների կորուստ է:

«Սա շատ բացասական ազդակ է բոլոր միջազգային ներդրողների համար: Մենք բոլոր փաստաթղթերն ունենք, եթե ինչ-որ հարցեր կան, դրանք ընկերության գործունեության վրա պետք է չազդեն», - ասաց նա:

Նիկոլ Փաշինյանն արձագանքեց խիստ. «Հիմա դուք ուզո՞ւմ եք, որ այս հարցը հանգուցալուծվի, թե չեք ուզում: Ինձ ասել են, որ դուք ձեր տնօրենին փոխել եք և բերել եք մի մարդու, որը մասնագիտացված է ոչ թե հանքի շահագործման մեջ, այլ պետություններին դատի տալու մեջ: Դա ճի՞շտ է, թե ճիշտ չէ»:

Հարցին արձագանքեց «Լիդիան Ինթերնեյշնլ»-ի նոր նախագահ և գլխավոր գործադիր տնօրեն Ժոաո Կարելլիոն. «Ես աշխատել եմ միայն պատասխանատու ընկերությունների հետ, ես հանքարդյունաբերության ինժեներ եմ և երբևէ չեմ մասնակցել որևէ միջազգային արբիտրաժային գործընթացի»:

Այնուհետև Ժոաո Կարելլիոն ասաց. «Վերջին երկու ամսվա ընթացքում ընկերությունը 26 օր չի ունեցել աշխատելու հնարավորություն: Երբ ներդրողները նայում են այս իրավիճակին, հարցնում են` արդյո՞ք պետք է շարունակենք ներդրումները, թե թողնենք: Միջազգային հանրությունը հետևում է այս գործընթացին, իսկ ստուգումները կարող են անցկացվել զուգահեռաբար մեր աշխատանքներին»:

Ամուլսարի ծրագրի դեմ պայքարող քաղաքացիները չհամաձայնեցին այս տարբերակի հետ, վարչապետ Փաշինյանը հեռացավ Ջերմուկից` առանց ընդհանուր համաձայնություն ձեռք բերելու: Ցուցարարները հայտարարեցին, որ շարունակելու են փակ պահել դեպի Ամուլսարի հանք տանող ճանապարհը: «Ժողովուրդը դեմ է, որ հանքը շահագործվի, մենք մինչև վերջ կանգնելու ենք: Առողջարանային քաղաքում հանքարդյունաբերությունը հանցագործության հավասար բան ենք համարում», - ասացին ջերմուկցիները:

 

14:37 Հուլիս 06, 2018


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news