Էկոլուր
«Էկոլուր» տեղեկատվական կազմակերպությունը պահանջում է հասարակական լսումներ անցկացնել ռադիոակտիվ և այլ վտանգավոր քիմիական թափոնների նոր գերեզմանոցի կառուցման վերաբերյալ: ՀՀ կառավարության 2009 թ. հուլիսի 23-ի թիվ 836-Ն որոշմամբ Արարատի մարզի Զանգակատուն և Ուրցալանջ գյուղերի տարածքում աշխատանքներ են իրականացվում ռադիոակտիվ, վտանգավոր քիմիական նյութերի և թափոնների գերեզմանոցի տեղագրման համար: Մեզ անհանգստացնում են հետևյալ հարցերը.
Կոնկրետ ինչ թափոններ և ո՞ր գործարանների/կազմակերպությունների թափոնները պետք է թաղվեն գերեզմանոցում: Ինչու՞ Զանգակատուն գյուղում չեն անցկացվել հասարակական լսումներ, արդյո՞ք առկա է այս հարցող պետական փորձաքննության եզրակացությունը շրջակա միջավայրի վրա ազդեցության վերաբերյալ, և եթե այն կա, ապա ի՞նչ փաստաթղթեր են ընկած այդ եզրակացության հիմքում:
Նշենք, որ Զանգակատուն համայնքում հորատման աշխատանքները սկսել են այս տարվա ապրիլին առանց գյուղի բնակչությանը և ղեկավարությանը զգուշացնելու: Աշխատանքներն իրականացնում է «Երևանի պետական համալսարանի երկրաբանական հետազոտությունների կենտրոն» ՍՊԸ-ը: Զանգակատուն գյուղի բնակիչների անհանգստությունն այնքան է աճել, որ վերջիններս փակել են ճանապարհը և վռնդել են հորատողներին իրենց տարածքից: Արարատի մարզի մարզպետ Վարդգես Հովակիմյանի հետ հանդիպման ժամանակ բնակիչները ներկայացրել են ծրագրի դեմ իրենց փաստարկները: Մասնավորապես,
• Գյուղի սահմանի և գերեզմանոցի կառուցման հնարավոր վայրի հեռավորությունը ընդամենը 600-700 մ է:
• Ընտրված տարածքը գտնվում է ցանքատարածությունների և արոտավայրերի համար նախատեսված համայնքային հողերի կենտրոնում:
• Երեք գյուղերի` Պարույր Սևակ, Տիգրանաշեն և Երասխ գյուղերի ոռոգման ջրի խողովակները հորատողների աշխատանքի վայրից ընդամենը 200 մ հեռավորության վրա են:
• Գերեզմանոցի համար ընտրված տարածքում ապրում են բույսերի և կենդանիների Հայաստանի Կարմիր գրքում գրանցված տեսակներ:
Վերոնշյալ ծրագրի իրականացման ընթացքում թափանցիկության բացակայությունը հանգեցրել է Զանգակատուն գյուղում իրավիճակի սրմանը, և պատճառ է հանդիսացել, որ աշխատանքների ղեկավար Մարատ Գրիգորյանը դիմի կառավարությանը` աշխատանքների իրականացման ժամանակ իր աշխատանքային խմբի անվտանգությունը ապահովելու նպատակով:
Մայիս 31, 2010