ԷկոԼուր
«Կոչնչանան անտառները ոչ միայն այն տարածքում, որտեղ հանքը շահագործվելու է, այլեւ վերադիր անտառները, որովհետեւ դրենաժային ջուրը կիջնի դեպի այդ խոռոչը եւ կչորանան վերեւի վերադիր անտառները: Այստեղ ջրային ռեսուրսների խիստ աղտոտում, եթե անտառը վերանում է, կենսաբազմազանության վերացում, այստեղից նաեւ ջրային ռեժիմի վրա ազդեցություն, կլիմայի փոփոխության վրա ազդեցություն եւ այդ տարածաշրջանի ամբողջ էկոհամակարգի հսկայական ազդեցություն կլինի»: Թեղուտի պղնձամոլիբդենային հանքավայրի շահագործման հետեւանքով առաջացող էկոլոգիական բացասական հետեւանքները «ԷկոԼուր»-ի հետ զրույցում թվարկեց «Հանուն կայուն զարգացման» ասոցիացիայի նախագահ Կարինե Դանիելյանը:
Թեղուտի հանքի շահագործման ընթացքում հատվելու է 357 հա անտառ:
«Եթե համեմատենք, այն տնտեսական օգուտը, որը պետք է լինի, եւ այն բնապահպանական վնասը, որը դառնալու է նաեւ տնտեսական վնաս, ապա նրանք անհամեմատելի են, որովհետեւ շատ կարճաժամկետ լինելու է տնտեսական օգուտ եւ հավերժ լինելու է էկոլոգիական վնաս, որը դառնալու է ե’ւ առողջապահական վնաս, ե’ւ տնտեսական վնաս»,- ահազանգեց Կ. Դանիելյանը:
1991թ. տվյալներով Հայաստանի անտառածածկ տարածքը կազմել է 11,2 %: Ներկայումս Հայաստանի անտառները հազիվ 7% են կազմում: Հանքի շահագործման իրավունքը ստացած «ACP» ընկերությունը, «Թեղուտի հանքավայրի շահագործման ծրագրի իրականացման նպատակով անտառային ծածկույթի հատմամբ անտառային տնտեսությանը հասցվող վնասի հատուցման ծրագրի» համաձայն, նախատեսում է անտառապատման աշխատանքներ կատարել 714 հեկտար մակերեսով տարածքներում: Սակայն այս հանգամանքը բնապահպանի համար բնավ հուսադրող չէ: «Դա դեռ այդքան հեշտ բան չէ` անտառը կոմպենսացնել, կարող են տնկել, բայց երբ դա անտառ կդառնա, դա մեծ խնդիր է առավել եւս այսօրվա կլիմայի փոփոխության պայմաններում»:
Բրիտանացի եւ ամերիկացի գիտնականները ներկայացնում են «անվիճարկելի վկայություններ» մոլորակում ջերմաստիճանի բարձրացման միտման մասին: Երկիր մոլորակի կլիման փոփոխվում է` առաջացնելով աննախադեպ աղետներ` հրդեհներ, ջրհեղներ, սառնամանիքներ, մինչդեռ այդ մոլորակի մի մասնիկը կազմող Հայաստանի գործարարներին դա կարծես թե չի հուզում, կարեւորը շահույթ ապհովելեն է:
Արդեն մի քանի տարի է, հասարակությունը պայքարում է Թեղուտի ծրագրի դեմ, բայց դեռեւս ապարդյուն: «Միգուցե լուրջ փոփոխություններ կլինեն, մոլորակը մեզ կօգնի: Մինչեւ խոշոր աղետ չլինի, բնապահպանությանը ոչ ոք ուշադրություն չի դարձնի»,- ասաց Կ.Դանիելյանը:
Օգոստոս 05, 2010