Tert.am
Վայոց ձորի մարզի փլուզված Մոզրովի քարանձավը վերականգնելու համար Մշակույթի նախարարությունը դեռ քայլեր չի ձեռնարկել: Այս մասին Tert.am-ին հայտնեց այս խնդրով զբաղվող բնապահպան ակտիվիստներից Գոռ Հովհաննիսյանը:
Վերջինիս տեղեկացմամբ՝ նախարարությունը առաջարկում է սպասել մինչև բարենպաստ եղանակային պայմաններ կլինեն` վերականգնողական աշխատանքները սկսելու համար:
«Մեկ շաբաթից հույսով ենք նորություն կլինի: Նախարարությունը խնդրել է սպասել: Սպասում ենք մինչև իրենց ուզած հարմար սեզոնը լինի»,-ասաց Հովհաննիսյանը:
Հիշեցնենք, որ նախարարության կողմից վերականգնման աշխատանքների համար ստեղծված աշխատանքային խումբը կազմվել էր դեռ ապրիլի սկզբին:
Հարցին` արդյո՞ք երկար ժամանակ չէ, որ խնդիրը լուծում չի ստանում, ակտիվիստը դրական պատասխանեց։ «Երկարը երկար է, բայց համբերատար սպասում ենք այն հույսով, որ ինչ-որ մի բան կլինի»,-նշեց Հովհաննիսյանը:
Նա հայտնեց նաև, որ քարանձավում մարտին տեղի ունեցած խոշոր փլուզումից հետո քիչ քարաթափումներ են եղել:
Հիշեցնենք, որ մարտի կեսերին «Չենք լռելու» երիտասարդական նախաձեռնության ակտիվիստները հայտարարություն էին տարածել՝ տեղեկացնելով, որ փլուզվել է Հայաստանի բնության ամենաչքնաղ հուշարձաններից մեկը` հանրահայտ Մոզրովի քարանձավը:
Ըստ նախաձեռնության՝ նախկինում անձավագետները բազմիցս ահազանգել են Մոզրովի քարանձավի պահպանման հարցում պետության կողմից անհրաժեշտ ուշադրության բացակայության մասին, սակայն ահազանգին արձագանք չի եղել:
Ինչպես հայտնել էր Tert.am-ը, փլուզման հետևանքով քարանձավից կախված քարեր են ընկել, որի հետևանքով բացվել է քարանձավի առաստաղը: Դա, ըստ բնապահպանների, վնասում է քարանձավին, քանի որ այնտեղ փոշի է ներթափանցում, բացի դրանից, տաք ու սառը օդից վնասվում է քարանձավի ներսի հատվածը:
Մշակույթի նախարարության կարգադրությամբ քարանձավ մուտք գործելը ժամանակավորապես արգելվում է:
Նշենք որ, Մոզրովի քարանձավն ընդգրկված է Վայոց ձորի մարզի պատմության և մշակույթի անշարժ հուշարձանների պետական ցուցակում:
Մայիս 14, 2012 at 15:25