ԷկոԼուր
Այս օրերին Երևանի Սարալանջի հատվածում կաթիլային ոռոգման համակարգի ներդրման աշխատանքներ են տարվում, որից հետո տարածքում ծառատունկ կիրականացվի։ Այս մասին ս․ թ․ մարտի 21-ին «Ֆեյսբուք» սոցիալական ցանցում ուղիղ եթերի ընթացքում հայտնել է Երևանի քաղաքապետի մամուլի խոսնակ Հակոբ Կարապետյանը։
Ներկայացնելով իրականացվող աշխատանքների ընթացքը` Կարապետյանն ասել է․ «Անցած տարի` այս օրը, հայտարարել էինք, որ Սարալանջի հատվածում ծառատունկ է իրականացվելու և ստեղծվելու է անտառ։ Բնականաբար, անտառ ստեղծելու համար պետք է կաթիլային ոռոգման համակարգ։ Այս ընթացքում ամբողջ տարածքը չափագրվեց, նախագծվեց ամբողջ ոռոգման համակարգը։ Այսօր արդեն քաղաք իջնելուց ականատես եղա, որ բուն ոռոգման ցանցի անցկացման աշխատանքները մեկնարկել են»։
Այնուհետև մամուլի խոսնակը ցուցադրել է ճանապարհի երկայնքով տեղադրված խողովակները՝ հավելելով, որ կաթիլային ոռոգման համակարգը կտեղակայվի նաև լանջով դեպի ներքև ընկած ճանապարհը, կձգվի մինչև Մատենադարան, Հայաստանի ազգային պոլիտեխնիկական համալսարան և Աբովյան պուրակ։ Նա հայտնել է, որ մի քանի շաբաթվա ընթացքում կաթիլային ոռոգման համակարգի ներդրման աշխատանքները կավարտվեն։ «Մյուս տարի նորմալ խնամվող, ավոտոնոմ համակարգով ոռոգվող անտառ կունենանք, 3-5 տարվա ընթացքում շատ ակնառու կլինի։ Անխնամ տեսքի փոխարեն կունենանք կանաչապատ հատված։ Բացի հաճելի տեսքից կունենանք էկոլոգիապես ավելի բարենպաստ միջավայր»,- նշել է նա։
Հակոբ Կարապետյանը նաև հայտնել է, որ ոռոգման համակարգի անցկացման աշխատանքներ են տարվում նաև Ծիծեռնակաբերդի այգու հատվածում։
Մարտ 22, 2020 at 15:37