ԷկոԼուր
Հայաստան կատարած այցի ընթացքում «Ռոսատոմ»-ի գլխավոր տնօրեն Սերգեյ Կիրիենկոն բարձր գնահատեց Հայկական ատոմային էլեկտրակայանի աշխատակիցների պրոֆեսիոնալ պատրաստվածությունը: «Ես այսօր եղա Մեծամորի հայկական ատոմային էլեկտրակայանում եւ տեսա նրա աշխատանքը: Պետք է ասեմ, որ այնտեղ աշխատում է շատ պրոֆեսիոնալ անձնակազմ: Ես դրական եմ գնահատում Հայկական ԱԷԿ-ի անվտանգության ապահովմանն ուղղված աշխատանքը: Չեմ տեսնում ԱԷԿ-ի կառավարման հարցում Ռուսաստանի մասնակացության անհրաժեշտությունը»,- Երեւանում լրագրողներին ասաց Կիրիենկոն, տեղեկացնում է «ՌԻԱՆովոստի»-ն:
Հիշեցնենք, որ երկու ամիս առաջ որակավորում ունեցող ՀԱԷԿ-ի ինժեներատեխնիկական անձնակազմը` 158 աշխատակից, պահանջեց բարձրացնել աշխատավարձը: Աշխատողներն ասացին, որ հակառակ դեպքում իրենք կհեռանան աշխատանքից: Էներգետիկայի եւ բնական պաշարների նախարար Արմեն Մովսիսյանը ստորագրեց աշխատողների հրաժարականները` հայտարարելով, որ այլ մասնագետներ կբերի: Պատասխանատվություն զգալով` մարդիկ չթողեցին իրենց աշխատանքը: Մի քանի օր անց միջադեպը հարթվեց:
Փետրվար 09, 2012 at 11:40