www.1in.am
Սևանա լճին բյուջեից հատկացվող գումարներն ըստ առաջնահերթության չեն ծախսվում: «Առաջին լրատվական»-ի հետ զրույցում նման տեսակետ հայտնեց «Էկոլուր» ՀԿ նախագահ, բնապահպան Ինգա Զառաֆյանը`արձագանքելով լրատվամիջոցներում տեղ գտած Հայաստանի նախագահին առընթեր Սևանի հանձնաժողովի նախագահ Վլադիմիր Մովսիսյանի այն հայտարարությանը, թե Սևանա լճի մակարդակը 1900 մետր է:
Այս ցուցանիշը Ինգա Զառաֆյանը իսկապես դրական տեղաշարժ համարեց, բայց ընդգծեց, որ դրան զուգահեռ պետք է այլ խնդիրների վրա ևս ուշադրություն դարձնել:
«Սևանա լճի մոտ մենք ունենք մոտավորապես 20-ից ավելի հանքավայրեր և դրանց հասցրած վտանգը շատ բարձր է: Անընդհատ խոսում են մաքրման կայանների կառուցման շուրջ, բայց անընդհատ այդ հարցը ձգձգվում է: Սրանք առաջնահերթություններն են Սևանի: Անընդհատ բնապահպանները ահազանգում են հանքավայրերի մասին. ինչքան խոսում ենք, այնքան դրանք շատանում են: Սոթքի ոսկու հանքավայրի պատճառով դեպի Սևան երկու գետ պոչամբարներ են դարձել, որը խայտառակություն է, բացի այդ՝ մայիսից սկսած այդ ջարդիչ սարքն աշխատում է, ինչքան երկար է աշխատում, այնքան շատ է աղտոտվում Սևանա լիճը»,- նշեց Ինգա Զառաֆյանը`հավելելով, որ
այդ ջարդիչ սարքն աշխատում է առանց փաստաթղթերի: Նա ենթադրում է, որ եթե չի դադարեցվում սարքի աշխատանքը, ուրեմն քաղաքական ուժն ի զորու չէ այն կանգնեցնել:
Անդրադառնալով դրական տեղաշարժերին` բնապահպանն ասաց, որ լճի մակարդակը բարձրանում է, որովհետև ամեն տարի պետբյուջեից գումար է տրամադրվում Սևանում միջոցառումներ անցկացնելու համար: Ըստ բնապահպանի` իհարկե ինչ-որ բան արվում է, բայց ոչ ըստ առաջնահերթության: «Ամեն տարի գումար է հատկացվում, ոչինչ չանե՞ն: Պարզ է, որ կանեն ինչ-որ բաներ: Կիսով չափ են աշխատանքներն արվում, իսկ այն մասը, որը արդյունք պետք է տա, չի արվում»,- նշեց Ինգա Զառաֆյանը`հավելելով, որ երկու առաջնահերթություններն են մաքրման աշխատանքները և հանքավայրերի ազդեցության նվազեցումը:
Հիշեցնենք, որ Վլադիմիր Մովսիսյանը ևս համարել էր, որ Սևանա լճի մակարդակի բարձրացումը գործի միայն սկիզբն է, պետք է շարունակել ափամաքրման աշխատանքները:
Մարտ 05, 2012 at 13:51