Lragir.am
«Վալլեքս» խմբի ընկերությունների փոխնախագահ Գագիկ Արզումանյանն այսօրվա ասուլիսում հայտարարեց, որ Թեղուտի հանքավայրի շահագործման ծրագիրը հանդիսանում է նորանկախ Հայաստանում բնապահպանական ամենաբարձր պատատասխանատվությամբ իրականացվող ծրագիրը: «Պարզապես, քանի որ նրա բնապահպանական ազդեցությունը ևս աննախադեպ է Հայաստանի համար, դրանով է թերևս պայմանավորված այն ուշադրությունը, որը ծրագիրն ստանում է: Այնուամենայնիվ, դրանից ծրագիրը միայն շահում է, որովհետև տարբեր փուլերում մենք կարողացել ենք ֆիլտրել այն առաջարկությունները, որոնք կարող են օգտագործվել իսկապես ի նպաստ ծրագրի և ի նպաստ շրջակա միջավայրի»,- ասաց նա:
Գագիկ Արզումանյանի խոսքով, ծրագիրն իր նախապատրաստական փուլերում անցել է ՀՀ օրենսդրությամբ նախատեսված բոլոր փորձաքննությունները, կազմակերպվել են հասարակական լսումներ: «Մենք բավական բարձր պատասխանատվությամբ ենք վերաբերվում շրջակա միջավայրի պահպանության խնդիրներին: Հայաստանում չկա օրենք, չկա իրավական որևէ ակտ, որը պահանջում է, որ եթե կառավարության կողմից տրվել է անտառահատման իրավունք, ապա անտառահատում իրականացնողը փոխհատուցող միջոցառումներ պետք է իրականացնի: Մեր նախաձեռնությամբ կառավարության որոշմամբ ամրագրվել է պահանջ, որպեսզի անտառահատմանը զուգահեռ մենք կրկնակի ծավալով անտառապատման աշխատանքներ իրականացնենք»,- ընդգծեց նա:
Ինչ վերաբերում է բնապահպանների դժգոհություններին, ապա, ըստ Արզումանյանի, դրանք գուցե պայմանավորված են նրանով, որ հասարակության այդ շերտը դրսևորման այլ հնարավորություններ չունի, և Թեղուտի հարցն է պարբերաբար բարձրացնում: «Չկան այլ ծրագրեր, որտեղ բնապահպանները փորձեն իրենց լուման ներդնեն` հասարակության զարգացման համար»,- նշեց նա: Երբ լրագրողները հիշեցրին, որ Հայաստանում բազմաթիվ այլ բնապահպանական հարցեր էլ կան և միայն Թեղուտով չի սահմանափակվում բնապահպանների աշխատանքը, Արզումանյանը հարցադրում արեց. «Ես չասացի` այլ բնապահպանական խնդիրներ չկան, բայց ձեզ հայտնի՞ են այլ ծրագրեր, որ ծրագիրն իրականացնողերն այսպիսի պատասխանատվությամբ շրջակա միջավայրի վերաբերյալ հարցերի շուրջ քննարկումներ ծավալեն: Եթե հայտնի են, ասեք»:
Գագիկ Արզումանյանը նաև նշեց, որ Թեղուտի հանքավայրի շահագործումը կարող է օրինակ ծառայել մյուս ընկերություններին, քանի որ իրենք օգտագործում են նորագույն սարքավորումներ:
Նա չթաքցրեց, որ բնապահպանների բողոքների արդյունքում են սկսել ուշադրություն դարձնել Թեղուտի տարածքի հուշարձանների խնդրին: «Հայաստանի պատմության մեջ միակ դեպքն է, որ այդպիսի մեծածավալ հնագիտական ուսումնասիրություններ են իրականացվում մասնավորի միջոցներով»,- ընդգծեց նա:
Vallex-ի նախագահ. Հայաստանում բնապահպան-ակտիվիստների շրջանում գրագետ բնապահպաններն ընդամենը 10 % են կազմում
News.am
Հայաստանում բազմաթիվ բնապահպանական կազմակերպությունների շարքում գրագետ բնապահպաններն ընդամենը 10 տոկոս են կազմում: Փետրվարի 17-ին, լրագրողների հետ զրույցում նման միտք է հայտնել Vallex ընկերության նախագահ Վալերի Մեժլումյանը:
Բնապահպանական կազմակերպությունների բուռն բողոքն առաջ բերած Թեղուտի հանքավայրի շահագործման նախագիծը մեկնաբանելով` նա նշել է , որ ընկերության արդյունաբերական նախագծերի ցանկացած առողջ քննադատություն միայն ողջունելի է:
«Բնապահպանական կազմակերպություններն այնպիսի աղմուկ-աղաղակ են բարձրացնում, որի ներքո լեռնահանքային արդյունաբերության հազարավոր աշխատակիցներ պարզապես հեւում են: Սակայն պետք է գնահատել այդ աղմուկ-աղաղակը, առավել ուշադրություն դարձնել բնապահպանական լուրջ խնդիրներին, որոնք առկա են լեռնահանքային ցանկացած նախագծում: Այդ պատճառով էլ ես ողջունում եմ այդ աղմուկ-աղաղակը: Հենց այդ պատճառով էլ ընկերությունը մասնակցում է բաց երկխոսությանը եւ պատասխանում բնապահպանության հետ կապված բոլոր հարցերին: Ընդ որում, պատասխանում է նաեւ կիսագրագետ մարդկանց, որոնք բավականին շատ են: Եթե վերցնենք բոլոր բնապահպանական կազմակերպությունները եւ ստուգում անցկացնենք, թե բնագետների ինչ մակարդակ է այնտեղ տիրում, ապա գրագետ մարդիկ կարող է եւ 10 % լինեն, մնացածը պարզապես անգրագետ են», - հայտարարել է Վ. Մեժլումյանը:
Ըստ նրա` հասարակության որոշակի զանգված միտումնավոր կերպով ցանկանում է ստվերել արտադրական կազմակերպությունների դրական գործունեությունը: «Այն մարդիկ, ովքեր նախկինում վաստակում էին «խոպանում», այժմ հարյուրավոր խմբերով տուն են վերադառնում: Նախկինում Թեղուտում ոչ մի խանութ չկար, այժմ կա 10 խանութ: Եւ այդ բոլորը տեղական բնակիչներն են` թեղուտցիները: Կտրուկ աճել է ծնելիությունը, սակայն բոլորը չէ որ դա հաշվի են առնում: Չէ որ շատ քչերին է հետաքրքիր Թեղուտի ինչ-որ խուլ գյուղում ծնելիության մակարդակը», – ասել է Վ. Մեժլումյանը:
Ըստ երկրաբանական հետազոտության տվյալների `Թեղուտյան հանքավայրը Հայաստանում պղնձի պաշարներով երկրորդն է (1,5 միլիոն տոննա), ինչպես նաեւ պարունակում է մոտավորապես 100 հազար տոննա մոլիբդեն: Թեղուտի շահագործումը նախատեսում են սկսել 2014 թվականին: Հանքավայրում արդեն տարվում են հանքափորման աշխատանքները:
Հիշեցնենք, որ 180 հա անտառի փոխարեն, որը Vallex-ը հատելու է Թեղուտյան հանքավայրում, ընկերությունը պարտավորվել է տնկել 400 հա:
«Վալլեքսի» պատասխանատուները պարզաբանումներ են տվել Թեղուտի վերաբերյալ
www.yerkirmedia.am
Թեղուտի հանքավայրի շահագործման հարցով, որը հասարակական մի շարք կազմակերպությունների ու բնապահպան ակտիվիստների շրջանում բողոքի մեծ ալիք է բարձրացրել, փետրվարի 17-ին պարզաբանումներ են տվել պատասխանատուները: «Վալլեքս» խմբի ընկերությունների շրջանակում գործող «Թեղուտ» փակ բաժնետիրական ընկերությունը, «Վալլեքսի» փոխնախագահ Գագիկ Արզումանյանի խոսքով` գործել է բացառապես օրենքի շրջանակում:
Ընկերությանը տրվել է Կառավարության թույլտվությունը, Բնապահպանության նախարարության կողմից էլ որեւէ առարկություն չի եղել: Անդրադառնալով առաջիկա ծրագրերին, Արզումանյանը շեշտել է, որ նախատեսվում է ընդլայնել գործունեությունն ինչպես Հայաստանում, այնպես էլ Արցախում:
«Հայաստանում չկա մի օրենք, իրավական ակտ, որը պահանջում է փոխհատուցում իրականացնել այն դեպքում, եթե Կառավարության կողմից տրվել է անտառահատման թույլտվություն: Սակայն մենք` մեր իսկ նախաձեռնությամբ, դիմել ենք եւ Կառավարության որոշմամբ ամրագրվել է այդ պահանջը, որով անտառահատմանը զուգահեռ՝ կրկնակի ծավալով ծառատնկման աշխատանքներ կիրականացնենք»,- ասել է Գագիկ Արզումանյանը։
«Վալլեքսի» նախագահ Վալերի Մեջլումյանի խոսքով, Լեռնային Ղարաբաղում գործող արտադրամասերի շարքում ընկերությունը հանդիսանում է Արցախի ամենախոշոր հարկատուն: Մինչեւ 2015 թվականը բոլոր ընկերություններում պղնձի խտանյութի արտադրությունը նախատեսվում է հասցնել 155.000, իսկ հանքաքարի արդյունահանումը՝ 10 մլն տոննայի:
«Այս պահին ունենք մի նորություն. շուտով պատրաստվում ենք շահագործել մի նոր արտադրամաս, որը եզակի է արտադրանքի եւ տեխնիկայի առումով: Դա նախկինում կուտակված եւ ապագայում ստեղծվելիք հանքաքարի վերամշակման գործարան կլինի»,- ասել է «Վալլեքս» խմբի ընկերությունների փոխնախագահ Արթուր Մկրտումյանը:
Թեղուտի պղնձամոլիբդենային հանքավայրը շահագործման կհանձնվի 2014 թվականին
ԱրմԻնֆո
Թեղուտի պղնձամոլիբդենային հանքավայրը շահագործման կհանձնվի 2014 թվականին: Այս մասին փետրվարի 29-ին Երևանում տեղի ունեցած մամուլի ասուլիսում հայտարարել է Vallex Group խմբի փոխնախագահ, Armenian Copper Programme (ACP) ՓԲԸ տնօրեն Գագիկ Արզումանյանը, պատասխանելով ԱրմԻնֆո գործակալության հարցին:
Նրա խոսքերով, Թեղուտում լեռնամշակման կոմբինատի շինարարության նախագծին Vallex Group-ը ներդրել է մոտ 130 մլն.դոլար, որի մի մասն ուղղվել է համապատասխան տեխնիկայի ձեռքբերմանը, իսկ մյուս մասը նախնական աշխատանքներին: Ներդրումների ընդհանուր փաթեթը կազմում է 320 մլն.դոլար:
«Ծրագրի շրջանակներում վերանորոգվել են հանքավայրի շրջակա ճանապարհները, կառուցվել նոր հոսանքագծեր, իսկ Դեբետ գետի վրա վերանորոգվում է պոմպակայանը, ինչպես նաև մասշտաբային շինարարություն է իրականացվում համապատասխան արտադրամասերում»,-նշել է փոխնախագահը: Այս միջոցառումները, շարունակել է նա, ներկայումս ապահովում են 870 աշխատատեղեր, իսկ շահագործման հանձնելուց հետո աշխատատեղերի քանակը կանցնի 1400-ի:
«Vallex Group խմբի բոլոր ընկերությունները վերջին 5 տարիներին, բացառությամբ ճգնաժամային 2009 թվականի, գրանցել են կայուն աճ: Արտադրանքի իրացման ընդհանուր ծավալը կազմել է 200 մլն.դոլար, իսկ շահույթը կազմել է 35 մլն.դոլար»,-նշել է Արզումանյանը:
Vallex Group խմբի նախագահ Վալերի Մեժլումյանն էլ իր հերթին նշել է, որ այսօր Հայաստանն արտադրում է տարեկան 30 հազ.տոննայից պակաս պղինձ, սակայն, Թեղուտի ծրագրի իրականացումից հետո այս ցուցանիշը կանցնի 40 հազ.տոննայից, իսկ 4 տարի հետո` կհասնի տարեկան 80 հազ.տոննայի: 2012 թվականին Vallex Group ընկերության ներդրումները Հայաստանում կկազմեն ավելի քան 150 մլն.դոլար, իսկ 2013 թվականին` ավելի քան 115 մլն.դոլար: Մինչև 2015 թվականը ներդրումների ընդհանուր ծավալը կկազմի 500 մլն.դոլար: Հայաստանում և Արցախում հանքահանման ծավալները մինչև 2015 թվականը կկազմեն 10.25 մլն.տոննա, և ընկերությունը կսկսի արտադրել 155 հազ.տոննա պղինձ, իսկ աշխատատեղերի թիվը կկազմի ավելի քան 4000:
Ըստ ընկերության նախագահի, անտառային տնտեսության պատճառված վնասների փոխհատուցումը հանդիսանում է Թեղուտի ծրագրի կարևորագույն բաղադրիչը: Այդ նպատակով «Թեղուտ» ՓԲԸ-ն, բնապահպանության և գյուղատնտեսության նախարարությունների հետ համատեղ, իրականացնում է ծառատնկման ծրագիր, որի շրջանակներում որպես փոխհատուցում պարտավորվում է տնկել 714 հա անտառ, 357 հա մակերեսով անտառների շահագործման դիմաց: Ներկայումս կտրվել է 70 հա մակերեսով անտառ, որի փոխարեն տնկվել է 205 հա մակերեսով անտառ, ընդ որում` ինչպես Թեղուտում, այնպես էլ Լոռու մարզի մյուս համայնքներում: Ինչ վերաբերվում է հանքավայրին կից պատմական և մշակութային հուշարձաններին, ապա ընկերությունը մշակել է դրանց պաշտպանության և պահպանման ծրագիր: Մասնավորապես, «Թեղուտ» ՓԲԸ-ն ֆինանսավորել է հնեաբանական հետազոտությունները, որոնք իրականացվում են ՀՀ ԳԱԱ և այլ կազմակերպությունների կողմից:
Փետրվար 17, 2012 at 16:20