Հանքարդյունաբերական որ ընկերությունների համար ՀՀ բնապահպանության նախարարությունը չի սահմանել մշտադիտարկումների իրականացման վճարների չափ

«ԷկոԼուրը» ՀՀ շրջակա միջավայրի նախարարի պաշտոնակատար Ռոմանոս Պետրոսյանին է ներկայացրել է աշխատող և չաշխատող մետաղական հանքարդյունաբերական այն ընկերությունների ցանկը, որոնց համար ՀՀ բնապահպանության նախարարությունը չի սահմանել մշտադիտարկումների իրականացման վճարների չափ:

ԷկոԼուրի նամակում նշված է.

«Հարգելի պարոն նախարար 

Ապրիլի 30-ին «ԷկոԼուր» տեղեկավական  ՀԿ-ն ՀՀ շրջակա միջավայրի նախարարին կից հասարակական խորհրդի նիստում ներկայացրեց «Չաշխատող հանքարդյունաբերական ընկերությունների պատասխանատվությունն ԱՃԹՆ գործընթացում» ծրագրի որոշակի արդյունքներ հանքարդյունաբերական խնդիրների վերաբերյալ: Ըստ մեր պայմանավորվածության՝ Ձեզ ենք ներկայացնում աշխատող և չաշխատող մետաղական հանքարդյունաբերական այն ընկերությունների ցանկը, որոնց համար մշտադիտարկումների իրականացման վճարների չափ ՀՀ բնապահպանության նախարարությունը չի սահմանել:

Նշենք, որ խոսքը վերաբերում է օգտակար հանածոյի արդյունահանված տարածքի, արդյունահանման ընթացքում առաջացած արտադրական լցակույտերի տեղադիրքի և դրանց հարակից համայնքների բնակչության անվտանգության և առողջության ապահովման նպատակով մշտադիտարկումների իրականացման վճարների չափին: Ընկերությունների տվյալները վերցվել են Հայաստանի Արդյունահանող ճյուղերի թափանցիկության նախաձեռնության (ԱՃԹՆ) կայքում հրապարակված ՀՀ բնապահպանության նախարարության և ընկերությունների  2016-2018թթ. հաշվետվություններից:

Այդ ընկերություններն են՝

1.   «Թեղուտ» ՓԲԸ, ՇԱԹՎ -29/376 ընդերքօգտագործման իրավունքի ժամկետ՝ 20.02.2013թ.-08.02.2026թ.: Շահագործում է Լոռու մարզի Թեղուտի պղնձամոլիբդենային հանքավայրը:

2.  «Ագարակի պղնձամոլիբդենային կոմբինատ» ՓԲԸ, ՇԱԹՎ-29/311 ընդերքօգտագործման իրավունքի ժամկետ 05.04.2013թ.- 31.12.2029թ.: Շահագործում է Ագարակի պղնձամոլիբդենային հանքավայրը:

3.  «Մուլտի գրուպ կոնցեռն» ՍՊԸ, ՇԱԹՎ-29/213 ընդերքօգտագործման իրավունքի ժամկետ 20.10.2012թ.- 06.03.2031թ.: Տիրապետում է ՀՀ Լոռու  մարզ, Մղարթի ոսկու հանքավայրի թիվ 8 և 5 հանքային մարմինների ընդերքօգտագործման իրավունքը:

4.  «Սագամար» ՓԲԸ,  ՇԱԹՎ-29/093 ընդերքօգտագործման իրավունքի ժամկետ 20.10.2012թ.- 01.03.2049թ.: Տիրապետում է Արմանիսի ոսկի-բազմամետաղային հանքավայրի ընդերքօգտագործման իրավունքը:

5.  «ԱՏ-ՄԵՏԱԼՍ» ՍՊԸ, ՇԱԹ-29/514 ընդերքօգտագործման իրավունքը տրվել է 24.12.2014թ. 7,5 տարի ժամկետով Սյունիքի մարզի Մեղրասարի ոսկու հանքավայրի շահագործման համար:

6.  «Լեռ Էքս» ՍՊԸ, ՇԱԹՎ-29/094 ընդերքօգտագործման իրավունք Հանքասարի պղինձ-մոլիբդենային հանքավայրի կենտրոնական տեղամասի  նկատմամբ, ժամկետ՝ 16.08.2012թ.-14.08.2032թ.:    

7.  «Բակտեկ Էկո» ՍՊԸ, ՇԱԹ-29/515 ընդերքօգտագործման իրավունք ՀՀ Լոռու մարզի Արջուտի ոսկու հանքավայրի նկատմամբ, տրված 15.08.2014թ. 26 տարի ժամկետով: 

8.  «ՎԱՅՔ ԳՈԼԴ» ՍՊԸ, ՇԱԹ-29/371  ընդերքօգտագործման իրավունք ՀՀ Վայոց ձորի  մարզի Ազատեկի ոսկի-բազմամետաղային հանքավայրի նկատմամբ, ժամկետ՝ 23.11.2012թ.-23.11.2037թ.: ՀՀ տարածքային կառավարման և ենթակառուցվածքների նախարարի 2019թ-ի դեկտեմբերի 19-ի թիվ 711-Ա հրամանով  «Վայք Գոլդ» ՍՊԸ-ն զրկվել է ընդերքօգտագործման իրավունքից։ Ընկերությունը հրամանը բողոքարկել է ՀՀ վարչական դատարանում: Դատական գործը գտնվում է դատաքննության փուլում:

9.  «ՄԵԳՈ ԳՈԼԴ» ՍՊԸ, ՇԱԹՎ-29/184 ընդերքօգտագործման իրավունք ՀՀ Արագածոտնի մարզի Թուխմանուկի ոսկու հանքավայրի կենտրոնական տեղամասի նկատմամբ, ժամկետ՝ 28.12.2012թ.- 21.07.2040թ.: Ընդերօգտագործման իրավունքը դադարեցվել է ՀՀ տարածքային կառավարման և ենթակառուցվածքների նախարարի 13.12.2019թ.  693-Ա հրամանով, սակայն ընկերությունը հրամանը բողոքարկել է ՀՀ վարչական դատարանում: Դատաքննությունը դեռ չի ավարտվել:

10.  «ՖՈՐՉՆ ՌԻԶՈՐՍԻՍ» ՍՊԸ, ՇԱԹՎ-29/169 ընդերքօգտագործման իրավունք Հրազդանի երկաթի հանքավայրի նկատմամբ, ժամկետ 20.10.2012թ.- 26.01.2032թ.: ՀՀ տարածքային կառավարման և ենթակառուցվածքների նախարարի 31.07.2020թ. N 1033-Ա հրամանով դադարեցվել է ընկերության ընդերքօգտագործման իրավունքը: Ընկերությունը բողոքարկել է այդ հրամանը: Գործը գտնվում է վճռաբեկ դատարանում:

11.«ՄՈԼԻԲԴԵՆԻ ԱՇԽԱՐՀ» ՍՊԸ ՇԱԹ-29/174 ընդերքօգտագործման իրավունք ՀՀ Սյունիքի մարզի Դաստակերտի պղնձամոլիբդենային հանքավայրի նկատմամբ՝ տրված 06.11.2012թ. 9.2 տարի ժամկետով: Ընկերության ընդերքօգտագործման թույլտվություն դադարեցվել է ՀՀ տարածքային կառավարման և ենթակառուցվածքների նախարարի 28.07.2020թ.  1008-Ա հրամանով։ Ընկերությունը հրամանը բողոքարկել է ՀՀ վարչական դատարանում: Նշանակված է դատաքննություն:

12.  Մշտադիտարկումների համար վճարներ չեն սահմանվել նաև «Մարջան Մայնինգ», «Պարամաունտ գոլդ մայնինգ», «Վարդանի զարթոնք» ընկերությունների համար, որոնց ընդերքօգտագործման իրավունքները դադարեցված են և բողոքարկման արդյունքում ՀՀ վարչական դատարանը մերժել կամ հետ է վերադարձրել այս ընկերությունների հայցադիմումներն ընդդեմ ՀՀ տարածքային կառավարման և ենթակառուցվածքների նախարարության:

Այս ընկերությունների կողմից մշտադիտարկման վճարներ չվճարելով՝ խախտվել է Ընդերքի մասին ՀՀ օրենսգրքի 59-րդ հոդվածի 1-ին մասի պահանջը։ Իրավական առումով դրա պատասխանատուն ՀՀ շրջակա միջավայրի նախարարությունն է, որը պարտավոր էր ՇՄԱԳ գործընթացում սահմանել այդ վարձավճարների չափը՝ համաձայն Ընդերքի մասին ՀՀ օրենսգրքի 17-րդ հոդվածի 2-րդ մասի 7-րդ կետի,  ՀՀ կառավարության «Օգտակար հանածոյի արդյունահանված տարածքի, արդյունահանման ընթացքում առաջացած արտադրական լցակույտերի տեղադիրքի և դրանց հարակից համայնքների բնակչության անվտանգության և առողջության ապահովման նպատակով մշտադիտարկումների իրականացման, վճարների չափերի հաշվարկման և վճարման կարգը սահմանելու մասին» 2013 թվականի  հունվարի 10-ի N 22-Ն որոշման։ 

ՀՀ ընդերքի մասին օրենսգրքի (ուժի մեջ է մտել 2012թ․ հունվարի 1-ից) անցումային դրույթների 80-րդ հոդվածին համապատասխան, մինչ 2012թ-ը  կնքված ընդերքօգտագործման պայմանագրերը, պետք է վերակնքվեին և համապատասխանացվեին օրենսգրքի պահանջներին (այդ թվում մշտադիտարկումների մասով), ինչը չի արվել:

Ակնկալում ենք Ձեզնից ստանալ խնդրի կարգավորմանն ուղղված գործընթացի վերաբերյալ պարբերական տեղեկատվություն:

Տեղեկացնում ենք նաև, որ ԱՃԹՆ բազմաշահառու խմբում ՀՀ շրջակա միջավայրի նախարարությունը երկար ժամանակ չունի իր ներկայացուցիչը, ինչի հետևանքով նախարարությունն անմասն է ընթացող գործընթացներին»: 

Մայիս 05, 2021 at 15:52